Dual Panel1Napoléna sininna umma Israélié polé ri Dan ri manorang lettu ri Bérsyéba ri yattang, sibawa Giléad ri alau, untu’ pennoiwi pangobbiéro. Maddeppungenni mennang sibawa masséddi ri Mizpa ri yolona PUWANGNGE.
2Iya manenna engka 400.000 prajuri polé ri pasukang mallalengngé. Pamimping-pamimpinna tungke suku bangsa engka towi kuwaro.
3Iyaro wettué naéngkalinga toni sining tau suku Bényamingngé makkedaé sininna tau Israélié iya laingngé maddeppungenni ri Mizpa. Nakkutananni iyaro sining tau Israélié lao ri tau Léwi iya riyunoé gundi’naro, "Coba curitakki pékkugi kajajiyang iyaro jaé!" Nappébali iyaro tau Léwié, "Léppakka sibawa gundi’ku ri Gibéa ri daérana Bényamin sibawa mabbenni kuwaro.
4(20:3)
5Napolé sining tau Gibéaé ri wennié untu’ sappaka. Nakeppungngi bola iya uwonroiyé mabbenni sibawa akkatta untu’ mpunoka, iyakiya rimunri nakédo salaiwi gundi’ku gangka maté.
6Nauwalani ujuna nainappa ulétta-létta, nainappa kiringngi lao ri iya seppulo duwa sukué ri laleng bangsata tungke-tungke silétta. Upogau’i iyaro gau’é nasaba iyaro sining tau Gibéaé purai napogau’ séuwaé iya majaé sibawa mappakasiri-sirié ri yelle’na umma Israélié.
7Iko maneng iya engkaé kuwaé iyanaritu tau Israél. Jaji makkekkuwangngé uwéllauwi timbangetta!"
8Nassama-samang sining tau iya maddeppungengngé ri onrongngéro tettong sibawa makkeda, "Idi manengngé dé’gaga iya maéloé lisu ri kémaé iyaré’ga ri bolaé.
9Iyanaé maélo tapogau’: Taundiwi untu’ pattentui sining tau iya harusu’é gasai Gibéa.
10Tawa seppulona polé risininna tau worowané Israélié harusu passadiya inanré untu’ ménnang iya mammusué. Iya laingngé laowi gasai Gibéa untu’ hukkungngi mennang nasaba jana iya puraé napogau’ ri yelle’na umma Israélié."
11Makkuwaniro umma Israélié masséddi untu’ gasai Gibéa.
12Purairo nasuroni umma Israélié sining tauwé lao ri sininna daérana suku Bényamin untu’ palettu’i karébaéwé: "Ja aga iya kajajiyangngé ri iko?
13Abbéréyangngi iyaro sining tau benna’é polé ri Gibéa lao ri idi kuwammengngi taunoi mennang nanallalengiwiro ripallennye’i iyaro jaé polé ri tengnga-tengngana Israélié." Iyakiya dé’ nabati-batiwi tau Bényamingngé ada-adanna tau Israélié iya laingngéro.
14Mala polé risininna kotaé ri daérana Bényaminro poléni sining tau Bényamingngé ri Gibéa untu’ musui sining tau Israél laingngé.
15Iyaro essoé napaddeppungenni mennang polé ri kota-kotana mennang singngéga 26.000 prajuri. Na ri lainnaéro pabbanuwanato Gibéa paddeppungeng toni 700 tau ripilé. Iya manenna tau kabiyo-biyo iya maccaé mallobang. Rékko mallobangngi, dé’ naengka nasala muwi céddé.
16(20:15)
17Na risining tau Israél laingngé maddeppungenni 400.000 égana prajuri tallatié.
18Iyaro tentarana umma Israélié laoni ri Bétel, sibawa makkutana ri Allataala, "Oh PUWANG, suku kégaénna polé ri yelle’ta iya harusu’é bunge lao luruiwi tau Bényamingngé?" Nappébali PUWANGNGE, "Suku Yéhuda."
19Pappa bajana éléé joppani mennang sibawa makkéma ri seddéna kota Gibéa.
20Naatoro’ni mennang barisi musuna siyolong sibawa kotaéro, nainappa malluru.
21Nassuna tentarana Bényamin maggasato sibawa mpunoi 22.000 tentara Israélié iyaro essoé.
22Nasaba acaurengngéro, laoni umma Israélié ri onrong assompangngé nanateri lao ri PUWANGNGE kuwaro narapi wenni. Makkutanani mennang, "PUWANG, harusu’ki’ga laosi musui saudara-saudarata tau Bényamingngéro?" Nappébali PUWANGNGE, "Ya, laono." Rimakkuwannanaro masumange’si tentarana Israélié, angkanna naatoro’si paimeng pasukanna mennang pada-pada esso mammulangngé.
23(20:22)
24Untu’ mabbékkaduwanna mennang lao gasai iyaro tentarana Bényamin.
25Na untu’ mabbékkaduwannato sining tau Bényamingngé massu maggasa. Iyaé sisengngé naunoi 18.000 prajuri tallatinna tentara Israélié.
26Nalaosi umma Israélié ri Bétel sibawa teri lao ri PUWANGNGE. Mappuwasani mennang kuwaro narapi wenni sibawa makkasuwiyangeng akkarobangeng ritunu lao ri PUWANGNGE.
27Iyaro wettué Petti Assijancinna Allataala engkai ri Bétel, sibawa Pinéhas ana’na Eléazar, eppona Harun, mancaji imang. Nanakkutana umma Israélié lao ri PUWANGNGE, "PUWANG, harusu’ki’ga laosi gasai saudara-saudarata tau Bényamingngéro, iyaré’ga harusu’ki’ga pappésauwi iyaé ammusurengngé?" Nappébli PUWANGNGE, "Gasai mennang! Baja maélo-Ka mpérékko apakalang."
28(20:27)
29Naéngkalingana pappébalinna PUWANG-ngéro, naatoro’ni sining tau Israélié tentarana ri onrong-ngonrong tassubbué ri seddéna Gibéa.
30Nainappa ri esso matellué nagasani mennang tentarana Bényamin sibawa susunang tentara mangoloé ri Gibéa pada-pada iya puraé napogau’ ri esso-esso riyolona.
31Maggasa toni sining tau Bényamingngé, sibawa tattaré untu’ massu polé ri kotaé. Pada-pada iya pura labe’é, mappammulani mennang mpunoi sining tau Israélié ri daéra-daéra ri saliweng kota ri laleng iya mattujué ri Bétel sibawa ri laleng iya mattujué ri Gibéa. Telluppulo tau Israél nauno.
32Rimakkuwannanaro nasenni sining tau Bényamingngé nacausi sining tau Israéliéro pada-pada pammulanna. Iyakiya tentara Israélié pura narancanani untu’ soro kuwammengngi natattaré tentara Bényamingngéro lao ri watattanaé, mabéla polé ri kotaé.
33Wettunna soro pasukang utamana Israélié, sibawa matoro’i barisi’na paimeng ri Baal-Tamar, sining taunna mennang iya nataroé ri seddéna Gibéa, masitta’ni massu polé ri onrong-ngonrong allekkekenna ri saliweng kota.
34Iyaro mennang sining tau tappilé polé risininna Israélié; jumellana 10.000 tau. Marowani musué wettunna seppulo sebbu tauwéro gasai Gibéa. Dé’ sises-siseng nasenna-sennai sining tau Bényamingngé makkedaé dé’na namaittana nacau.
35PUWANGNGE mpéréngngi apakalang tau Israélié lao ri tau Bényamingngé, angkanna iyaro essoé naunoi tau Israélié 25.100 tau tentara Bényamingngé.
36Nappai namaingeki tau Bényamingngé makkedaé cauni mennang. Pasukang utamana Israélié nattungka lari polé risining tau Bényamingngé nasaba nattuwangngi ana’ buwana mennang ri onrong-ngonrong allekkekenna ri seddéna Gibéa.
37Iyaro sining tau mallekke’é mapperi-perini massu gasai Gibéa; tattale’ni mennang lao tulili ri laleng kotaé sibawa mpunoi sininna tauwé kuwaro.
38Iyakiya pura mémenni sipekke lebbi riyolo makkedaé rékko engka rumpu makkompe liyasé polé ri tengnga-tengngana kotaé,
39pasukang utama iya soroé harusu’i giling sibawa gasai balié. Iyaro wettué sining tau Bényamingngé purani nauno 30 tentara Israélié sibawa nasenni mennang nacausi sining tau Israélié pada-pada riyolo.
40Iyakiya tennasenna-sennana mammulani maddumpu rumpué liyasé polé ri tengnga-tengngana kota Gibéa. Tassélenni sining tau Bényamingngé wettunna mennang giling sibawa naitai sininna kotaé nanré api.
41Na iyatoro wettué nagiling maggasa pasukang utamana Israélié, angkanna iyaro tentara Bényamingngé mancaji kacau nasaba namaingekini makkedaé pastini caui matu.
42Jaji, larini polé risining tau Israélié mattuju ri daéra padang kessi’é, iyakiya dé’ naulléi mennang leppe. Takkeppunni mennang ri yelle’na pasukang utamana Israélié sibawa pasukang iya wettuéro polé ri kotaé. Ricauni tau Bényamingngé masero senna.
43Sining tau Israélié keppungngi sibawa lellungngi mennang matteru-teru lettu riséuwaé onrong ri seddé Gibéa. Mallellungngi nanauno towi mennang
44seppulo aruwa sebbu prajuri tallatinna polé ri tentarana Bényamin.
45Tentara Bényamin laingngé balé’ni nainappa lari molai daéra padang kessi’é mattuju ri bulu-bulu batué ri Rimon. Limassebbu tau ri yelle’na mennang riyuno ri tengnga laleng. Iya laingngé rilellungngi matteru lettu ri Gidéom. Polé risining tauwéro engka 2.000 riyuno.
46Jaji, tentara Bényamin iya riyunoé essoéro engka 25.000 tau — iya manenna prajuri iya poré.
47Iyakiya polé ri yelle’na mennang iya lariyé molai daéra padang kessi’é mattuju ri bulu-bulu batué ri Rimon engka 600 tau iya leppe’é. Monroi mennang ri Rimon eppa uleng ittana.
48Nanalisuna tau Israélié nainappa nalurui sibawa nauno maneng sésa-sésana tau Bényamingngé — worowané, makkunrai, ana’-ana’ sibawa olokolo’nato. Sininna kotaé ri daéraéro natununi mennang.