Dual Panel1A, Paul, wa een de jailhouse fa sake ob Jedus Christ, an we Christian broda Timothy, da write ya, Philemon, we deah Christian broda wa da hep we een de wok.
2A da write too ta ya, Apphia, we Christian sista, an ta ya Archippus, wa da wok long wid we een de fight. An A da write ta de Christian people dem ob de choch wa meet dey een ya house, Philemon.
3We da pray dat God we Fada an we Lawd Jedus Christ bless oona an gii oona peace een oona haat.
De Lob an Trus ob Philemon
4All de time wen A da pray fa ya, A da tell me God tankya fa ya.
5Cause A yeh dat ya lob all God people an ya keep on da trus een de Lawd Jedus.
6A da pray dat de fait dat oona hab een de Lawd Jedus gwine hep oda people fa ondastan mo an mo bout de blessin dat God da gii we wen we one een Christ.
7Wen A yeh how ya lob God people, A beena rejaice an A tek courage fa true. Cause me Christian broda, ya beena mek de haat dem ob God people glad.
Paul Aks Philemon fa Gii Onesimus Haaty Welcome
8So den, eben dough A got de tority fa chaage ya fa do wa ya oughta do, cause A Christ postle,
9stillyet, cause ob ya lob, A ain gwine do dat. A jes da aks ya, eben dough A Paul done ole an now A een de jailhouse fa sake ob de wok dat A beena do fa Christ Jedus.
10A da aks ya fa sake ob Onesimus, wa God done mek me own chile een Christ. Cause wiles A been een de jailhouse yah, A bring um fa trus een Christ.
11Onesimus ain been no hep ta ya, bot now e kin hep ya an e kin hep me too.
12A da sen um back ta ya. A lob um sommuch dat e jes like me haat da gwine wid um.
13A woulda like fa keep um wid me yah so dat e coulda hep me een place ob ya now wen ya ain wid me, wiles A een de jailhouse fa sake ob de Good Nyews ob God.
14Bot A ain keep um wid me yah, cause A ain know ef ya been fa gree fa um fa stay wid me. A ain wahn fa mek ya hep me een dis. A wahn ya fa hep me jes ef ya wahn fa hep me.
15Maybe God leh Onesimus leabe ya fa leetle wile, so dat ya kin hab um back faeba.
16An e ain gwine come back ta ya jes like a slabe no mo. E mo den dat now. E ya deah Christian broda wa da come back ta ya. A lob um fa true, bot fa sho, ya gwine lob um mo den me now. Cause e da wok fa ya, an mo den dat, e ya deah broda een de Lawd.
17So den, since ya know dat we one een Christ, da wok togeda, ya oughta gii Onesimus haaty welcome, jes like ya been fa gii me haaty welcome.
18Ef e done do ya wrong o ef e owe ya sompin, chaage me fa dat.
19A Paul da write dis yah wid me own han. A gwine pay ya back waeba Onesimus da owe ya. A ain gwine taak bout de debt dat ya owe me. Ya owe me eben ya own sef.
20Yeah, me broda, do me dis fabor, fa sake ob we Lawd. A ya Christian broda. Mek me haat glad.
21Wiles A da write ya dis, A sho dat ya gwine do wa A aks ya fa do. A know dat ya gwine do eben mo den wa A aks ya fa do.
22One oda ting, A wahn ya fa git a room ready fa me. A da look fowaad, cause ob de pray dat oona all da pray ta God fa me, dat e gwine git me outta dis jailhouse so dat A gwine be able fa come ta oona gin.
De Las Greetin
23Epaphras, wa long side me een de jailhouse yah fa sake ob Christ Jedus, e tell oona hey.
24Mark, Aristarchus, Demas an Luke wa all da wok togeda long side me, dey tell oona hey too.
25A pray dat de Lawd Jedus Christ gwine bless all ob oona.