Dual PanelPaul Show Dat E da Do Right
1A, Paul, da beg oona een de name ob Christ, wa kind an always beah wid people. Dey say A da taak low wen A dey wid oona, bot wen A ain dey close ta oona, A got plenty mout.
2A da beg oona dat wen A come ta oona, oona ain gwine mek me fa hab scrong mout mongst oona, like A plan fa do mongst some people wa tink dat, we da waak een de way ob de wol.
3Fa true, we da lib een de wol, bot we ain fightin dis waa ginst ebil like people ob de wol da fight.
4De weapon dem wa we tek fa fight wid, dey ain wa people ob dis wol fight wid. We got weapon wa got powa fom God fa stroy de scrong place dem ob de enemy.
5We da nyuse dem weapon fa show dat de aagyment dem dat people da aagy bout God, dey ain mek no sense. We da stroy ebryting wa people wa tink dey high op da nyuse fa keep people fom know bout God. We da nyuse dem weapon fa mek people stop fa tink ting wa mek um go ginst God way, so dey change een dey haat an wahn fa do wa Christ wahn um fa do.
6An wen fa true oona do all wa oona oughta do, we gwine be ready fa punish whosoneba ain da do wa e oughta do.
7Oona da look jes at wa people see. Ef somebody dey wa da tink dat fa sho e blongst ta Christ, leh um memba dat jes like e blongst ta Christ, same fashion we blongst ta Christ.
8A ain gwine be shame eben ef A taak a leetle tommuch bout de tority de Lawd gii we. E sen we fa come hep oona grow op een Christ. E ain sen we fa stroy oona.
9A ain wahn oona fa tink dat A da write oona dem letta fa mek oona real scaid.
10Some people da taak say, “Paul da write haad ting full ob powa een dem letta yah wa e sen we. Bot wen e yah wid we, e ain look like e got no powa tall, an e taak ain mount ta nottin.”
11Ef people da taak dat way, leh um ondastan dat wa we write een we letta wen we ain dey wid oona, dat de same ting we gwine do wen we dey wid oona.
12Oona know dat we ain gwine be scrong mout nuff fa compare wesef wid some ob dem wa tink dey mo betta den oda people. Fa true, dey ain got sense! Dey jes da compare deysef wid one noda, an dey da jedge deysef jes by wasoneba dey tink right.
13Bot we ain gwine taak bout no good ting dat we ain oughta taak bout. We gwine taak jes bout de wok God gii we fa do, an paat ob dat da we wok mongst oona.
14So we ain do nottin mo den wa we oughta do wen we come ta oona. We been de fus fa git ta oona an tell oona de Good Nyews bout Christ.
15We ain taak bout de good wok wa oda people done do, wok wa ain paat ob wa God gii we fa do. Bot we wahn fa see oona trus een God mo an mo, so dat as oona da trus um mo an mo, we wok mongst oona gwine grow mo an mo.
16Den we gwine be able fa go ta de lan dem oba yonda, pon ta da side ob weh oona dey an tell all de people dey, de Good Nyews. Cause we ain wahn fa taak bout de good wok wa oda people done do een dem lan weh God sen um.
17Like dey write een God Book say, “Ef somebody wahn fa taak bout de good wok wa been done, leh um taak bout de good wok dat de Lawd done do.”
18Cause de one wa taak bout esef, da say e da do good, dat one ain gwine git praise. De one wa de Lawd say da do good,dat de one wa gwine git praise fa true.