Dual Panel1Ri séuwaé esso, mabbicarai PUWANGNGE lao ri Yunus, ana’ Amitai.
2Adan-Na, "Laono ri Niniwé, kota battowaéro, untu’ mancangngi, nasaba Uwissengngi mekkedaé maja senna’i pabbanuwana."
3Iyakiya mala Yunus joppai lao ri onrong laingngé untu’ mabélaiwi PUWANGNGE. Laowi ri Yopa, nanasitujuwangngi engka kappala iya maéloé lao ri Spanyol. Puranana nawaja tampana, ménré’ni ri kappalaé, nainappa sompe silaong ana’ kappala’é lao ri Spanyol, untu’ mabélaiwi PUWANGNGE.
4Nonnoni Yunus ri onrong iya kaminang mariyawaé nanaléwu kuwaro, namemme’na tinrona. Nainappa napapolé PUWANGNGE anginrajaé ri tompo’na tasi’é, nanakajajiyanna bombang maseroé, iya munruéngngi kappala’éro angkanna céddé ancuru. Métau senna’ni sining ana’ kappala’é sibawa gora-gora méllau tulung, tungke-tungke lao ri déwatana muto. Untu’ kurangiwi abalaé tallemme’é, nabuwanni mennang lurenna kappala’éro ri laleng tasi’é.
5(1:4)
6Wettunna nakodana iyaro kappala’é nonno ri yawa, naruntu’ni Yunus kuwaro mattengngang matinro. Nanakkeda, "Masa weddikko matinro ri laleng keadaang makkuwaéwé! Ayo, oto’no! Assempajanno lao ri déwatamu untu’ méllau tulung. Nigana missengngi mamaséi matu lao ri idi angkatta dé’ tabinasa."
7Ménré’nana Yunus sibawa nakodaéro ri yasé, makkedani sining ana’ kappala’éro ri padanna mennang, "Laono mai, taundiwi kuwammengngi taissengngi niga pasala angkanna nakennaki abalaéwé!" Naundini mennang, na asenna Yunus nakenna.
8Namakkeda mennang lao ri Yunus, "Tongegga iko nassabariwi abalaéwé? Polé kégako? Bangsa aga? Magi muwengka kuwaé?"
9Nappébali Yunus, "Tau Ibranika. Usompai PUWANGNGE, Allataala ri surugaé, iya pancajiyéngngi tasi’é sibawa pottanangngé."
10Nainappa nacurita pékkugiwi makkuraga lari polé ri PUWANGNGE. Naéngkalinganaro pédé métauni sining ana’ kappala’é, namakkeda lao ri aléna, "Macongeng senna pangkaukemmuro!"
11Napédé marajatona bombangngé, nainappa makkutana sining ana’ kappala’é lao ri aléna, "Aga harusu tapogau’ lao ri iko kuwammengngi nappésau iyaé bombangngé?"
12Nappébali Yunus, "Buwakka ri laleng tasi’é, pasti mappésau bombangngé. Saba’ uwissenni makkekkuwangngé, makkedaé iyya ritu nassabari bombang iya maseroéwé nakennako."
13Iyakiya makkuraga mupi sining ana’ kappala’é maggangka ullé untu’ mpiséi iyaro kappala’é lao ri pottanangngé. Iyakiya pédé majjallo towi bombangngé, angkanna usahana mennang siya-siyai simata.
14Rimakkuwannanaro gorani mennang lao ri PUWANGNGE, "Oh PUWANG, maréllauki, aja’ tabinasa nasaba malai nyawana tau iya dé’é napogau’ muwi asalang aga lao ri idi. Oh PUWANG, purani Mupogau’ aga iya Mupuwéloé."
15Nainappa naggenrungeng Yunus ri laleng tasi’é. Nappésauna iyaro bombangngé majjallo.
16Métau senna’ni iyaro sining ana’ kappala’é lao ri PUWANGNGE, namappottanannana, makkasuwiyanni mennang akkarobangeng sibawa majjanciyangngi maddupa-rupang passaleng lao ri PUWANGNGE.
17Napapoléna PUWANGNGE sikaju balé loppo iya memme’éngngi Yunus. Nanaonrona Yunus ri lalenna babuwana baléro tellungngesso tellumpenni.