Dual PanelDe Ting Dem wa God Show Paul
1A haffa go on da taak bout de good ting A done eben dough A ain got nottin fa gain da do dat. Bot now A gwine taak bout de bision dem wa de Lawd show me an ting wa e mek me know.
2A know one Christian man wa been tek op op real quick eenta de tird heaben. Foteen yeah done pass now fom wen dat happen (A ain know ef dat man body gone op eenta heaben o ef jes e sperit gone op dey, bot God know).
3A say gin, A know dat dis man been tek op real quick eenta de place dey call Paradise (A ain know ef de man body gone op dey o ef jes e sperit gone op, bot God know).
4Op dey e yeh ting dem wa nobody ain able fa tell an wa nobody ain spose fa taak bout.
5A gwine taak good bout dis man yah. Bot A ain gwine taak good bout mesef, cep A taak jes bout dem ting wa show dat A ain able fa do nottin by mesef.
6Eben ef A wahn fa taak bout de good A done, A ain gwine be no fool. Cause A been gwine taak wa de trute fa sho. Bot A ain gwine taak bout mesef. Cause A ain wahn fa mek people tink dat A a betta poson den de kind ob poson dat de wod wa A da say an de ting wa A da do, show dat A be.
7Bot so dat de lotsa wondaful ting ob God wa A see, ain mek me git de big head, A been git sompin wa feel like a thorn een me body, wa da hut me bad. Dat Satan messenja wa come fa beat pon me so dat A ain gwine be proud.
8Shree time A done pray an aks de Lawd say, please tek way dis ting yah fom me.
9De Lawd ansa say, “De blessin wa A da gii ya, dat all wa ya need. Cause wen somebody ain able fa do nottin fa esef, dat de time wen me powa mo big den all, een dat poson life.” So A mo heppy fa taak bout wa A cyahn do by mesef, so dat de powa ob Christ kin mek e home een me.
10So den, fa sake ob Christ, A heppy fa suffa. A heppy wen A weak an wen people shrow slam at me. A heppy wen haad time come pon me an wen people fight ginst me an A got all kind ob trouble cause ob Christ. Cause de time wen A ain able fa hep mesef, dat de time wen A no scronga fa true.
Paul Wahn fa Hep de Christian Dem
11A da taak like a fool, bot oona been mek me do dat. Fa true, oona oughta beena taak good bout me. Cause dem “super postle” ain no mo betta den me, eben dough A ain nobody.
12Dem sign wa show dat A a postle fa true, dat wa A done wiles A beena beah wid oona, wen A wok dey. Dey been sign an miracle an mazin wok weh God show e powa.
13Fa true, A ain treat dem oda choch people no betta den A treat oona, cep dat A ain warry oona fa hep me, ainty? Paadon me fa do oona wrong like dat!
14Now de tird time A ready fa come wisit oona, an A ain gwine aks oona fa nottin. Cause A come fa hep oona. A ain wahn oona money. Atta all, chullun ain oughta sabe op fa gii dey modda an fada wa dey need. De modda an de fada, dey de one dem wa oughta sabe op fa gii dey chullun wa dey need.
15A gwine be heppy fa gii oona all dat A got, an gii oona mesef too, fa hep oona. Cause A lob oona mo, oona ain oughta lob me no less, ainty?
16So den, oona gwine gree wid me dat A ain been no bodda ta oona. Bot somebody gwine say A da play trick pon oona an lie ta ketch oona!
17A ain neba tek adwantage ob oona wen A sen messenja dem fa go ta oona, ainty?
18A done beg Titus fa go ta oona, an A sen we oda Christian broda wid um. Oona ain wahn fa tell me dat Titus done tek adwantage ob oona, ainty? We two been do de wok een de same sperit an een de same way, ainty?
19Could be dat oona beena tink all dis time dat we jes beena try fa mek oona tink we da do right. Dat ain so. We beena taak fo God, da say wa Christ wahn we fa say. Oona we deah fren, an all wa we do, we da do fa mek oona mo scronga een de fait.
20A scaid dat wen A come dey, could be dat A gwine see dat oona diffunt fom how A wahn oona fa be, an oona gwine see dat A diffunt fom how oona wahn me fa be. A scaid dat A gwine see dat some ob oona dey da tek side an aagy wid one noda, dat oona jealous an git real bex wid one noda. A scaid dat some dey da try fa git all ting jes fa deysef an shrow slam an onrabble dey mout bout oda people. An A scaid dat some dey, all de time tink dey mo betta den oda people an git ebrybody all mix op ginst one noda.
21A scaid dat wen A come gin ta oona, God gwine mek me feel small fo oona. An A scaid A gwine weep fa lotsa people wa beena sin fo, bot dey ain saary an dey ain change dey way. Dey ain lef off dey loose life an de bad bad sin dey beena keep on da do.