Dual PanelJedus Bon
1Een dat time, Caesar Augustus been de rula ob de Roman people. E mek a law een all de town een de wol weh e hab tority, say, “Ebrybody haffa go ta town fa count by de head an write down e name.”
2Dis been de fus time dey count by de head, same time Quirinius de gobna ob Syria country.
3So den, ebrybody gone fa count by de head, ta e own town weh e ole people been bon.
4Now Joseph same fashion gone fom Nazareth town een Galilee. E trabel ta de town name Betlem een Judea, weh de ole people leada, King David, been bon. Joseph gone dey cause e blongst ta David fambly.
5E gone fa count by de head, an Mary gone long wid um. E gage fa marry um. An Mary been speckin.
6Same time wen dey been dey, time come fa Mary gone een.
7E hab boy chile, e fusbon. E wrop um op een closs wa been teah eenta scrip an lay um een a trough weh dey feed de cow an oda animal dem. Cause Mary an Joseph beena stay weh de animal sleep. Dey ain been no room fa dem eenside de bodin house.
De Shephud Go fa See de Chile Jedus
8Now some shephud been dey een de fiel dat night time. Dey beena stay dey, da mind dey sheep.
9Den one angel ob de Lawd appeah ta um. De night time done lightnin op jes like day clean broad. Cause ob dat, de shephud mos scaid ta det.
10Bot de angel tell um say, “Mus dohn feah! A hab good nyews. Cause ob dis nyews, oona gwine rejaice. All de people gwine rejaice tommuch.
11Cause A come fa tell oona, ‘Right now, dis day, a Sabior done bon fa oona. E Christ de Lawd. An e bon een David town!’
12A gwine tell oona wa oona gwine see dey. Cause ob dat, oona gwine know A done tell oona de trute. Oona gwine find de chile wrop op een closs wa been teah eenta leetle scrip, an e been leddown een a trough.”
13All ob a sudden, a heapa oda angel fom heaben been longside dat angel. Dey all da praise God, say,
14“Leh we gii glory ta God een de mos high heaben. Leh dey be peace ta dem een de wol wa hab God fabor!”
15Den de angel lef um an gone back ta heaben. An de shephud dem say ta one noda, “Leh we go ta Betlem fa see dis ting wa happen oba dey. De Lawd esef done sen e angel fa tell we.”
16So de shephud dem mek hace an gone ta Betlem fa look. Wen dey git dey, dey find Mary an Joseph an de chile. An dat chile been leddown een a trough.
17Atta de shephud shim, dey done tell ebrybody bout de chile. Dey tell um all wa de angel done say consaanin um.
18An all de people de shephud tell been stonish.
19Mary memba all dis ting an study bout um.
20De shephud dem gone back ta dey fiel. Dey da praise God. Dey da rejaice tommuch fa all dey done see an yeh. All wa de angel done tell um, e stan jes like e say.
Dey Name de Chile Jedus
21Eight day atta de chile bon, e been time fa circumcise um. Dey name um Jedus, jes like de angel done been gim fo e modda Mary been speckin.
Dey Offa Jedus Op ta de Lawd
22De time come fa Joseph an Mary fa go ta God house fa do dem ting wa gwine mek um clean een God eye, like de Law wa God gii Moses say dey mus do. Den dey cyaa de chile ta Jerusalem ta God house fa offa um ta de Lawd.
23Cause de Law ob de Lawd say, “Ebry fusbon son gwine blongst ta de Lawd fa do God wok.”
24An Joseph an Mary gone too fa gii God two tuckle dob eeda two nyoung pigeon. Dey gim ta de Jew priest fa mek sacrifice ta God cause de Law ob de Lawd say fa do dat.
25Dat time dey, one man name Simeon lib een Jerusalem. Dis man da waak scraight fa do all wa God wahn, an e lob God. E beena wait fa de time wen God gwine sabe de Israel people. An de Holy Sperit beena lib een um.
26Dat Holy Sperit done tell um say, “Fa sho, ya gwine see de Messiah. God gwine sen um fo ya pass oba.”
27An God Sperit tell Simeon fa go eenta God house. Wiles e been dey, Joseph an Mary cyaa een de chile Jedus fa offa um op ta de Lawd an do dem ting wa God Law say.
28Simeon tek de chile een e aam, an e praise God say,
29“Lawd, A ya saabant. Ya done do wa ya promise me. So now leh me pass oba een peace.
30Cause wid me own eye A done see de one wa gwine sabe all people een de wol.
31Ya done mek um ready een de open weh all people kin shim.
32E de light wa gwine mek dem dat ain Jew know ya trute, an bring glory ta ya Israel people.”
33Ebryting dat Simeon say bout de chile Jedus stonish e fada an modda.
34Simeon aks God fa bless um, an e tell Mary, e modda, say, “Fa true, God done pick dis chile fa come. Wen dey shim, plenty Israel people gwine be stroy cause dey ain bleebe um. An plenty oda Israel people gwine bleebe um, an God gwine sabe dem. God sen Jedus fa sho we wa God wahn we fa do. Bot a heapa people gwine taak ginst um.
35Dat how dey gwine show ebrybody wa dey beena tink, wa nobody ain beena know. An wen all dis happen, Mary, ya own haat gwine hut tommuch, gwine hut like a sode been jook een um.”
36One ooman wa tell God wod been dey. E name Anna, an e fada been Phanuel wa blongst ta Asher kin people. Now Anna been real ole. E husban done been dead long time. Fom de time wen Anna marry, e been jes seben yeah fo e husban pass oba.
37An now Anna been a wida-ooman fa eighty-fo yeah. All de time e been come ta God house. Day an night e been dey dey, da woshup God an fast an pray.
38Now den, Anna come ta God house de same time Joseph an Mary come da bring Jedus een dey. An Anna tank God fa de chile Jedus. E taak bout um ta all dem wa beena wait fa see God set de people een Jerusalem free. Joseph an Mary Go Back ta Nazareth
39Wen Joseph an Mary done do all de ting wa de Law ob de Lawd say, dey gone back ta dey own town, Nazareth, een Galilee.
40An de chile Jedus da grow big an scrong. An e been git plenty sense. An God been heppy wid um.
De Boy Jedus een God House
41Ebry yeah Joseph an Mary, Jedus fada an modda, gone ta Jerusalem fa de Jew holiday feas dey call de Passoba.
42Wen Jedus been een e tweb yeah, e gone long wid um ta de Passoba feas, like all de Israel people beena do.
43Atta de feas done oba, dey staat fa home, cep de boy Jedus ain gone long wid um. E stay dey een Jerusalem. An Mary an Joseph ain know.
44Dey beena tink Jedus gone long een de crowd. Dey done trabel all day, an den dey find out dat e ain been dey. Dey saach fa um mongst dey fambly an dey fren.
45Bot dey ain find um. So dey gone back ta Jerusalem fa saach fa um.
46Atta shree day done gone, dey find Jedus een God house, da seddown mongst de Jew teacha dem. An e beena listen ta wa dem teacha da say, an e beena aks um plenty ting too.
47All de people wa yeh Jedus beena stonish cause de chile hab sommuch sense an kin mek ansa ta de queshon.
48Wen e modda an e fada shim, dey been stonish down. An e modda aks um say, “Me son, wa mek ya do we like dis? Ya fada an me beena saach ebryweh fa ya. An wen we ain see ya, we beena fret tommuch.”
49Jedus ansa um say, “Hoccome oona beena saach fa me? Ain oona know dat A been spose fa be yah een me Fada house fa tek cyah ob e bidness?”
50Bot dey ain hab de ondastandin fa know wa e da taak bout.
51Den Jedus gone back wid um ta Nazareth, an e pay um mind. E modda memba all dem ting een e haat, an e study bout um.
52Jedus beena grow een e mind an een e body. An God an de people, all two been heppy wid um.