Alkitab Mobile SABDA
[VER] : [BIAK]     [PL]  [PB] 
 <<  Kisah Para Rasul 2 >> 

1Ro ras Sababu Rur Ḇesren, snonkaku ḇekyar sya si ryur kam ro moḇ oso.

2Kniko rakrok oso dado ro nanki imnis wam doḇer ma kyain nosen rum, skain ro ya;

3ma smam sak-sak ono namnis ramar, nasber ma nkain ro siḇrusna.

4Ma sifo kuker Rur Ḇesren, mboi sirandak sawos ro wos-wos ḇeso, raris moḇ Rur ya ḇyuk fa sawos raya.

5Rofyor ya snon Yahudi ḇekyar ono si sya ro Yerusalem ro er nakam ro supswan pember.

6Fafisu rakrok ani dado ya, kawasa ḇeḇor ansi spanjuḇer. Ma sikmom snar oso-oso ro si imnaf manwawan ansi sawos ro wos sena.

7Sikam sikandor ḇo sefesfyas ma sifuken: "Inja rariso snar ḇeyawawos sine kam snon Galilea inke?

8Rariso indiri kokam komnaf sawawos ro wos koḇena oser-oser, isoine wos kawos ro mnu marin koḇena:

9koine snon Partia, Media, Elam, ḇekain ro Mesopotamia, Yudea ma Kapadokia, Pontus ma Asia, Frigia ma Pamfilia,

10Masir ma sup-sup Libia ḇefanam Kirene, snonkaku ḇerama ker Roma,

11iḇye snon Yahudi ma ḇeyakso kako agama Yahudi, snon Kreta ma snon Arab, komnaf siwawos ro wos koḇena oser-oser ro fararur ḇeba Allah ifrurna."

12Sikam sefesfyas ma sikmom ḇo sikofen yae faro si: "Rosaisoine?"

13Ḇape snonkaku ḇeso ono skoryae ḇo soḇo: "Simser."

14Inja Petrus iyori fnoḇek manwawan samfur seser oser ansi ma kuker mkaren ḇeba ikofen besi: "Ne, kawasa Yahudi ma mkokam ḇekain ro mnu Yerusalem, mkofawi ma mkokara wos ayena ne.

15Snonkaku ansine simser raris moḇ mkokara raya ḇa, snar insape arwo babo oras siw,

16ḇape raris Allah ikofen kwar kuker sḇayo Nabi Yoel:

17Roi ḇeḇor nane ro ras ḇepupes nari ndama imnis Allah wos ḇyena nari yawan Rur Yedi faro kawasa kam; ma nari Rur ya fyarkor romawa-inai mkoḇesi fa sawos roi ono, ma snonkbor-inkbor mkoḇesi nari smam mamam ono, ma kawasa mansar mkoḇesi nari smafu mafu ono.

18Ma manfamyan ayesi kako snon ma bin nari yawan Rur Yedi faro si ro ras-ras anna ma nari sawos roi ono.

19Ma nari yafrur aḇyair-aḇyair kanandor ro nanki yaswa ma fasasnai kanandor ro supswan ine: isoine rik ma for kamayow ma paw.

20Ma ori nari syadwer fa pyampanbos ma paikya irik ḇepon ro ras Manseren ifyafer ya, ras payamyum ḇeba ani.

21Ma mansei ḇefararyor kuker snonsnon Manseren nari isma aski.

22Ne, kawasa Israel, mkorower wos nane: Roi yakofen kuker ya isoine, Yesus ro Nazaret, snonkaku Allah kyimfir kwar ma fyasnai faro mko kuker samambraḇ ma aḇyair-aḇyair kanandor Allah ifrurna kuker Yesus ro fandu mko raris mkofawi.

23Iso Allah ḇyuk, imnis marisen ḇyedi, ma mkopai i kwar ḇo mkomun i kuker ḇramin ro er-er ḇeḇarḇor.

24Ḇape Allah ḇyawes i ma fyaspar i bur marindi marmar ya, snar papok marmar ya ipok fa kyarwarek i ḇa.

25Snar Daud ikofen ro i doḇo: 'Yamam ḇesya kwar faro Manseren, snar dores fanam aya isof yapok yamarmer ḇa.

26Eḇedari sneri marisen syadi ma rur yedi sandik Manseren, ma kraf yedi kenem kuker aski,

27snar rwir aya faro munaiḇui ḇa, ma mam monda Manfamyan ḇesren bedi i pokem ḇa.

28Wakofen ḇadir faro aya nyan kankenem ya; yamarisen syadi ro ḇarpon bedi snar au sya fanam aya.'

29Naek ma srar, ryani yakofen ḇayirbos faro mko ro Daud, er koḇedi kpusedi. Imar kwar ma seraki ma rus ḇyedi, isya kaker ro fanduko isof ras ine.

30Ḇape ikada nabi dirya ma ifawi, Allah ḇyeasas ḇe i kwar kuker soar, nari isiḇer oso ro Daud kpu ḇyesi fa ḇye wairek.

31Eḇedari myam rarpon kwar ma ikofen ro Wairek aḇiḇer ḇyedi, rofyor ikofen, nari yamam monda au ro munaiḇui ḇa, ma kraf bedi ipokem ḇa.

32Yesus ine kada iso Allah ḇyawes ya, ma ro aḇiḇer ḇyedi nkoine kam nko ḇesaksi.

33Ma Allah ikanow i kwar ro ḇar raku ḇyedi ma isma Rur Ḇesren ḇyeasas ani, i sabui fa iso mkomam ma mkorower ine.

34Snar Daud kada, dekḇe boiyaswa ḇa, mboi mankundi ikofen: Manseren ikofen kwar faro Manseren yedi:

35Kwain ro ḇar raku yedi, isof yafrur mbroḇ besi fa seararef ro wemssu.

36Inja er Israel syakam ipyum syadi si fawibos, isoine Allah isiḇer Yesus kwar, mkopai ro aprop ani, fa ḇye Manseren ma Kristus."

37Rofyor simnaf rarirya sisnesna nkarsosen, isof sifuken faro Petrus ma manwawan ḇeso ansi: "O naek nkoḇesi mko, rosaiso nari nkofrur ya?"

38Inja Petrus kyarem faro si: "Mkombror ma iḇye kada mkor fa mkosma masi sren kuker snonsnon Yesus Kristus ḇeḇuk ampun ro sasar mkobena, ma nari mkosma Rur Ḇesren.

39Snar mkoiso ḇeḇeknam asas ani ma faro romawa mkoḇesi ma faro kawasa ḇeḇinkwan kaker sya, isoine dandonek nari ḇesma fararyor ro Manseren Allah koḇedi."

40Ma kuker wos ḇeso nabor wer Petrus ḇyesaksibos beri, ma imsorḇo danun si ma ikofen: "Mko faspar mankun mko bur syos ḇeḇarḇor sine."

41Kawasa ḇekyar Petrus wos ḇyena sor fa sisma masi sren ma ro ras ani dandonek ḇefnoḇek sya indokada syaran rikior.

42Sikam si souser manwawan ansi farkarkor sena kuker ḇaḇeoser. Ma sikam siraryur ḇesyakwar fa spanasnis mamami ma senadi.

43Kawasa ansi simkak kam, snar manwawan ansi sifrur aḇyair kanandor nabor.

44Ma kawasa ḇekyar kwar syakada sḇeoser ma nana sena snakam na,

45ma ro fandu si, ono sisya sḇoḇ ḇesya kwar nana sena ma sirarwasna faro kawasa ansi imnis ananjar sena oser-oser.

46Kuker ḇaḇeuser ma kuker sne oser siryur ro ras-ras kam ro Rum Allah. Spanasnis mamami ro rum sena oser-oser ro rum ḇe rum ma sanan kam kuker raryaḇ ma kuker sne ḇenapes,

47mboi sisandik Allah. Ma kawasa kam simarisen si. Ma ras-ras nakam Manseren ḇyuk kawasa sibor fa sifnoḇek kuker snonkaku ḇesma aski.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Kisah Para Rasul 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel