1Knam ro wos ḇeḇor nane isoine: kosma Imam Ḇeba ḇerarirya, ḇekain ro Allah Ḇeba syadi ḇar raku ro karapesa nasan ḇyedi ro boiyaswa,
2ma ḇeyuf fararur imnis Imam Ḇeba ro Moḇ Ḇesren Syadi, ro Rum kruḇen Ḇaḇeari ḇekaku, Manseren ifrurya ma snonkaku oso ifruri ḇa.
3Imam ḇeba oseroser ḇyeḇekanow insa ḇyuk farsarser roḇa som faro Allah: Rarirya kako Imam Ḇeba koḇedi, nari isma roi ono fanya ḇefarsarser.
4Imnis raris isya ro supswan inekada, nari ḇyeimam ḇa, snar imam sisya kwar fasḇuk farsarser som siso sasoser Refo Yahudi.
5Fararur sifrur imnis imam ani ḇyefanir ma nin ro rosai isya ro boiyaswa, Allah ikofen ḇadir ḇepon faro Moses kwar rofafisu nari ḇyawes Rum kruḇen faseari roya. Allah ikofen radine faro Moses: "Waswarepen! Wafrur nakam imnis raris sfasna faro au ro bonya bori kwar."
6Ḇape baboine Yesus isma nasan imam ḇeba syadi, ro fararur imam sifrur na. Snar asas ḇeyaḇek epen ḇyeḇefrur rofandu Allah kuker snonkaku, ikada imnis Manfandu ro ḇaḇeasas ḇeḇye syadi, snar roi ḇeradine neknam ro asas ḇekaki syadi.
7Snar rofyor asas ḇeyaḇek ḇepon ani fyarorewḇa kada, nari faindaḇa fakofrur asas ḇeyaḇek ḇeḇesuruya.
8Ḇape Allah isrow farorew ani ro kawasa ḇyesi, isof ikofen: "Mkoswarepen nari fafisu iyama, nari yafrur asas ḇebabo kuker kawasa yesi Israel, ma kawasa Yehuda.
9Asas ani imnis kuker asas yafrur kwar kuker kpu sesiḇa rofafisu yakfin si fasisasyarbur sup Masir. Sḇeuser asas yafrur faro siyaḇa, rarirya yafandun siḇa.
10Ḇape baboine, asas yafrur faro kawasa Israel ro rasras nari ḇerama, rarirya Manseren ikofen: Nari yaker sasoser ayena ro kakara sena, ma neḇefas ro sisnesna. Nari yaḇe Allah ḇesi, ma nari sḇekawasa ḇeaya.
11Ma osoḇa rofandu si fyandun ḇyuk farkarkor faro kina min ḇyesi, robaido ifkai faro naek byesi: 'Mkofawi Manseren kada!' Snar sikam, ḇeba kasun, nari sifawi aya.
12Nari yapyos sasar sena, ma yafanander na."
13Snar ifkaiḇair asas ḇebabo oso, Allah ifrur asas ḇepon ḇekwar ani faipromes fasaw.