Alkitab Mobile SABDA
[VER] : [GULLAH]     [PL]  [PB] 
 <<  1 Petrus 1 >> 

1A Peter, a postle ob Jedus Christ, da write ta oona, wa God done pick. Oona been scatta all oba de arie dem call Pontus, an Galatia, an Cappadocia, an Asia an Bithynia. Oona da lib like come-yah people een all dem arie oba deyso.

2We Fada God done pick oona, jes like e done beena plan. An God Sperit mek oona fa be God own holy people, so dat oona gwine do wa Jedus Christ tell oona fa do. An de blood ob Jedus, wa e gii wen e dead pon de cross, dat gwine mek oona clean een God eye. A da pray dat God bless oona mo an mo an full op oona haat wid peace.

We Lib Full op wid Hope

3Leh we praise God, de Fada an God ob we Lawd Jedus Christ! Cause God hab mussy pon we fa true, e mek Jedus Christ git op fom mongst de dead people an lib gin fa gii we nyew life. Dat mek we lib full op wid hope, cause we got life wa ain neba gwine end.

4An so, we da look fa git de great blessin dem wa God promise e chullun. E da keep um een heaben fa oona. Dem blessin yah gwine las faeba an eba. Dey ain neba gwine be ruint. An dey ain neba gwine change.

5Cause oona trus een God, e gwine keep oona safe wid e powa. E da keep oona safe til dat sabation come ta oona wa God been mek ready an wa e gwine show ta oona een de las time.

6Cause ob dis, oona rejaice, eben ef now fa a leetle wile all kind ob test da mek oona suffa.

7Dem testin yah, dey come fa test oona, fa show dat oona trus een Jedus Christ fa true. People pit gole, wa dey kin stroy, eenta de fire fa test um an bun off all dat ain gole fa true. Same way so, oona fait, wa walyable way mo den gole. Dem trouble wa da mek oona suffa so, dey come fa test oona fait so oona kin show dat oona ain neba gwine stop fa trus een Christ. An ef oona neba stop trus fa true, dat gwine bring praise an glory an hona, wen de Day come dat Jedus gwine come mek all people shim.

8Oona ain neba see Jedus. Stillyet, oona lob um. Oona ain shim now. Stillyet, oona bleebe pon um. An oona got joy full op wid glory. Oona got sommuch joy dat oona ain able fa find nuff wod fa tell bout oona joy.

9Cause now de haabis ob oona fait een Christ da come ta oona. God da sabe oona soul.

10De prophet dem beena taak fohan bout dis sabation, dis blessin yah wa God een e lob plan fa gii oona, way fo e gim. Dey beena study pon um good fashion an tek time fa look good fa know bout um.

11Christ Sperit been dey eenside dem prophet. Dat Sperit een um beena taak fohan bout how Christ gwine haffa suffa, an bout de glory wa gwine come atta dat. An dem prophet beena try fa know wa time dem ting gwine come an how dey gwine happen.

12God show dem prophet yah dat de wok dey beena do ain fa hep deysef, bot fa hep oona. Dat de wok wa dey done wen dey taak bout dem ting dat oona yeh now, wa dem wa da tell people de Good Nyews, come tell oona. De Holy Sperit, wa God sen outta heaben, e da mek dem people yah able fa tell people de Good Nyews. An dem ting yah de angel too wahn fa ondastan.

People wa Trus een Christ Mus Lib God Way

13So den, mek op oona mind fa do waeba oona oughta do. Mus nyuse oona sense fa trol oonasef, an set all oona haat pon de blessin dat Jedus Christ gwine gii oona, wen e come back fa all people fa see.

14Oona God chullun, an mus lib da do all God tell oona fa do. Mus dohn folla atta dem bad ting oona beena wahn fa do fo, wen oona ain know de Good Nyews bout Jedus Christ yet.

15Steada dat, mus lib holy een all oona da do jes like God, wa call oona fa be e own, e holy fa true.

16Cause dey write een God Book dat God tell e people say, “Mus lib holy, cause A holy fa true.”

17Wen oona da pray ta God, oona call pon um say, “We Fada.” E God, an e da jedge all people de same way, ebrybody by de wok e da do. So den, all de time wa lef fa oona een dis wol, mus spec an hona God een all dat oona da do.

18Oonasef know fa true how God set oona free fom de way ob life wa ain wot, dat life wa oona ole people beena lib an wa oona beena lib too. Wen God set oona free, e ain nyuse nottin dat dey kin stroy, like silba o gole.

19God set oona free by Christ own blood wen e dead pon de cross. Dat walyable mo den all. An Christ been like a lamb wa ain got nottin wrong o bad tall bout um.

20Fa sho, fo God mek de wol, e done pick Christ fa do dis wok een de wol, an now, een dese las day dem, Christ come fa oona sake.

21Cause ob Christ, oona trus een God, wa done mek Christ git op fom mongst de dead people an lib gin. An God gim glory fa true. So den, dat mek oona trus God an set oona haat pon um, da know dat e gwine do wa e promise e gwine do.

22Now dat oona da do wa de true wod tell oona fa do, dat mek oona stop fa do bad an mek oona lib clean life. An cause ob dat, oona lob oona Christian bredren fa true. So den, mus lob one noda, fa real, wid all oona haat.

23Cause God wod, wa da gii life an wa gwine las faeba, done mek oona git nyew life. Oona done been bon gin, an God wod wa mek oona bon gin gwine lib faeba. E ain tall like de one wa bon oona de fus time, wa gwine dead.

24Cause dey write een God Book say, “All people jes like wile grass, an all wa fine bout um same like dem flowa wa da grow pon de grass. De grass gwine wida, an de dry flowa gwine faddown pon de groun.

25Bot de wod ob de Lawd gwine las faeba.” Dis wod yah de Good Nyews bout Jedus Christ wa dey beena tell oona.


  Share Facebook  |  Share Twitter

 <<  1 Petrus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran