Alkitab Mobile SABDA
[VER] : [BIAK]     [PL]  [PB] 
 <<  Roma 15 >> 

1Ḇesma kakyar ḇesambraḇ koya faro Allah, nari kokḇaḇser sano-sano ro snonkaku kakyar ḇesambraḇ ḇasya. Ma kofrur marisen mankunko ḇardi awer.

2Inja kono oser-oser ifrur marisen naek srar koḇesi faro ḇaḇye sena, insa kakyar sena faro Allah nsambraḇ syadi wer.

3Snar Kristus kako kyara raryaḇ faro mankundi ḇardiḇa. Ro Refoya sfas radine, "Anonef ḇeḇor ssḇuk faro mko nkur aya kwar."

4Fas-fas ro Refoya kam insa nfarkor ko. Snar farkarkor kosma ro Refoya nafrur fa kodworen ma kosambraḇ isof kokyar faro Allah.

5Iḇyekada Allah, ḇyuk ḇaḇekaḇaḇ ma sneprei faro snonkaku ḇefnoḇek naek srar mko, insa mkokenem kuker ḇaḇesne oser, ma mkoso nyan ro Yesus Kristus.

6Kuker sne oser, mko kam mkosandik Allah Kma ro Manseren koḇedi Yesus Kristus.

7Inja iḇye naek srar mkoḇesyowiyae mko kuker marisen, imnis raris Kristus kako dakna mko fa mkosandik Allah.

8Inja mkoswarepen, mboi Kristus duffarmyan kawasa Yahudi kwar fa fyasna mboi nari Allah ifrurmnis asas-asas ḇyena faro up koḇesi.

9Yesus ifrur faro er-er ḇese kako fa sisandik Allah, snar saswar ḇyedi farosi. Snar sfas ro Refo radine, "Snar rarirya nari yasandik au rofandu er-ersya, ma nari yadisen sandik snonsnon bedi."

10Snar sfas radine wer, "Mkoryaḇ fnoḇek Allah kawasa kyinfirsya, ne, er-er kam!"

11Ma ine wer kako, "Mkosandik Allah, ne, er-er kam, iḇyekada snonkaku kam mkosandiki!"

12Ma Yesaya ikofen kako radine, "Ro Isai kpu ḇyesi nari snon oso isasyar ma nari ḇyuk sasoser faro er-er kam; ma er-er kam nari sikyar faroi."

13Allah knam ro naek srar kakyar mkoḇena. Rarirya ifrur fa naek srar mkosma marisen ḇeba ma aski, snar mkokyar faroi, insa kuker Allah Rur papoik ḇyedi, naek srar mkokyar syadi wer faro Allah.

14Naek srar ayesi! Yafawi mboi roi ḇeḇye nabor kaku naisya ro mko. Naek srar mko kako mkofawi nakam, ma mkoḇukna nfarkoryae mko.

15Ḇape yamarisen yaḇuk swarepen ro roi ono faro mko kaker ro syap ine; snar Allah ḇyuk kwar maro aya fararur ine.

16Allah ḇyuk kwar fa yaḇe manfamyan ro Yesus Kristus, ma iwan aya faro er-er ḇese ḇeḇe Yahudiḇasya, ma yafararur imnis imam, ḇeḇaryas Ankankinem Ḇeḇye ro Allah, insa kawasa ḇeḇe Yahudiḇasya simnis farsarser oso faro Allah ma Allah nyasi. Iḇyekada Allah Rur ḇyedi ifrur fa sḇefarsarser oso faro Allah.

17Inja, snar yaḇe oser kwar kuker Yesus Kristus, inja yamsik kuker fararur ayedi faro Allah.

18Yamsik ḇo yawos rarirya ro rosai Yesus ifrur kuker aya kwar fa yafararur faro kawasa ḇeḇe Yahudiḇasya, insa sḇeyuser Allah. Yafrur rarirya kuker wos ma fararur,

19ma kuker aḇyair-aḇyair kanandor; nakam ndarirya snar papoik ro Allah Rur ḇyedi. Ankankinem Ḇeḇye ro Kristus yaḇaryas nakam faro snonkaku, randak ro Yerusalem isof ro Ilirikum.

20Marisen ayedi isoine yaḇaryas Ankankinem Ḇeḇye ro Allah ro moḇ kawasa sakmnaf Kristus ḇaim. Snar yamewer yaḇawes fararur ro snon ḇese araref senandi.

21Snar sfas ro Refo radine, "Snonkaku beyaksma bararyas ro i ḇaim, nari smam; ma snonkaku beyakmnaf ḇaim, nari sifawi."

22Yawḇe rarwan ono kwar fa yaḇe yarakaki naek srar mko, ḇape roi ono nadadwarek aya.

23Ḇape baboine fararur ayena ro supya mnuk ine, naḇro kwar. Wampasi wambarek ono, yamarisen yarakaki naek srar mko.

24Nari rofyor marandan ayedi yaraḇe sup Spanyol, yunuk ro mnu mkoḇedi, yakyar nari yasrow mko kuker marisen. Posa kwar yakyar nari mkofnoḇek aya ro marandan ayedi ḇe Spanyol.

25Ḇape baboine yamarisen yun famfnoḇek faro kawasa Allah ḇyesi ro Yerusalem.

26Snar jemaat-jemaat ro Makedonia ma Akhaya sawos namuk kwar fa siryur famfnoḇek faro naek srar kawasa ḇesaḇarar rofandu Allah kawasa ḇyesi ro Yerusalem.

27Siwos namuk kwar fa simarisen sifrur rarirya. Mboi snonkaku ansi nari sifnoḇek naek srar ḇesaḇarar ro Yerusalem ansi; snar kawasa Yahudisya eḇedari kawasa ḇeḇe Yahudiḇasya sisma ḇok ro Allah. Inja, kawasa ḇeḇe Yahudiḇasya kako nari sifnoḇek kawasa Yahudisya kuker arasa sena sisma ro supswan ine.

28Rofyor yafrur posa fararur ayedi kwar, isoine yun famfnoḇek siryur anna faro kawasa ro Yerusalem kwar, nari yara ḇe Spanyol yunuk ro mnu mkoḇedi.

29Rofyor yara fa kwar, nari yaḇedar ḇok nabor ro Kristus faro mko.

30Kuker Manseren koḇedi Yesus Kristus, ma kuker saswar ro Allah Rur ḇyedi ḇyuk na, yor kaku faro naek srar, insa mkakḇenadiwarek aya faro Allah.

31Mkoḇenadi insa Allah fyaspar ayabur kawasa ḇekyarḇa ro Yudeasya, insa yun famfnoḇek ḇe Yerusalem faro Allah kawasa ḇyesi rodia insa sisma na kuker marisen.

32Ma rofyor Allah imarisen, nari yaramufa yasrow mko kuker marisen. Ma nari yasma sneprei rofandu mko.

33Allah ḇeḇeknam askiya ifnoḇek mko kam! Amin.



Studi Alkitab dengan AI: Chat dengan Alkitab GPT.

Studi lengkap, silahkan lihat: Alkitab SABDA.
Dengar dan baca Alkitab Karaoke, silahkan kunjungi: Alkitab Karaoke.
Rencana Multimedia Baca Alkitab: BaDeNo.

 <<  Roma 15 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Keesaan
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Alkitab GPT
Bantuan
Dual Panel Dual Panel