1Fafisu Yesus myam kawasa ḇeḇor ansi, dek ro urek oso ma kyain kwar, manfamyan ḇyesi siryur faro I.
2Raimnai Yesus irandak dawos ma fyarkor si ḇo Ikofen:
3"Aski faro snonkaku rur ḇesaḇarar sya ro Allah ḇarpon ḇyedi, snar siḇena Ḇaḇesasoser Boiyas.
4Aski isya faro snonkaku ḇeḇarop sya, snar nari sisma sneprei.
5Aski isya faro snonkaku sne ḇesḇunek sya, snar siso nari ḇena supswan ine, ḇeromowi imnis Allah ankankinem ḇyedi.
6Aski isya faro snonkaku ḇebiser ma ḇembrow snar napnapes ya, snar nari sisyopen.
7Aski isya faro snonkaku ḇesaswar sya, snar nari sisma fakamaman.
8Aski isya faro snonkaku sne ḇesren sya, snar nari smam Allah.
9Aski isya faro snonkaku ḇeyun aski, snar nari sap siḇe romawa-romawa Allah.
10Aski isya faro snonkaku ḇeḇekandera snar napnapes, snar sikada nari sisma Ḇaḇesasoser Boiyas.
11Aski isya faro mko, rofyor skoryae mko ma sifrur kandera mko ma sonef mko kuker wos ḇeḇor ḇeḇyeḇa snar Aya.
12Mkoryaḇ ma mkomarisen, snar ḇaḇyak mkoḇena naba ro boiyas, snar rarirya kako sifrur kandera kwar faro nabi-nabi ḇepon mko sya."
13"Mko ine karumasen supswan. Rofyor karumasen ani ḇyuar, kuker rosaiso nari kofrur fa myasmasen wer? Ḇyuk fainda werḇa rarirya ḇyeḇesawen ma snonkakusya saref apapen i.
14Mko ine isnai supswan. Mnu ḇekain ro Urek bori ipok fyanarḇa.
15Oso wer snonkaku spam paramrom raimnai sikawefi kuker fyomba, mḇoi skafi ro adadu, isof ḇyeisnai snonkaku sya kaim ro rum ya.
16Rarirya isnai ḇedi isak ma isnaiyar snonkaku sya insa smam fararur ḇepyum ḇena ma sisandik Kmami ro boiyaswa."
17"Mkokara awer, Yarama ine fa Yaḇerer sasoser Refo Yahudi roḇaido syap nabi-nabi. Yarama fa Yaḇerer naba, mḇoi insa Yaḇeimnisna.
18Inja Yakofen faro mko: Kaku beri rofyor nanki ma supswan ine ssupromes ḇaim, sasoser Refo Yahudi, mir roḇa pun oso nari ryoḇa beri isof nakam namnis.
19Rarirya mansei ḇeḇerer roi oso ro sasoser Refo Yahudi ḇebaḇa syadi, ma fyarkor i kuker nyan ḇemnisḇa faro snonkaku ḇese, ima nari kyain ro moḇ ḇekakiḇa syadi ro Ḇaḇesasoser Boiyaswa; ḇape mansei ḇeḇeuser ma ḇefarkor mnis sasoser Refo Yahudi, ikada nari kyain ro moḇ ḇekaki syadi ro Ḇaḇesasoser Boiyaswa.
20Inja Yakofen faro mko: Rofyor kankenem ḇaḇeagama mkoḇena nanapes syadiḇa ro kankenem ḇaḇeagama ḇefawinananem Refo Yahudi ma snon Farisi syaḇa, kaku ḇeri nari mkaksun ro Ḇaḇesasoser Boiyaswaḇa.
21Mkomnaf kwar wos Allah Ikofen faro kpu koḇesi: Mko mamun awer; mansei ḇemamun nari seifa ismai.
22Ḇape Yakofen faro mko: Snonkaku mansei ḇemsorya faro naek ḇyedi nari seifa ismai; mansei ḇekofen faro naek ḇyedi: Ne, korwar! nari ssuni ḇeḇarpon Kankain Karkara Agama ma mansei ḇekofen: Famyun Allah! nari sisawen i ro for ḇembrerḇa.
23Inja rofyor, wun farsarser ḇena ḇe rokef farsarser fa bukfarser, ḇape kwara smai naek ḇedi imsor au,
24rwir farsarser ḇena ro ḇarpon rokef farsarserya ma rwa bedasi ḇepon kuker naek bedi resari, raimnai insape kwaḇer ma buk farsarser ḇena.
25Fasau fa bedasi kuker mbroḇ bedi rofyor ausya kaker kuker i ro nyanya faduri, imbude mbroḇ bedi ḇyuk au faro mankaraya ma mankara dakḇuk au wer faro ḇefnoḇek i sya fa wasmai ro buindi.
26Yakofen faro mko: Kaku ḇeri nari wasasyar ro diwaḇa, rofyor bak namuk nyaki ḇenaḇa.
27Mkomnaf kwar wos berok radine: Mkofrur farbuk awer.
28Ḇape Yakofen faro mko: Mansei myam bin oso ma irmomen i ro sneri, ifrur farbuk kuker i kwar ro sneri dori.
29Inja rofyor mkamsu ḇar rakuya ḇyeninyan au, weri ḇo wasawen i, snar ipyum syadi faro au rofyor kina oso ro ḇaken bedi ryo, ro ḇaken bedi ḇesiper ḇyeḇesawen ro for ḇembrerḇa.
30Rofyor ḇramsu ḇar rakuya ḇyeninyan au, kwaruk i ma wasawen i, snar ipyum syadi faro au kina oso ro ḇaken bedi ryo ro ḇaken bedi ḇesiper ḇyeḇesawen ro for ḇembrerḇa.
31Wosya ḇyeḇekofen kwar kako: Mansei ḇefaspar swari nari ḇyuk syap faspar faro i.
32Ḇape Yakofen faro mko: Mansei ḇefaspar swari snar farbukḇa, i ḇefrur fa swari i frur farbuk; ma mansei ḇefakawin kuker bin fyaspar ani, ikako dakfrur farbuk.
33Mko mnaf kako kwar wos sikofen faro kpu koḇesi: Swowar ankar awer, mḇoi wufepen sowar bedi ro ḇarpon Manseren.
34Ḇape Yakofen faro mko: Mkopok mko sowar ḇa beri, iḇye kuker nanki, snar nanki irya Allah karapesa nasan ḇyedi,
35iḇye kako kuker supswan, snar supswan Allah araref ḇyedi rya, roḇa kuker Yerusalem, snar Yerusalem irya mnu Wairek Ḇeba,
36swowar awer kako kuker ḇru ḇedi, snar wapokḇa fa wafrur snonburyam oser fa ipyoper roḇa pyaisem.
37Rofyor mḇoi, iḇye mkokofen: mḇoi, rofyor roḇa, iḇye mkokofen: roḇa. Rosai ḇesyadi ro ine ḇyeknam ro ḇeḇarḇor ya.
38Mkomnaf kwar kako wos: Mkamor syadwer mkamor ma nakor syadwer nakor.
39Ḇape Yakofen faro mko: Mkomunsu awer snonkaku ḇefrur ḇarḇor faro mko, mḇoi manseiryawer ḇyaser fofer raku bedi, buk kako faro i fofer rasar bedi.
40Ma faro snonkaku ḇemarisen ḇeḇuksof au snar irmomen sansun bedi, buk kako syatubedi.
41Ma manseirya wer ḇeḇedafdifer au fa wambran fnoḇek i kawanwan mil oser, wambran fnoḇek i kawanwan mil risuru.
42Buk faro snonkaku ḇeyor ari faro au, ma snonkaku ḇeyor ari rosai ro au wamewer awer.
43Mkomnaf kako kwar wos: Mkoswar min mkoḇesi ma mkain mbroḇ mkoḇesi.
44Ḇape Yakofen faro mko: Mkoswar mbroḇ mkoḇesi ma mkoḇenadi wark ḇeḇewayam mko sya.
45Snar kuker rarirya mkoḇe romawa-romawa faro Kma mkoḇedi ro boiyaswa, ḇeḇuk ori faro snonkaku ḇarḇor ma ḇeḇye sya ma ḇyuk mekemya dado faro snonkaku ḇenapes ma ḇenapesḇa.
46Rofyor mko swar faro ḇeswar mko sya, rosai wasma ḇeḇaḇyak ya? Mkofawiḇake ḇeyor balasten sya kako sakfrur rarirya?
47Ma rofyor mkoḇuk aroo munda faro naek mkoḇesi monda, rosai ḇesyadi ro fararur snonkaku ḇesesi sena? Mkofawiḇake snonkaku ḇefawi Allahḇa sya sakfrur rarirya?
48Inja mkonapes imnis raris Kma mkoḇedi ro boiyaswa moḇ inapes rai."