Dual Panel1Wettunna Nébukadnézar arung Babél sibawa tentarana iya ripakkasse’é ri pasukang-pasukang polé ri sininna bangsaé nenniya wanuwa iya tunru’é ri aléna poléni gasai Yérusalém sibawa kota-kotaé ri seddéna, PUWANGNGE mabbicara lao ri iyya.
2Nasuroka lao ri Zédékia arunna Yéhuda, sibawa makkeda makkuwaé, "Iyya, PUWANG Allataalana Israélié, mabbéréyangngi matu iyaé kotaé lao ri arung Babél nanatunui matu.
3Dé’ muleppe matu, sangadinna ritikkeng sibawa riyabbéréyang lao ri aléna. Siruntu’ko matu nenniya mabbicarako sibawa aléna, namulao matu ri Babél.
4Iyakiya éngkalingai ada-adak-Kué passalenna iko, Zédékia! Dé’ Mumaté matu ri laleng ammusurengngé,
5sangadinna maté sibawa tennang. Napékkugi ra’ya’é mattunu kamennyang wettunna tampungngi toriyolomu iya mapparéntaé ri yolomu, makkuwatoro ra’ya’é tunui matu kamennyang untu’ iko. Mabbaratai matu mennang sibawa makkeda, ‘Aduh! Dé’ni gaga arutta!’ Iyya, PUWANG, pura mabbicara."
6Naupalettu’ni iyaro pasenna PUWANGNGE lao ri Arung Zédékia ri Yérusalém,
7wettunna pasukanna arung Babél mattengngang gasai kotaéro. Nagasa towi mennang kota Lakhis sibawa Aséka, duwa kota mabbénténg iya mattahangngé mupa ri Yéhuda.
8Arung Zédékia sibawa pabbanuwana Yérusalém mébbuni assijancing untu’ paleppe’i
9ata-ata Ibraninna mennang, muwi worowané iyaré’ga makkunrai kuwammengngi dé’ muwi séddi tau polé ri bangsa Israélié iya powataéngngi tau sibangsana.
10Sininna ra’ya’é sibawa sining pajaba pamarénta iya puraé mébbu assijancing untu’ paleppe’i ata-atanna mennang sibawa dé’ namaélona powatai paimeng, tonget-tongengngi paleppe’i ata-atanna mennanro.
11Iyakiya rimunri tappinrai pikkiranna mennang, nainappa nala paimeng iyaro ata-ataé, sibawa passai mancaji atasi paimeng.
12Na PUWANG, Allataalana Israélié, suroka makkeda makkuwaé lao risining tauwéro, "Wettuk-Ku tiwii toriyolomu massu polé ri Maséré sibawa paleppe’i mennang polé ri angatangengngé, pura-Ka mébbu assijancing sibawa mennang.
13(34:12)
14Makkedaka makkedaé sininna ata Ibrani iya puraé mattumani enneng taung ittana, harusu’i ripaleppe ri cappa’na taung mapitué. Iyakiya toriyolomu dé’ namaélo puriyatiwi iyaré’ga méngkalingai aga iya Upowadaéro.
15Siyagangngaré esso labe’é upinrai kédo-kédomu sibawa pogau’i iya pésennangiyéngngi atik-Ku. Musitujui manenni untu’ paleppe’i ata-ata sibangsamu, nenniya mébbu assijancing sibawa Iyya ri laleng Bola-Ku.
16Pajaba-pajaba pamaréntana Yéhuda sibawa Yérusalém silaong sining pegawé saorajaé, imang-ngimangngé nenniya sininna jennang tanamu purani napaessa iyaro assijancingngé sibawa géré saping, nalétta’i mancaji duwa, sibawa joppa ri yelle’na iya duwa létta’éro. Iyakiya, nainappa tappinra pikkirang sibawa pakatuna-Ka. Ata-ata iya puraé mupaleppe situru sibawa cinnana mennang, muwalai paimeng sibawa passai untu’ mancaji atasi. Rimakkuwannanaro, Iyya, PUWANG, powadai makkedaé purano majjalékkaiwi parénta-Ku, sibawa dé’ muturusiwi sara-sara’na, saba’ dé’ mupaleppe’i pada-padammu bangsa Israélié. Nah, makkekkuwangngé Uwérékko alaluwasang: alaluwasang untu’ maté ri laleng ammusurengngé iyaré’ga ri saié iyaré’ga ri akkadérengngé. Ugaukekko matu pada-pada iko gaukengngi saping iya mugérééro. Uwébbui matu sininna bangsaé ri linoé marasa métau mitai aga iya Upogau’é lao ri iko.
17(34:16)
18(34:16)
19(34:16)
20Uwabbéréyakko matu lao ri bali iya macinnaé mpunoko. Naanréi matu ujumu manu’-manu’ sibawa olokolo masekkang.
21Zédékia arung Yéhuda sibawa sining pajaba pamaréntana Uwabbéréyangngi matu lao risining tau iya macinnaé mpunoi mennang. Uwabbéréyangngi matu mennang lao ri tentara Babél, iya salaiyékko makkekkuwangngé.
22Mabbéré-Ka matu tanra-tanrang kuwammengngi nalisu mennang ri kotaéwé, nainappa maggasa, pasittai, sibawa tunui. Kota-kotana Yéhuda Upancajiwi matu pada-pada padang kessi iya dé’é naonroiwi tauwé. Iyya, PUWANG, pura mabbicara."