Alkitab Mobile SABDA
[VER] : [GULLAH]     [PL]  [PB] 
 <<  1 Tesalonika 2 >> 

De Wok ob Paul een Thessalonica

1We bredren, oona know dat wen we come fa see oona, dat been a good ting, fa sho.

2Oona know how de people een Philippi done mek we suffa an shrow slam at we fo we got ta oona een Thessalonica. Den, eben dough plenty people try fa stop we, stillyet God hep we da courage we so we kin tell oona e Good Nyews.

3Cause wen we beena try fa win oona oba ta Christ, nobody ain ceebe we bout um. We come fa tell bout um fa true fom we haat. An fa sho, we ain try fa ceebe nobody.

4Steada dat, we all de time da tell people jes wa God wahn we fa tell um. God gii we dis wok fa tell de Good Nyews cause e see dat e kin trus we fa be sponsible fa do um like e wahn we fa do. We ain try fa do wa people wahn we fa do. An God da look at wa dey een we haat.

5Oona know fa true dat wen we taak ta oona, we ain neba sweet mout nobody. We ain neba tell oona no sweet story, same time we hab de big eye an hope dat oona gwine gii we sompin. We ain do dat, an God know wa dey seen we haat.

6We ain beena try fa mek oona, needa no oda people praise we. Stillyet we coulda aks oona fa do ting fa we, cause we Christ postle, so we got de right fa aks. Bot we ain aks oona fa nottin.

7Jes like a nursin modda tek good cyah wen e tend ta e chullun, same fashion we beena tek cyah an been real kind wen we been wid oona.

8Cause ob we lob fa oona, we been heppy fa come gii oona de Good Nyews ob God. We eben been heppy fa gii oona we haat, da do all dat we kin fa oona. We lob oona dat much!

9We bredren, fa sho, oona memba how we beena wok long an haad! We beena wok haad day an night, so dat we ain been no boddarashon fa oona, wiles we beena tell oona de Good Nyews ob God.

10Oona know, oona wa bleebe pon Christ, how we beena do wen we been dey wid oona. An God know dat too. We life dey been holy, like God wahn um fa be. E been scraight an clean, so ain nobody kin blame we bout nottin.

11Oona know dat we beena treat ebry one ob oona jes like a fada kin treat e own chullun. We beena courage oona. Wid all we haat we waan oona an we beg oona.

12We beg oona fa keep on da waak een de way wa fit fa God people fa waak, de way God wahn oona fa waak. Cause God call oona fa be e own people dat e da rule. An e call oona fa git oona paat ob de glory dat e got.

13An dey noda reason we tell God tankya all de time. Wen we come an tell oona God wod, oona pay mind ta um. An oona ain tek um fa be wod wa people bring, bot oona tek um fa be God wod. E God wod fa true, an dat wod da wok eenside oona haat, oona wa bleebe.

14Me bredren, de same ting wa been happen ta de people ob God choch dem wa blongst ta Christ Jedus een Judea, dem ting been happen ta oona too. Jes like de Jew people beena mek God people een Judea suffa, same way so, oona own countryman dem beena mek oona suffa.

15Dem people, de Jew people yah, dey done kill de Lawd Jedus an de prophet dem too. An dey beena mek we suffa, da mek we go way fom dey. Dey mek God bex wid um tommuch! Dey enemy ta all people.

16Cause dey try fa keep we fom tell God wod ta de people wa ain Jew so dat God kin sabe um. Een dis way, dem people ob Judea all de time da full op wid sin, full as kin be. Dey ain neba stop fa sin. Bot now at las, God bex tommuch wid um an e done condemn um!

Paul Wahn fa See de Christian Dem een Thessalonica

17We bredren, fa all ob de shot time since we been haffa lef oona, we been missin oona fa true. Bot we da tink bout oona all de time. E jes dat we body ain dey wid oona. An so we beena try real haad fa come see oona.

18We beena wahn fa come see oona. A, Paul, beena try oba an oba gin fa come ta oona, bot Satan stop we fom come.

19Ain oona mek we hab hope an joy? Ain oona de crownin glory ob we wok wa gwine mek we heppy wen we stanop fo we Lawd Jedus Christ, wen e come back? Dat de trute, fa sho!

20Yeah, dat so e stan. Oona we pride an joy!


  Share Facebook  |  Share Twitter

 <<  1 Tesalonika 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
© 2010-2022
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran