Dual Panel1A, Paul, long wid Silas an Timothy, da write dis letta ta de people ob de choch een Thessalonica, wa blongst ta we Fada God an ta de Lawd Jedus Christ.
2We da pray dat we Fada God an we Lawd Jedus Christ bless oona an gii oona peace een oona haat.
God Gwine Jedge de Wol Wen Jedus Come Back
3We Christian bredren, we mus tell God tankya all de time fa oona. Dat right fa we fa do, cause oona trus een Christ da grow mo an mo scronga, an ebry one ob oona da lob one noda mo an mo, too.
4Cause ob dat, we kin be heppy fa taak bout oona all de time ta de people een dem oda choch ob God people. We kin taak bout how oona still keep on da trus een Christ an oona still da beah op onda all dat people mek oona suffa an de bad trouble wa come oona way.
5All dis show fa true dat God jedge all people jes like e oughta jedge um. Cause ob all dat oona da suffa cause oona da leh God rule oba oona, God gwine say dat oona fit fa lib weh e da rule.
6God gwine do wa right. Dem people wa da mek oona suffa, God gwine mek dem suffa too.
7An oona wa da suffa now, God gwine tek way oona misery an e gwine tek way we misery too. God gwine do dat wen de Lawd Jedus gwine come fom heaben wid e powaful angel dem.
8Wid flamin fire, e gwine come fa punish de people wa ain gii God no place een dey haat an ain pay no mind ta wa de Good Nyews bout we Lawd Jedus tell um fa do.
9God gwine punish um wid ebalastin ruint an suffrin. E gwine shet um out fom weh de Lawd dey. Dey ain neba gwine see de glory ob de Lawd powa.
10Wen e gwine come back dat Day, e gwine come fa git hona an praise fom all de people wa blongst ta um, all dem wa bleebe pon um. An oona too gwine jine um, cause oona been bleebe wa we tell oona.
11Dat mek we all de time pray fa oona. We da pray ta we God, da aks um fa mek oona fit fa lib de life dat e call oona fa lib. We pray dat by e powa, e gwine leh oona do all de good ting oona wahn fa do an finish all dem ting dat oona beena do, cause oona bleebe pon um.
12Ef oona do dat, oona gwine mek people gii hona ta we Lawd Jedus, an we Lawd Jedus gwine mek people hona oona, cause ob de blessin ob we God an de Lawd Jedus Christ.