Alkitab Mobile SABDA
[VER] : [BIAK]     [PL]  [PB] 
 <<  Ibrani 10 >> 

1Ro sasoser Refo Yahudiya ḇyuk monda nin ro koreri nari ḇeramaya, ḇape nin ro koreri ḇardiḇa. Wampasi wambarek nakam samsom ssḇuk ḇefarsarser namnis ḇesyakwar monda. Inja rariso sasoser Refo Yahudi ma samsom ḇerarirya nbuk manasnis faro snonkaku ḇerama ḇesyom Allahsyake?

2Ma snonkaku ḇesyom Allah seḇefasren kaku kwar ro sasar, nari sḇaḇir sḇesasar wer ḇa, ma nari simnai ro ssḇuk som.

3Ḇape samsom ro wampasi wambarek nakam nḇuk swarepen faro snonkaku sasar sena.

4Snar lembu snon rik ḇyena ma domba snon rik ḇyena nari napyos sasar ḇa.

5Rarirya rofafisu Kristus syun ḇesupswan ine, ikofen faro Allah: "Aw wamarisen ḇa som ma farsarser ḇape fasos kwar baken oso ḇeaya.

6Wamarisen ḇa som aiwan ḇekun imnis farsarser oroḇaido samsom ssḇuk farser faḇepyos sasar.

7Inja yakofen: 'Ayaisoine, o Allah! Yarama insa yafrur marisen bedi, imnis fasfas ḇekur aya ro syap ḇeniw ine.' "

8Randakya Kristus ikofen: "Wamarisen ḇa som ma farsarser; wamarisen ḇa som aiwan ḇekun imnis farsarser ma samsom ḇepyos sasar." Kristus ikofen rarirya, ḇape som ḇeḇor anna ssḇuk farser siso sasoser Refo Yahudi.

9Ma ḇarpurya Kristus ikofen: "Aya isoine, o Allah! Yarama insa yafrur marisen bedi." Rarirya Allah ipyos som-som ḇekwar ḇeḇor anna kam, isadwer na kuker Kristus raris som ḇebabo.

10Ma snar Allah marisen ḇyedi, Yesus Kristus fyasren ko kam ro sasar kuker som ro Yesus mankundi ḇyeḇefarser ḇerarwan oser monda isof fyoro-fyoro.

11Imam Yahudi oser-oser ifrur fararur ḇyedi ro ras oser-oser, ma fyarser kaḇer ḇesyakwar som ḇemnis nari ḇepyos sasar ḇa.

12Kristus ḇyuk farsarser som oser monda snar sasar, som ani kyain rawo isof fyoro-fyoro. Posa kwar Kristus kyain ro Allah ḇar raku ḇyedi ma ḇyuk sasoser fnoḇek Allah.

13Ma baboine Kristus iwaf isof Allah ifrur mbroḇ ḇyesi faskafyo faroi.

14Snar kuker som oser monda, Kristus ifrur snonkaku ḇesma ḇaḇefasren ro sasar, fasinapes isof fyoro-fyoro.

15Ma roi ḇeḇesya ani Allah Rur ḇyedi ḇyuk ḇaḇesaksi ḇeko. Allah Rur ḇyedi ikofen:

16" 'Ine kada asas nari yafrur faro si ro rasras nari ḇerama,' Manseren ikofen, 'Nari yarir sasoser yena ro sisnesna, ma yaker na ro kakara sena.'

17'Nari yafanander sasar ma ḇarḇor sena.' "

18Inja, sasar ma ḇarḇor anna neḇepyos kwar fandun fasḇuk som ḇaḇepayasyos sasar wer ḇa.

19Inja naek srar, baboine kuker marmar Yesus ani ḇyuk makakei fakosun ro Moḇ Ḇesren Syadi ani,

20snar Yesus syeḇen kwar nyan babo oso ḇeko, isoine nyan ḇeḇuk kankenem. Nyan ani dunuk kruḇen eruk, isoine Yesus mankundi baken ḇyedi,

21ma kona snon oso ḇeḇe Imam Ḇeba ḇeḇeḇru ro Allah Rum ḇyedi.

22Inja, mkorama kofanam Allah kuker sne ḇenapes ma kakyar ḇekaku beri, snar kosnesna neḇeḇan sren ro ḇaḇaḇir sasar, ma ḇaken koḇena neḇeḇan sren kwar kuker war ḇesren.

23Mkorama kufnako ro rosai kokarem imnis raris kakyar koḇedi, snar kokyar Allah nari ḇyuk raris asas ḇyedi.

24Mkorama kokarayaye insa kodifyae ko, insa kofrur roi ḇeḇye ma kofasna saswarya.

25Koḇinkwanbur awer fananjur kayam ro ḇaḇeari koḇena, imnis snonkaku ono sifrur kwar, ḇape mkorama kanun yaeko, snar kofawi mboi fyoroḇa wer nari Manseren ryama.

26Snar rofyor Allah ḇaryas ḇyedi sikofen i kwar maḇeko, ḇape kofrur sasar ḇesyakwar, kuker famamyun nari som oso isyaḇa faipyos sasar koḇena.

27Ḇape isya faroko isoine kofanam Allah kakara ḇenapes ḇyedi ma for masasor Allah nari ḇekunpres snonkaku ḇesampum isya.

28Ro ḇeponiwara ḇesampum sasoser Moses ḇyuknasya nari sisma payasyos ro sasar senaḇa mboi sisma samamyai ma marmar, rofyor saksi risuru roḇa kior sesaksi snonkaku ani ḇyesasar kaku ḇeri.

29Rariso samamyai ḇemarḇak ssḇuk faro snonkaku ḇekoryae Allah Rumkun ḇyedi, snonkaku ḇekofen rik asas ḇefasreni darwarem, ma snonkaku ḇekoryae saswar-fakamaman Rurya?

30Snar kofawi mansei ḇekofen ḇo ḇeyoḇo: "Nari ayaiso ḇemunsuya. Ma kakuḇaḇoi nari mankundayaiso ḇemunsu na." Ma ikofen wer ḇo doḇo: "Nari Manseren ḇyemankara faro kawasa ḇyesi."

31Ḇayesi ḇeyonef ansi nari simkak namsinḇaḇeri, rofyor sisapi ro Allah ḇekenemya ḇramin ḇyesuya.

32Mkoswarepen fafisu ḇesyof. Rofyor ani mkosma kandera ḇemaḇak, ḇape snar mkosma Allah isna ḇyedi kwar inja mkofaḇri ma mkosusuḇa,

33fafisu ono skoryae naek srar ma sifrur iḇyeḇa ro fababa. Fafisu ono kako mkun ḇar fnoḇek ḇesma kandera ansya.

34Fafisu ono mkun kwar ḇar ro kandera samamyai snonkaku ma fafisu ono papus mkoḇena sfasyar na, mkosma roi ḇeḇesya nane kuker marisen monda, snar mkofawi nari mkona arasai ḇeḇye syadi ḇekain fyoro-fyoroya.

35Rarirya mkorir awer kakyar mkoḇena, snar sasuref ḇeba isya iwaf.

36Mkofandun kaku kaḇaḇaḇi insa mkofrur Allah marisen ḇyedi, ma rarirya nari mkosma rosai Allah ḇyeasas kwar faro mko.

37Snar sfas ro Refo radine, "Knikmkun monda wer, sfasna faḇerama ani, nari ryama; ma nari isusu rarama ḇyediḇa.

38Ḇape snonkaku yesi ḇenapes nari ikenem; snar kakyar ḇyedi faro aya, ḇape rofyor fandusi ono sisusu, nari yamarisen siḇa."

39Ḇape nkoine nkoḇeoser kuker ḇaḇeoserya ma ḇeḇorḇa, mboi nkoine kawasa ḇekyar faro Allah ma ḇesma kankenem.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Ibrani 10 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel