Alkitab Mobile SABDA
[VER] : [BUGIS]     [PL]  [PB] 
 <<  Hakim-hakim 16 >> 

1Riséuwaé esso laowi Simson ri Gaza. Kuwaniro siruntu sibawa séddi cakkuribang nanalao matinro sibawa makkunraiéro.

2Nanaéngkalingani pabbanuwana Gaza makkedaé engkai Simson kuwaro. Jaji, nakeppunni onrongngéro sibawa natajengngi puppu benni ri gerbanna kotaé. Iyakiya dé’ aga-aga napogau’ iyaro wennié nasaba mappikkiri’i mennang, "Mompopi matti matanna essoé, nappaki mpunoi."

3Iyakiya dé’ namatinro Simson kuwaro narapi élé. Tengnga benninna moto’i nanalao ri pintu gerbanna kotaé. Nareddu’i iyaro pintué iya manenna silaong allirinna sibawa paccala’na. Nainappa naakka iyaro pintué ri salakangkanna, nanatiwii ri tompo’na bulu-bulué ri liwenna Hébron.

4Purairo napojisi Simson séddi makkunrai polé ri Lompo Sorék. Asenna iyaro makkunraié Délila.

5Napoléna lima tau panguwasana Filistingngé ri makkunraiéro sibawa makkeda, "Palécéi Simson kuwammengngi namaélo paissengiko aga rahasiyana awatangenna, sibawa pékkugi carana untu’ patteddéngngi awatangennaro. Nanallalengiwiro weddikki polé sibawa siyoi untu’ caui. Na tungke-tungkeki matti maélo mpérékko sisebbu sératu dowi péra’."

6Nakkeda Délila lao ri Simson, "Simson, aga saba’na mumawatang makkuwa? Nasibawang aga harusu’ko risiyo kuwammengngi nateddéng awatangemmuro? Coba mappaissengengngi rahasiyana!"

7Nappébali Simson, "Rékko risiyoka sibawa pitu tulu pana baru iya dé’éppa namarakko senna, malemmaka matu sibawa mancaji pada-pada tau biyasaé."

8Nainappa iyaro sining panguwasa Filistingngéro mpéréngngi Délila pitu tulu pana iya dé’éppa namarakko senna. Nainappa, tau Filistingngé mattajeng ri bili’ laingngé, risiyoni Simson ri Délila sibawa sining tuluéro nainappa gora, "Simson! Poléi tau Filistingngé!" Matteru Simson napettui iyaro sining tulu panaé. Iyaro sining tulué pettu pada-pada wennang pettué nakenna api. Rahasiya awatangenna Simson dé’pa nabocoro.

9(16:8)

10Nanakkeda Délila lao ri Simson, "Ah, mabbelléko! Muwacculé-culéika bawang. Ayo curitakka aga wedding risiyorekko!"

11Nametté Simson, "Rékko risiyoka sibawa tulu baru iya dé’éppa naengka naripaké, malemmaka matu sibawa mancaji pada-pada tau biyasaé."

12Na tau Filistingngé mattajengngi ri bili’ laingngé, malani Délila siyagangngaré tulu iya barué, nanasiyosi Simson. Nainappa gora, "Simson! Poléi tau Filistingngé!" Iyakiya napettuiwi Simson iyaro sining tulué polé ri limanna pada-pada tau pettuiyé wennang.

13Nanakkeda Délila lao ri Simson, "Ah, muwacculé-culéisika. Mabbelléko. Ayo curitakka aga wedding risiyorekko!" Nappébali Simson, "Rékko iya pituppesse’é gemme’ku riyanengngi ri wennangngé ri paréwa tennungngé, nainappa riyassiyoreng ri aju paréwa tennungngéro, malemmaka matu sibawa mancaji pada-pada tau biyasaé."

14Naripatinrona Simson ri Délila nainappa naaneng iya pituppesse gemme’na Simson ri wennangngé ri paréwa tennungngé. Purairo nassiyorenni ri aju paréwa tennungngéro nainappa gora, "Simson! Poléi tau Filistingngé!" Moto’ni Simson nanagettengngi gemme’na angkanna leppe polé ri paréwa tennungngéro.

15Nainappa makkeda Délila, "Makkedako mupojika padahal atimmu mabélai polé ri iyya! Wékkatelluni muwacculé-culéika, narapi makkekkuwangngé dé’ mumaélo mappaissengengngi magi mumawatang makkuwaro."

16Esso-esso Délila matteru-teru bawang majjabé sibawa maddessa, angkanna mangingngini Simson méngkalingai.

17Angkanna nacurita Simson rahasiyana, nakkeda Simson, "Dé’pa naengka narirette gemme’ku. Puraka riyabbéréyang lao ri Allataala mancaji appunnangenna iya ripallaingngé. Sipongekku jaji mancajika séddi tau Nazir. Rékko rirette’i gemme’ku; teddéngngi matu awatangekku; malemmaka matu sibawa mancaji pada-pada tau biyasaé."

18Napérasani Délila makkedaé purani nappaissengeng Simson rahasia atinna. Rimakkuwannanaro nakirinni iyaé birittaéwé lao risining tomakuwasana Filistingngé, "Polésiko iyanaé sisengngé bawang. Purani nacurita Simson rahasiyana ri iyya." Poléni mennang sibawa tiwi dowi untu’ Délila.

19Purairo ricapu-capuni Simson ri Délila gangkanna matinro ri wakkanna, nainappa mobbi tau nanasuroi rette’i pituppesse gemme’na Simson. Nainappa nasissa Simson, nasaba teddénni awatangenna Simson.

20Nainappa gora, "Simson! Poléi tau Filistingngé!" Moto’ni Simson sibawa nasenna leppe pada-pada wettu-wettu iya labe’é. Dé’ naissengngi makkedaé risalaini ri PUWANGNGE.

21Naritikkenna risining tau Filistingngé sibawa nacukkéi lise matanna. Natiwini mennang ri Gaza nanasiyoi sibawa duwa ranté tembaga, nainappa naputtama ri laleng tarungkué. Kuwaniro risuro mappallaung maddése.

22Iyakiya iyaro wettué mammulasi tuwo paimeng gemme’na.

23Riséuwaé esso maddeppungenni sining panguwasana Filistingngé maélo mappésta sibawa makkasuwiyangeng akkarobangeng marowa senna untu’ Dagon, déwatana mennang. Makkélonni mennang, "Purani’ nawéréng déwatata apakalang lao ri Simson, balitta!"

24Wettunna mennang mariyo-riyo makkedai, "Tiwii Simson kumaiyé kuwammengngi namancaji addicawatta!" Nanalani mennang Simson polé ri tarungkué, namancajina addicawanna mennang. Nasuroi mennang tettong ri pallawangenna duwa alliri iya battowaé. Wettunna tau maégaé mitai Simson, napojini mennang Dagon sibawa makkélong, "Purani’ nawéréng apakalang déwatata lao ri balitta iya puraé solangiwi wanuwatta sibawa mpunoi makkuwamani égana tautta!"

25(16:24)

26Nakkeda Simson lao ri anana’ worowané iya rénréngngéngngi, "Leppessangngi limakku kuwammengngi weddikka makkatenningngi alliri-alliri iya tula’éngngi iyaé gedungngé, nasaba macinnaka sanré kuwaro."

27Iyaro gedungngé buce sibawa tau. Iya lima panguwasana Filistingngé engka towi kuwaro. Na ri langga yasé’na iyaro gedungngé engka kira-kira 3.000 tau. Makkita-ita manengngi mennang sibawa méllé-kéllé’i Simson.

28Iyaro wettué massempajangngi Simson; makkedai, "Oh PUWANG Iya Pommatanré, tennapodo taéngngerakka. Wéréssika awatangeng iyaé sisengngé bawang, oh Allataala, kuwammengngi nasibawangngi iyaé tindakangngé weddikka wale’i tau Filistingngé iya puraé cukkéi iya duwa lise matakku."

29Purairo nakkatenninni Simson iya duwa alliri tengnga iya tula’éngngi iyaro gedungngé. Nainappa mattulekkeng sibawa lima abéyona ri alliri séddié na lima ataunna ri alliri iya laingngé,

30gorani, "Leppessakka maté silaong sining tau Filistingngéwé!" Nanapassangkani awatangenna sorongngi iyaro alliri-allirié gangkanna léwu sibawa geppai iya lima panguwasa Filistingngé silaong sininna tau laing iya engkaé kuwaro. Maté toni Simson. Iyakiya, ri wettu amaténnaro naunoi tauwé lebbi maéga naiya wettunna tuwo.

31Nanapoléna sumpulolona sibawa sininna kaluwargana untu’ malai ujuna. Natiwini mennang iyaro ujuna lisu, nanatampungngi ri laleng kuburu’na Manoah, ambo’na. Iyaro kuburu’é engkai ri pallawangenna Zora sibawa Esytaol. Mancajiwi Simson pamimpinna Israélié duwappulo taung ittana.


  Share Facebook  |  Share Twitter

 <<  Hakim-hakim 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel