Dual Panel1"Puranana napaccappu PUWANG Allataalamu iyaro bangsa-bangsaé sibawa nawérénno wanuwanna, sibawa puranana muwala kota-kotana nenniya sining bolana mennang enrengngé monro kuwaro,
2iyaro daéraé harusu’i mutawa mancaji tellu bagiyang, tungke-tungke sibawa séddi kota allinrungeng iya magampangngé rirapi kuwammengngi tungke tau iya paunoé naulléi lari lao kuwaro.
3(19:2)
4Rékko séddié tau dé’ nattungkaiwi mpunoi tau laingngé iya tenniyaé balinna, weddingngi lari lao risala séddinna kotaéro sibawa weddingngi monro kuwaro.
5Ebara’na duwa tau silaong muttama ale’é untu’ mattubbang aju. Wettunna iya séddié mattubbang aju, leppe’i mata waséna polé ri torongenna nanakennai sellaona angkanna maté. Tau iya puraé paunoro sibawa dé’ nattungkaiwi dé’ napasala sibawa weddingngi lari lao risala séddinna pole ri iya tellu kota allinrungengngéro kuwammengngi nasalama. Ebara’na engka séddi bawang kota allinrungeng, naullé mabéla senna pallawangenna lao kuwaro, sibawa anggota kaluwargana iya mattanggung jawa’é untu’ mpale’i abbunowangngéro naulléi lellungngi sibawa ri laleng caina mpunoi tau iya dé’é napasala.
6(19:5)
7Rimakkuwannanaro uparéntakko untu’ passadiya tellu kota.
8Rékko purani nalowangi PUWANG Allataalamu daéramu pada-pada iya Najjanciyangngé lao ri toriyolomu, sibawa purani riwérékko sininna wanuwaéro,
9harusu’siko pilé tellu kota allinrungeng. (Iyaro wanuwaé maéloka mpérékko rékko mupogau’i sininna séuwa-séuwaé iya uparéntangngékko iya essoé, sibawa rékko mupojiwi PUWANG Allataalamu sibawa tuwo situru pappagguruwan-Na.)
10Pogau’i iyaro kuwammengngi aja’ mumadosa nasaba muleppessangngi tau iya dé’é napasala riyunoi ri wanuwa iya nawéréngngékko PUWANG Allataalamu."
11"Iyakiya laittosi rékko séddié tau tajengngi balinna sibawa nattungkaiwi nenniya perasaang benci mpunoi, nainappa lari lao risala séddinna kota allinrungengngé untu’ lolongeng allinrungeng.
12Ri laleng gau’éro sining pamimping kotana harusu’i mobbii iyaro tauwé nainappa mabbéréyangngi lao ri anggota kaluwargana iya mattanggung jawa’é untu’ mpale’i abbunowangngéro, kuwammengngi weddingngi riyuno.
13Aja’ muwamaséiwi. Paleppe’i Israélié polé ri pabbunoéro, kuwammengngi musaléwangeng."
14"Rékko lettu’no ri wanuwa iya nawéréngngékko PUWANG Allataalamu, aja’ mupaésa’i pakkaséséng tanana bali bolamu iya ripattentué ri wettu riyolo."
15"Séddi tau sabbi bawang dé’ nagenne untu’ pannessai séddié tau riteppu pasalai; kaminang kuranna duwa tau sabbi riyapparelluwang untu’ gauéro.
16Rékko séddié tau maélo solangiwi tau laingngé sibawa teppuwang salana ri pengadilangngé, na
17iya duwanna harusu’i lao ri onrong assompang iya napattentué PUWANGNGE kuwammengngi nariadéléki risining imangngé sibawa haking iya nakennaé jamang.
18Sining hakingngé harusu’i salidikiwi parakaraéro sibawa tonget-tongeng, narékko manessai iyaro tauwé purai napétenna pada-padanna tau Israél,
19harusu’i tanggungngi pahukkungeng iya riyakkattaiyé untu’ balinnaro. Nanallalengiro mupallennye’i iyaro jaé.
20Naéngkalingai matu sininna tauwé passalenna gau’éro sibawa métauni, angkanna dé’na gaga iya pogau’éngngi maja makkuwaéro.
21Aja’ mukasiyang ri laleng parakara-parakara makkuwaéro rupanna. Pahukkungenna padaénna: Nyawa risulléi nyawa, mata risulléi mata, isi risulléi isi, lima risulléi lima sibawa ajé risulléi ajé."