Dual PanelDe Cripple Op Man Git Heal
1Bout shree o'clock een de ebenin, de time wen de Jew people gone fa pray, Peter an John da waak ta God House fa pray.
2Some people beena tote one man wa ain been able fa waak eba since e been bon. Ebry day dem people beena cyaa um, an lef um close ta de gyate ta God House. Dat gyate dey call de “Beautiful Gyate” cause e been so purty. Dey beena lef dat man dey fa beg fom de people wa pass by fa go eenta God House fa pray.
3Wen de cripple op man see Peter an John da go eenta God House, e beg um fa gim money.
4Peter an John look dat man dead een e eye. An Peter tell um say, “Look at we!”
5So de man pay mind ta Peter an John an look at um, cause e beena tink dey been gwine gim sompin.
6Peter tell um say, “A ain got no money, no silba o gole. Bot A gwine gii ya wa A got. Een de name ob Jedus Christ wa come fom Nazareth, by e powa, git op an waak!”
7Peter tek de man right han an hep um git op. Same time de man foot dem git scronga.
8E jomp op an staat fa waak. Den e gone wid Peter an John eenta God House. An e da waak an da jomp an da praise God.
9All de people shim wen e da waak an da praise God.
10An dey know dat de same man wa beena seddown close ta de Beautiful Gyate ob God House an beg. Dem been stonish an scruck tommuch wen dey see wa done happen ta de man.
Peter Taak ta de People wa Come fa Look
11De man wa jes git heal da hole on ta Peter an John. An all de people been stonish. Dey ron ta weh de man been wid Peter an John een de place dey call “Solomon Porch.”
12Wen Peter see de people, e tell um say, “Me countryman ob Israel, hocccome oona so stonish cause dis man done git heal? Hoccome oona da look so haad at we? Oona tink dat we done mek dis man well cause ob we own powa o cause we so good, ainty?
13Bot de God ob we ole people leada dem, Abraham, Isaac an Jacob, dis same God done gii glory ta e saabant, Jedus. Fo dat, oona done han Jedus oba ta Pilate fa leh um kill um. An Pilate been mek op e mind fa leh Jedus go free, bot oona ton ginst Jedus.
14Jedus waak scraight wid God an blongst ta um, bot oona ton ginst um. An oona beg Pilate fa kill Jedus an leh noda man wa kill people go free fa oona.
15So oona done kill Jedus, de one wa da gii life. Bot God mek um git op fom mongst de dead people an lib gin. We see Jedus wid we own eye atta e come outta e tomb.
16Jedus powa mek dis man well an scrong. Wa oona see an wa oona know done happen yah cause we trus een Jedus name. Oona shim an oona know um. Jedus powa done mek dis man all well. Oona all shim.
17“Now den, bredren, A know oona an oona leada dem ain ondastan wa oona beena do wen oona kill Jedus.
18Bot dat de way God mek dat ting come true dat e say way back dey. Cause e mek all de prophet dem tell de people say dat e Christ haffa suffa.
19So oona mus ton fom oona sin an come ta God. Den God gwine paadon oona fa all oona sin an tek um all way.
20Wen oona do dat, God, we Lawd, gwine wok eenside oona haat fa mek oona fait mo scronga. An e gwine sen de Messiah wa e done pick fa sabe oona. Dat Jedus esef.
21Jedus haffa stay dey een heaben til de time gwine come fa God fa mek all ting nyew, jes like God been promise way back dey shru e prophet dem.
22Moses been tell de people say, ‘God oona Lawd gwine sen oona a prophet same like e sen me. An dat prophet dey gwine come fom oona own people. Oona mus pay mind ta all wa e tell oona.
23Ebrybody wa ain pay mind ta wa de prophet tell um, God gwine tek dat one way fom mongst de people an stroy um.’
24All de prophet dem, Samuel an all dem prophet atta Samuel wa done been tell bout God, dey all tell bout dis time now.
25Dem ting wa God promise we, wa dem prophet tell bout, dem ting fa oona. Oona hab oona paat een dat blessin, wa God promise wen e mek a cobnant wid oona ole people. E tell Abraham say, ‘A gwine mek oona chullun chullun a blessin ta all de people een de wol.’
26Wen God sen Jedus, e saabant, eenta dis wol, God sen um ta oona, de people ob Israel, fus. E sen um fa bless oona, fa tell bout God so dat all ob oona could ton fom oona wickity way.”