Dual Panel1Mappaggurusi Yésus ri wirinna Tappareng Galiléa. Maéga senna’ tau katulungngi. Rimakkuwannanaro laoni tudang ri lalenna séuwaé lopi iya engkaé ri tompo’na uwai, na iyaro tau maégaé tettongngi ri wirinna tapparengngé.
2Nanappagguruwanna Yésus maéga passaleng lao ri mennang sibawa paké pakkalarapangeng. Mappakkuwiyé paggurui mennang.
3"Engkalingai! Engka séddi patani lao mampo biné.
4Wettunna mampo, engka biné teppa ri lalengngé. Napoléna manu’-manu’é manréi iyaro biné gangka cappu.
5Engkato teppa ri onrong mabbatu-batué, iya céddé’é tanana. Iyaro biné masitta’i tuwo nasaba makurang tanana,
6iyakiya wettunnana matanré essoé, mammulani makelle iyaro cura’-cura’na nainappa marakko sibawa maté nasaba dé’ namalamung ure’na muttama’.
7Engkato biné teppa ri tengngana alekale maddorié. Tuwoni iyaro alekale maddorié nanalimpengiwi iyaro cura’-cura’é angkanna dé’ naulléi mabbuwa.
8Iyakiya engkato teppa ri tana macommo’é. Iyaro biné tuwoi, namancaji maloppo nainappa mabbuwa, engka leppe’ wékkatelluppulo, engka enneppulona, sibawa engkato sératu."
9Purana nacurita iyaro pakkalarapangngé, makkedani Yésus, "Mappunnaikoto daucculing, éngkalingani!"
10Wettunna Yésus alé-alénami, poléni sining tau iya puraé méngkalingai pappagguruwan-Na silaong iya seppulo duwa ana’ gurun-Na. Naéllauni mennang pakatajangngi bettuwanna iyaro pakkalarapangngé.
11Nakkedana Yésus lao ri mennang, "Purano riwéréng pammasé untu’ missengngi rahasiyana passalenna pékkugi Allataala mapparénta. Iyakiya sining tau saliwengngé ripaggurui sibawa pakkalarapangeng,
12kuwammengngi ‘Natonget-tongengngi matu mennang makkita, iyakiya dé’ nakkita, matterui matu mennang maréngkalinga, iyakiya dé’ nappéjeppu, kuwammengngi naaja’ mennang nakkita sibawa mappéjeppu naaja’ napolé ri Allataala nariyaddampengeng mennang ri Allataala.’"
13Nainappa Yésus makkeda lao ri mennang, "Rékko dé’ mupahangngi pakkalarapangngéro, pékkugi mulléi pahangngi sining pakkalarapang laingngé?
14Iyaro pangampoé iyanaritu tau iya mappallebbangengngéngngi karéba polé ri Allataala.
15Biné iya teppaé ri lalengngé iyanaritu pada-padai sining tau iya méngkalingaéngngi karéba passalenna pékkugi Allataala mapparénta. Iyakiya maréngkalingana poléna Ibillisi’ malai aga iya puraé riyampo ri laleng atinna mennang.
16Biné iya teppaé ri onrong mabbatu-batué sinrupai sining tau iya méngkalingaéngngi iyaro karébaé, namatteru natarima sibawa masennang atinna.
17Iyakiya iyaro karébaé dé’ nakkure’ ri laleng atinna mennang, angkanna dé’ natahang maitta. Lolongenna mennang anrasa-rasang iyaré’ga paccallang nasaba karébaéro, matteruna massakka.
18Biné iya teppaé ri tengngana alekale maddorié sinrupai sining tau iya méngkalingaéngngi iyaro karébaé,
19iyakiya bata-batai passalenna atuwonna mennang sibawa macinnana tuwo sibawa masennang. Napessunna untu’ maddupa-rupang gau’ muttama’i ri laleng atinna mennang. Rimakkuwannanaro iyaro karéba polé ri Allataala tassipii ri laleng atinna mennang, angkanna dé’ nabbuwa.
20Sibawa biné iya teppaé ri tana macommo’é sinrupai sining tau iya méngkalingaéngngi iyaro karébaé sibawa natarimana, makkébuwani mennang maéga, engka telluppulo, engka enneppulona, sibawa engka leppe’ wékkasératu wassélé’na."
21Makkedai paimeng Yésus, "Engkaga naengka tauwé napalluwa pajjennangeng nainappa natongko baku iyaré’ga nataroi ri yawana onrong atinrongngé? Dé’ga nataroi iyaro pajjennangengngé ri ajé pajjennangengngé?
22Dé’gaga anu tassubbu iya dé’é napaita matu, sibawa dé’gaga iya rirahasiyakangngé dé’ naribongkara’ matu.
23Rimakkuwannanaro, rékko mappunnaiko daucculing, éngkalingani!"
24Nainappasi makkeda Yésus, "Pénessaiwi aga iya muwéngkalingaéwé! Ukkurang iya mupaké untu’ tau laingngé, napaké towi matu Allataala untu’ iko — sibawa mala lebbi maégapi.
25Saba’ tau iya mappunnaiyénna, riwéréngngi matu lebbi égapa; iyakiya tau iya dé’é nappunnai, céddé iya engkaé ri aléna, riyala towi matu."
26Nasambussi bicaranna Yésus, "Rékko mapparéntai Allataala selaku Arung, keadaanna weddingngi riyakkalarapangeng pada-pada séddié tau pangampo biné ri dare’na.
27Matinroi ri wennié; péseddingngi ri essoé. Naiyaro sining biné tuwoi matteru sibawa mancaji battowa. Iyakiya pékkugi carana iyaro sining biné tuwo mancaji battowa, iyaro tauwé dé’ naissengngi.
28Tanaé muto ritu passu wassélé: bunge’-bunge’na takkéna, nainappa takké-takkéna, nappa buwana.
29Narékko matasa’ni iyaro gandongngé, mappammulani tauwé sangkiwi nasaba narapini wettunna méngngala."
30Nakkutana Yésus, "Rékko mapparéntai Allataala, aga wedding ripasibandingengngi? Aga contona wedding ripaké untu’ pakatajangngi?
31Rékko mapparéntai Allataala, keadaanna pada-padai iyaé pakkalarapangengngé: Séuwa batu sawi iya nalaé séddi tau nainappa nataneng ri tanaé. Iyaro batu sawi-sawié iyanaritu biné kaminang baiccu ri linoé.
32Iyakiya rékko tuwoi, mancajiwi pong battowa ri yelle’na tanet-tanengngé. Takké-takkéna makkuwamani woronna angkanna poléi manu’-manu’é mébbu sarang ri yawana accinaungenna."
33Makkuwaniro Yésus paggurui tauwé sibawa makkégunang maéga pakkalarapangeng pada-padaéro, situru iya weddingngé napahang mennang.
34Tuli pakéi Yésus pakkalarapangeng rékko napaggurui iyaro sining tauwé. Iyakiya rékko Alénami sibawa ana’-ana’ gurun-Na, napakatajang manengngi lao ri mennang.
35Iyatoro arawéngngé, nakkeda Yésus lao ri ana’-ana’ gurun-Na, "Laono mai tasompe lao ri liweng tappareng."
36Naénré’na Yésus ri lopié, na ana’-ana’ gurun-Na salaiwi tau maégaé ri wiring tapparengngé, nainappa ménré ri lopi iya padaé. Nainappa Yésus silaong ana’-ana’ gurun-Na mappammula sompe. Engkato lopi-lopi laing kuwaro.
37Dé’ namaitta ri munrinna poléni anginrajaé. Naunruni bombang lopié sibawa muttama’ ri laleng angkanna céddé’pi napenno uwai iyaro lopié.
38Na Yésus mattengngangngi matinro ri borina lopié sibawa ulun-Na ri yasé’na angkalungungngé. Naritedduna ri ana’-ana’ gurun-Na. Makkedai mennang, "Pa’ Guru, dé’ga tapaduliwi rékko nakennaki abala?"
39Moto’ni Yésus, nanagera’i iyaro angingngé, nanakkeda lao ri tapparengngé, "Ammekkono, tennanno!" Nasorona angingngé sibawa tennang senna’ni tapparengngé.
40Nainappa makkeda Yésus lao ri ana’-ana’ gurun-Na, "Magi mumétau? Magi nadé’ mumateppe lao ri Iyya?"
41Namétauna mennang, nakkeda séddié lao ri laingngé, "Niga sitongenna iyaé tauwé, namuwi angingngé sibawa bombangngé tunru’to ri Aléna."