Dual Panel1Engka séddi tau sugi sibawa riyakkitangi polé ri suku Bényamin, asenna Kish. Anggota kaluwargana Békhorat, takké polé ri appang Afiah. Ambo’na Abiél sibawa nénéna Zéror.
2Kish mappunai ana’ worowané, asenna Saul, séddiwi kallolo iya magelloé sibawa mawatang. Dé’ muwi séddi tau ri sininna Israélié iya lebbi magelloé naiya aléna. Watakkaléna lebbi matanré towi; rata-rata tanréna tau Israélié banna gangka ri salangkanna.
3Riséuwaé esso siyagangngaré kaleddé appunnangenna Kish teddéng. Rimakkuwannanaro makkedani Kish lao ri Saul, "Tiwini sala séddinna pattumanié, namusappai iyaro sining kaleddé’é."
4Nanajalajja’ni Saul silaong pattumaninna daéra buluna Efraim sibawa tana Salisa, iyakiya dé’ naruntu’i iyaro sining olokolo’é. Nainappa mennang joppa matteru lao ri tana Sahalim, iyakiya iyaro sining kaleddé’é dé’ towi gaga kuwaro. Nasappa towi ri daérana Bényamin, iyakiya siya-siya bawang.
5Wettunna mennang lettu ri tana Zuf, makkedani Saul lao ri pattumaninna, "Laono mai talisu bawang, ajakké lebbi manennengngi ambo’ pikkiri’ki naiya sining kaleddé’éro."
6Nappébali iyaro pattumanié, "Tajengngi riyolo! Ri kotaéwé engka séddi tau atanna Allataala. Ripakalebbi senna ri tauwé nasaba aga iya napauwé tuli tonget-tongengngi kajajiyang. Laono mai talao ri aléna, ajakké naulléi paissengiki kégai iyaro sining kaleddé’é."
7Nakkeda Saul, "Rékko laoki méwai sita, agana riwéréngngi matu? Bokong iya ritiwié cappuni, nadé’ tappunnai aga-aga untu’ riwéréngngi iyaro atanna Allataala?"
8Nappébali iyaro pattumanié, "Nasitujuwangngi engka mupa ri iyya séddi dowi péra’. Uwéréppi matu iyaro atanna Allataala kuwammengngi namaélo paissengiki kégai iyaro sining kaleddé’é."
9Nappébali Saul, "Makessinni! Laono mai talao." Nalaona mennang ri kotaé, ri onronna atanna Allataalaro. Wettunna mennang tuppuiwi bulu-bulu iya mattujué ri kotaéro, siruntu’ni mennang sibawa siyagangngaré ana’dara iya maéloé mala uwai ri bujungngé. Namakkutana mennang lao risining ana’daraéro, "Engka muwiga pakkita-kitaé ri kotaé?" (Iyaro wettué séddié nabi riyasengngi pakkita-kita, jaji rékko séddié tau macinna makkutanangngi séuwaé ri Allataala, makkeda makkuwaiyé, "Laono mai talao ri pakkita-kitaé.")
10(9:9)
11(9:9)
12Nappébali iyaro sining ana’ daraé, "Iyyé, engkai, silalona joppa poddiyoloiko. Rékko masitta’ko, naullé mullé mupa rapii. Silalona lisu ri kotaé nasaba iya essoéwé ri yasé’na mézbaé ri bulu-bulué engka akkasuwiyangeng akkarobangeng untu’ ra’ya’é. Dé’ naanré matu sining undangengngé ri wettu dé’napa napolé, nasaba harusu’i barakkakiwi iyaro akkarobangengngé riyolo. Rékko laoko makkekkuwangngé, muruntu’i matu ri wettu dé’napa natuppuiwi bulu-bulué untu’ manré."
13(9:12)
14Jaji joppani Saul sibawa pattumaninna lao ri kotaé, na wettunna mennang muttama ri pintu gerbangngé, siduppani mennang Samuél iya mattengngangngé joppa mattuju ri onrong assompangngé ri bulu-bulué.
15Siesso riyolonaro mappasengngi PUWANGNGE ri Samuél makkuwaé,
16"Baja éléé kira-kira wettu makkuwaéwé, maélo-Ka suro séddi tau polé ri suku Bényamin méwako sita. Lanti’i sibawa upacara amminnyakeng untu’ mancaji arung ri umma’-Ku Israélié. Napassalama’i matu umma’-Ku polé ri tau Filistingngé. Uwitani anrasa-rasanna umma’-Ku sibawa méngkalingai terinna mennang méllau tulung."
17Wettunna Samuél naita Saul, makkedani PUWANGNGE lao ri aléna, "Iyanaé tau iya Uwasengengngékkoro. Naparéntai matu umma’-Ku."
18Na wettuéro Saul maddeppériwi Samuél ri seddéna pintu gerbangngé, sibawa makkutana, "Taddampengekka, Pa’, kégi bolana iyaro pakkita-kitaé?"
19Nappébali Samuél, "Iyya’na iyaro pakkita-kitaé. Laono poddiyoloika ri onrong assompangngé ri bulu-bulué, nasaba iyaé essoé manréko matu sisama iyya. Bajapi éléé ubaliwi matu sininna pakkutanamu, purairo weddinno lisu.
20Passalenna sining kaleddé’mu iya teddéngngé tellungngesso labe’éro, aja’ mubata-bata, nasaba rilolongenni. Nappani, iya kaminang mangke’é ri sininna Israélié maéloi riwérékko sibawa kaluwargana ambo’mu."
21Nappébali Saul, "Iyya’é poléka ri suku Bényamin, suku iya kaminang baiccu’é ri Israélié, nainappani kaluwargaku kaminang dé’gaga bettuwana ri laleng sukuéro. Jaji magi Bapa’ nakkeda makkuwaro lao ri iyya?"
22Nainappa Samuél naéra Saul silaong pattumaninna muttama ri laleng bili’ battowaé, nanawéréngngi mennang onrong iya makessingngé ri yolona sining undangengngé iya jumellanaé kira-kira telluppulo tau.
23Nainappa makkeda Samuél lao ri pannasué, "Patalani juku iya upalalowangiyékko onna’ro."
24Nanalani iyaro pannansué bagiyang ripilé polé ri juku poppanna, nanapatalai ri yolona Saul. Nakkeda Samuél, "Iyanaé bagiyang iya upallaingengngékko kuwammengngi weddingngi muwanré makkekkuwangngé sisama sining topolé laingngé. Tanréni." Nananréna Saul. Jaji iyaro essoé manréni Saul sisama Samuél.
25Purairo nonnoni mennang polé ri onrong assompangngéro namuttama ri kotaé. Riwérénni Saul onrong atinrong ri ri yasé’ bolaé,
26namatinrona. Wettunna mompo essoé, riyobbini Saul ri Samuél iya engkaé ri pabbingengngéro, adanna, "Oto’no, laono mai uwantara’ko lao." Moto’ni Saul, nanajoppa silaong Samuél.
27Wettunna mennang lettu ri wiring kotaé, makkedani Samuél lao ri Saul, "Suroi iyaro pattumanié joppa poddiyoloiki." Nanalaona iyaro pattumanié, namakkedasi Samuél, "Léppakko cinampe kuwaé, maéloka paissengiko pasenna Allataala."