Dual PanelGod Laan E Own People
1Now den, A, Peter, da taak ta de choch leada mongst oona, dem wa we call elda. A too a choch elda. A tdone see wa Christ suffa, an wen Christ come back an God mek all people see e glory, A too gwine git paat ob dat big blessin dey. A chaage oona, de choch elda, wid all me haat.
2Tek cyah ob God people wa e gii oona fa tek cyah ob. Tek cyah ob um same like shephud dem da mind dey flock ob sheep. Mus dohn do dat like as ef oona haffa do um. Tek cyah ob um wid open haat cause oona wahn fa do um. An mus dohn do um cause oona hab de big eye fa money, bot cause oona heppy fa true fa saab um.
3Mus dohn treat dem people yah wa God gii oona fa tek cyah ob, like slabe. Steada dat, oona oughta do good sommuch til de people deysef wahn fa be jes like oona.
4Den wen Christ, oona head shephud wa oba all oda shephud, appeah, e gwine gii oona de crown ob glory wa las faeba.
5Now den, oona wa nyoung, same way, oona mus do wa dem wa mo ole, tell oona fa do. An all oona een de choch mus dohn hab de big head no way, as oona da saab one noda. Cause dey write een God Book say, “God ton e back ginst dem wa hab de big head, bot e gwine show dem wa ain hab de big head e mussy fa true.”
6Mus dohn hab de big head. Steada dat, pit oonasef onda God wa got powa, an leh um trol oona. Den e gwine pit oona op high an mek people spec oona, wen de good time wa e done cide, come.
7Leabe all dem ting wa da warry oona een God han, cause God da cyah bout oona.
8Be ready fa waeba gwine come. An all de time, watch out. Oona enemy, de Debil, da waak all roun, same like a lion wa bex. E da try fa find who e gwine stroy.
9Oona mus stan scrong ginst um, an trus Christ mo an mo. Cause oona know dat all oba de wol dem wa trus een Christ same like oona trus, dey too da suffa jes like oona.
10An atta oona suffa fa a leetle wile, God wa da gii we e blessin een all ting an wa call oona fa git paat ob e glory wa gwine las faeba, cause oona come fa be one wid Christ, God gwine mek all ting een oona life be jes like how dey oughta be. E gwine hep oona fa keep on da trus mo an mo an gii oona scrong haat fa um. E ain neba gwine leh nottin shake oona fait een Christ.
11Leh God rule oba all faeba an eba! Amen.
De Las Wod ob Peter een Dis Letta
12Silas da hep me write dis shot letta ta oona. E a Christian broda wa A know A kin trus. A wahn fa courage oona an tell oona dat dis wa A done write bout yah, e God blessin pon we fa true. Mus dohn leh nottin keep oona fom stan scrong een dat fabor ob God.
13E wa dey een Babylon, wa God done pick same like e pick oona, e da tell oona hey. An Mark, me son een de Lawd, da tell oona hey, too.
14Greet one noda wid de kiss ob Christian lob. Leh all ob oona wa blongst ta Christ hab peace dey een oona haat.