1Snar rarirya mkorama komnai ro koḇuk farkarkor araref ḇepon ro ḇaḇe Kristen, ma iḇyekada kombrar ro farkarkor ḇemnis, isoine snonkaku simnai ro sifrur roi ḇeḇefromo, mboi sikyar faro Allah,
2isoine farkarkor ḇeḇeararef ro masi sren, kanow ḇramin ro snonkaku siḇrus na, kaḇakḇok ro ḇemarsya ma ḇaḇesamamyai ḇekain fyoroya.
3Roi nanekam, Allah imarisen ido, nari kofrur na. (Inja kokara awer roi kofrur ma kokyar na naiso ḇefnai koreri maḇeko naba, mboi snar Yesus iso ḇefnai fakosma koreriya.)
4Snar sisya ḇepon kwar ro Allah isna ḇyedi, ma san kwar ḇaḇeḇok ḇeḇye ro boiyaswa, ma sisma rarwas ro Rur Ḇesrenya,
5ma san Allah wos ḇeḇye ḇyena ma fakamaman awar nari ḇeramaya,
6ḇape sfamyun wer, rariso nari kokfin kaḇer si fasimbror ro sasar sena, snar mankunsi spaiepen Allah Rumkun ḇyedi wer ma sfafirek i ro fababa.
7Snar saprop ḇesosef nanek ḇemyun roi, ḇyuk mamarem rokaker ḇeḇefainda faro snonkaku ḇefrurisya, sisma Allah ḇaḇeḇok ḇyena.
8Ḇape rofyor saprop ani ḇyuksur rokaker ḇemarem ḇemanuk, ma kaḇrai borek, saprop ani ḇyefainda ḇa ma nari Allah ifrasi, ma ḇarpurya ḇyeḇekun.
9Ḇape naek srar yaswar kaku, nkokofen wos ḇeḇuk kandera nemirḇa, mboi yafawi kaku ḇeri rariso nari mkokfisbur na, snar mkona roi ḇeba syadi ro kandera anna, isoine koreri.
10Snar Allah inapes, isof nari fyanander ḇa fararur mkoḇena faro i ro fafnoḇek mkoḇena mkofrur faro kawasa ḇese ḇeḇe Kristensya, mkofnoḇek isof ro baboine kako.
11Nkomarisen insa mko oser-oser fyasna kaku ḇeri roi ikyarya isoine koreri isof isma i ro ḇarpurya,
12ma mkomyaren ḇa awer, ḇape nkomarisen mkoso si snar kakyar ma kaḇaḇaḇ sisma rarwas ro Allah ḇaḇeasas ḇyedi mkowaf ani.
13Snar rofafisu Allah ḇyuk asas ḇyedi faro Abraham, Allah ḇyuk mankundi fyores warek, snar oso ikaki syadiḇa ro i,
14doḇe: "Kaku ḇeri nari yaḇeḇok aw ma yafrur fawaryewen."
15Abraham iwaf kuker kaḇaḇaḇ ma rarirya isma rosai sḇeasas faroi.
16Snar snonkaku indo sfafores kuker snonkaku mansei ḇekaki syadi, isma samambraḇ ro fafores ani, ma isma fafnoḇek.
17Allah imarisen kawasa ḇesma asas ḇyedi ani, insa sikyar kaku, eḇedari ḇyuk mankundi fyores,
18insa fasasna risuru ansuya susadwer ḇa, isoine asas ma fafores, Allah fyes mankundi kuker fafores ani, Allah isrer ḇa, inja ḇesewar fafnoḇek koya, idif ko fakufnako kakyar ḇero ḇarpon koḇena.
19Kakyar ani kada yor ḇesambraḇ moḇ kufepen ko ma kankenem koḇena naknon, snar ḇyeḇemsawer isof ro sorenya ropukya, knamya isya ro sim ḇesren ro Allah rum ḇyedi ro boiyaswa.
20Yesus syun fapyon ko kwar, rofafisu iso rarwas Melkisedek, ḇye Imam Ḇeba isof fyoro-fyoro.