Alkitab Mobile SABDA
[VER] : [GULLAH]     [PL]  [PB] 
 <<  Galatia 5 >> 

Christ Done Set We Free

1Christ mek we free so dat we could be free people fa true. So den, leh we stan scrong an lib de way free people oughta lib. Mus dohn leh people mek oona lib like slabe gin.

2Now A, Paul, da tell oona say, ef oona gree fa leh um circumcise oona, dat mean dat wa Christ do fa oona ain wot nottin ta oona. Oona yeh wa A say?

3A da waan oona gin say, ef a man gree fa leh um circumcise um, dat man mus do all de ting dat de Jew Law say.

4Oona wa da tink dat ef oona do wa de Jew Law say, den all ting gwine be right twix oona an God, oona done ton oona back pon de blessin dem dat God wahn fa gii oona.

5Fa we own paat, we da look fowaad ta wa we know gwine happen. God gwine mek all ting right twix we an esef. We da wait fa dat. God Sperit da hep we. An cause we trus een Christ, we da keep on.

6Wen we one wid Jedus Christ, ef we git circumcise o ef we ain git circumcise, dat ain mean nottin tall. Bot de ting wa matta mo den ebryting else, dat we trus een Christ. An people gwine see dis wen dey see how we da show lob ta oda people.

7Oona beena do real well wen oona beena keep on da trus een Christ mo an mo. Whodat mek oona stop do dem ting dat God tell oona fa do? Wa ting dat one do fa change oona haat?

8Fa sho, God wa call oona ta esef ain change oona haat dat way.

9Like people say, “E jes a leeleetle bit ob yeast wa somebody tek fa mek lotsa bread.”

10Cause we all be jine togeda wid de Lawd, A know dat oona ain gwine gree wid wa some oda poson da tell oona, bot wid wa A tell oona. An God gwine jedge dat one wa da git oona opsot. Ain mek no diffunce who e da.

11Me Christian bredren, look at me own trouble yah. Ef like dey say, A still beena tell people dat dey haffa git circumcise, hoccome dey keep on da mek me suffa so? Ef fa true A beena tell um dat dey haffa git circumcise, den people ain oughta still mek trouble wen A tell um bout wa Christ dyin pon de cross mean.

12A wish dat de people wa da mek oona opsot would go all de way an cut deysef off fom oona an lef oona ta oonasef.

13Me Christian bredren, Christ been call oona fa come ta um fa mek oona free. Bot jes cause oona free now, mus dohn tink oona kin leh oonasef do jes waeba oona sinful haat wahn fa do. Steada dat, oona mus hep one noda, cause oona lob one noda.

14Cause all de Jew Law togeda come ta jes one law wa say, “Oona mus lob oda people jes like oona lob oonasef.”

15Bot ef oona keep on like wile animal, da fight an gii one noda pain an suffrin, den oona mus look out, cause oona gwine stroy one noda altogeda.

Oona Oughta Lib da Do wa de Holy Sperit Tell Oona fa Do

16A da tell oona say, “Oona oughta keep on da lib een de way God Sperit tell oona fa lib. Den oona ain gwine do jes waeba oona sinful haat wahn fa do.

17Wa we people wahn een we sinful haat ain tall wa God Sperit wahn. An wa God Sperit wahn, dat ain wa we people wahn. Wa God Sperit wahn an wa we sinful haat wahn, dem two always fightin one noda. Dis mean dat oona ain do wa oona wahn fa do.

18Bot ef oona keep on da lib een de way God Sperit tell oona fa lib, den de Law ain rule oba oona tall.

19Ain nobody dat cyahn see wa people een dey sinful haat wahn fa do. People wahn fa lib loose an bad life wa ain decent.

20People wahn fa woshup op ta idol, dem ting wa people mek fa woshup op ta, an dey hoodoo one noda. Dey hate one noda an fight one noda. Dey cobish dey neighba propaty an git mad op wid one noda. Dey da pit deysef head ob oda people. Dey separate eenta group an ain gree wid one noda.

21Dey cobish. Dey dronka, an dey hab wile paaty. An dey do lotsa oda bad ting like dem yah. A da waan oona jes like A waan oona fo, dem people dat lib dat way ain neba gwine hab de joy ob hab God rule oba um.

22Bot God Sperit da mek people good like a tree grow good fruit. God Sperit da mek people lob one noda. E da mek um hab real joy een dey haat. E da mek um gree wid one noda. E da mek um able fa beah trouble, an e da mek um hep one noda. E da mek um do good ta one noda. An e da mek um able fa do wa e wahn um fa do.

23God Sperit da mek people so dat dey ain push one noda roun. An e da mek um so dat dey ain do jes wa dey wahn fa do. Dey ain no law dat taak ginst people wa lib dis way.

24Dem people wa blongst ta Christ Jedus done stop fa leh dey own sinful haat rule oba um. Dey done dead ta deysef like somebody wa dead pon a cross. Dey ain do all dem bad ting no mo, dem ting wa dey own sinful haat wahn um fa do.

25God Sperit gii we life. So den we mus leh um da tell we de way we oughta lib.

26We ain oughta git de big head, an we ain oughta mek oda people bex wid we. Fodamo, we mus dohn cobish ting wa one noda got.


  Share Facebook  |  Share Twitter

 <<  Galatia 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel