Dual PanelWa Gwine Happen Ef Oona Dohn Change Oona Way
1Dat same time, some people wa been dey tell Jedus bout dem people fom Galilee. Dem de one wa Pilate, de Roman Gobna, gii orda fa kill. An e kill um wiles dey beena offa op sacrifice fa woshup God.
2Jedus ansa um say, “Oona tink dat dem Galilee people wa Pilate kill, dey dead like dat cause dey done ebil mo den all de oda res ob de people een Galilee, ainty?
3No, A tell oona, e ain so! An ef oona dohn change oona sinful way, oona gwine git kill op jes like dem.
4An oona memba bout dem eighteen people ta Siloam, wa git kill op wen de towa fall on top um? Wa oona tink bout dat? Oona tink dat dey dead like dat cause dey done ebil mo den de oda res wa lib een Jerusalem, ainty?
5No, A tell oona, ef oona dohn change oona sinful way, oona gwine git kill op jes like dem.”
De Paable Bout de Tree wa Ain Beah Nottin
6Jedus tell um a paable. E say, “One man hab fig tree wa da grow een e gyaaden. Ebry now an den e beena come look op een um fa find fig, cep no fig ain neba been dey een dat tree.
7So e tell e gyaadena say, ‘Dis yeah mek shree yeah een a row dat A beena come look op een dis tree fa find fig. Bot A ain neba find none dey. E ain wot nottin. Mus chop um down! Ain mek no sense fa waste de groun.’
8Bot de gyaadena beg um say, ‘Sah, do please, lef de tree dey jes til nex yeah. A gwine dig roun um an pit fertiliza ta um.
9Ef de tree beah fig nex yeah, well an good. Bot ef e ain beah no fig, ya kin tell me fa chop um down.’”
Jedus Heal a Cripple Op Ooman pon de Woshup Day
10One Jew Woshup Day, Jedus beena laan de people een one de Jew meetin house.
11One ooman been dey wa hab a ebil sperit dat done mek um sick fa eighteen yeah. Cause ob dat, de ooman been bend oba. An e ain able fa stan op scraight, eben a leetle bit.
12Wen Jedus shim, e call um fa come ta um. E tell um say, “Sista, fom now on, ya ain gwine be sick wid dis no mo!”
13Jedus pit e two han on dat ooman, an tareckly e stan op. E back scraighten op. An de ooman praise God.
14De leada ob de meetin house been mad down cause Jedus mek de sick ooman well on de Woshup Day. E tell de people say, “Six day we spose fa wok, so oona oughta come on one dem day fa hab Jedus mek oona well. Mus dohn come on de Woshup Day!”
15De Lawd ansa um say, “Oona hypicrit! On da Woshup Day oona ontie oona ox o oona mule fom de stable, tek um fa drink wata, ainty?
16Dis ooman, e one ob Abraham chullun. Satan done bine um down sick dese las eighteen yeah. Fa true, ef oona lau fa de ox an de mule, A oughta heal dis ooman on de Woshup Day too, ainty?”
17Wen Jedus tell um dis, wa e say mek all dem wa been ginst um shame. An all de oda res de people rejaice cause ob all de great ting Jedus da do.
De Paable Bout de Mustard Seed
18Jedus say, “Wa e like wen God da rule? Wa ting A gwine tek fa sho how e stan?
19Wen God da rule, e stan like one leeleetle mustard seed dat a man tek an plant een e gyaaden. De seed grow til e ton ta a tree. An de bod come an mek nes on e limb.”
De Paable Bout Yeast
20Jedus tell um gin say, “Wa ting A gwine tek fa sho how e stan wen God da rule?
21E stan like yeast. A ooman tek yeast an mix um wid a big sack ob flour til de whole dough rise op.”
De Leetle Door wa Lead ta God
22Wiles Jedus beena head fa Jerusalem, e da laan de people een dem town an settlement weh e beena pass shru.
23Somebody aks Jedus say, “Lawd, e jes a few people wa God gwine sabe?” Den Jedus laan um an de oda people.
24E say, “De door ta de place weh God da rule, e leeleetle fa true. Oona mus do de bes oona kin fa go shru um an go eenside. Cause A da tell oona say, plenty people gwine try fa go eenside weh God da rule an dey ain gwine be able fa go shru de door.
25De time gwine come wen de one wa de house blongst ta gwine git op an lock de door. Den oona gwine stan op outside de door an knock, say, ‘Lawd, Lawd, do please, open de door fa we!’ De Lawd gwine ansa oona say, ‘A ain know oona. An A ain know weh oona come fom!’
26Den oona gwine say, ‘We done nyam an drink long side ya. Ya done laan de people een de screet weh we lib at!’
27De Lawd gwine ansa gin say, ‘A ain know oona. A ain know weh oona come fom. All oona wicked people, git way fom me!’
28Oona gwine see Abraham, Isaac, Jacob an all de prophet dem eenside de place weh God da rule. Bot oona gwine be so scaid dat oona gwine cry an gnash oona teet, cause dey gwine chunk oona out.
29People gwine come fom all oba de wol, fom de east an de west, fom de nort an de sout. Dey gwine come ta de table fa feas een de place weh God da rule.
30Den fa true some dem wa people say ain nottin, dey gwine be high op. Dey gwine be fus. An some dem wa people say be sompin fa sho, dey ain gwine be nottin. Dey gwine be las.”
Jedus Haat Go Out ta Jerusalem
31Same time, some Pharisee come ta Jedus an tell um say, “Ya mus go way fom yah, cause Herod da scheme fa kill ya.”
32Jedus ansa um say, “Dat man Herod like a sly fox. Oona go tell um A say, ‘A da dribe out ebil sperit an heal sick people taday an demarra. Wen dat time done pass, atta shree day, A gwine be shru wid me wok yah.’
33Stillyet, A haffa be on me way ta Jerusalem taday an demarra an de nex day. Nobody cyahn eben magine de prophet dat git kill noweh else cep fa een Jerusalem!
34“Oh Jerusalem, Jerusalem! Oona kill de prophet dem wa taak fa God an chunk rock til oona kill dem wa God sen ta oona! Hommuch time A beena wahn fa geda oona people togeda roun me, jes like a hen geda e biddy dem ondaneet e wing! Bot oona people ain wahn me fa do dat!
35So God gwine lef de place weh oona dey. A tell oona, oona ain gwine see me gin til de time come wen oona gwine say, ‘God bless de one dat e done sen, dat come een de Lawd name.’”