Alkitab Mobile SABDA
[VER] : [BIAK]     [PL]  [PB] 
 <<  Filemon 1 >> 

1Ro Paulus, snon ḇesmai snar Yesus Kristus ma ro Timotius naek koḇedi, faro Filemon yaswar kaku, bati ḇefararur kayam

2ma faro Apfia, srar koḇedi ma faro Arkipus, bati ro fararur koḇedi ma faro jemaat ḇefananjur ro rum ḇyedi:

3Saswar-fakamaman ma aski-ḇaḇenaḇye ro Allah, Kma koḇedi ma ro Manseren Yesus Kristus ryous mko kada!

4Rofyor yabenadi, yap snonsnon bedi ma yakofen kasumasa faro Allah yedi.

5Snar yamnaf saswar bedi faro Allah kawasa ḇyesi, ma kakyar ḇena faro Manseren Yesus.

6Ma yanadi, insa ḇaḇeoser koḇedi ro kakyarya iso ḇefrur fawawi ḇeḇye rofandu ko faro Kristus.

7Ro saswar bena yasma kwar marasrisen ḇeba ma samambraḇ, ma Allah kawasa ḇyesi sisma sneprei snar aw.

8Snar rarirya naek ḇena kakyar oser eḇedari yaḇuk sasoser faro naek aw insa wafrur rosai nari wafrurna,

9ḇape yaswarepen saswar ḇena, iḇye syadi yor faro aw. Aya, Paulus, yaḇemansar kwar, ma baboine kako yasmai ro bui snar Yesus Kristus,

10inja yor ro aw snar romawa yedi Onesimus yasma kwar rofafisu aya isya ro bui

11-- randakya ḇyefainda faro aw ḇa, ḇape baboine ḇyefainda kaku iḇye faro aw ma aya kako.

12Yawan kaḇer i faro aw -- ikada sneuser yedi. --

13Yaḇe yakarwarek kaku i rodine faisadwer aw insa duffarmyan aya rofyor yasmai ro bui snar Ankankinem Ḇeḇyeya,

14ḇape rofyor wamarisen ḇaim, nari yafrur roi oso ro marisen ayedi ḇa, insa roi ḇeḇyena wafrur awerna kuker ḇaḇedafdifer mboi wafrurna kuker marisen.

15Eḇedari Onesimus byinkwanbur aw resari, insape nwa i isof fyoro-fyoro,

16imnis manfyan wer ḇa, mboi isyadi ro manfyan, isoine imnis naek koswar kaku, faro aya rarirya, rosai wer faro aw, iḇye faro snonkaku ma faro Manseren kako.

17Rofyor kwara aya ḇemin bedi ḇena kakyar oser, nwa Onesimus imnis nwa aya.

18Ma rofyor ifrur fromo faro aw roḇawer ḇyenyaki faro aw, buknama yaḇarna kam, --

19aya, Paulus, yafaduru i kuker fasfas ro mankundaya: Nari yaḇakna -- insa yakofen awer: "Aw ḇeḇarna kamya!" -- snar ḇyenyaki maro aya, isoine mankundaw ḇardi.

20O, naek ayedi, befaindama ḇeaya kada snar Manseren: Buk sneprei maḇe aya snar Kristus!

21Yafas mufaḇe aw, snar yakyar nari beuser wos ayena. Mboi yafawi nari wafrur syadi ro fararyor ayedine.

22Rofyor ani fasos kako fabuk moḇ yaḇeryar ro, snar yakyar nadi ḇena nari yakaḇer faro aw.

23Aroo faro aw ro Epafras, min ayedi ḇeyaksmai fnoḇek aya ro bui snar Yesus Kristus,

24ma ro Markus, Aristarkus, Demas ma Lukas, min ḇefararur kayam kuker aya.

25Saswar-fakamaman Manseren Yesus Kristus ryous rur mkoḇesi kada! Ro aya, Paulus



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Filemon 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel