Dual PanelDey Tek Jedus ta Gobna Pilate
1All de crowd ob people wa beena jedge een de Jew Council grab hole ta Jedus an tek um way ta Gobna Pilate.
2Den dey staat fa cuse Jedus, tell Pilate say, “We done find dis man da pit wod een we people yea fa mek um riot ginst de tority. E tell um say we ain spose fa pay tax ta Caesar. An e say e de Messiah. Dat mean e a king.”
3Pilate aks Jedus say, “Ya de king ob de Jew people?” Jedus ansa um say, “Dat wa ya say. Dat so e stan.”
4Pilate tell de leada dem ob de priest an de heapa people wa done geda dey say, “A ain see nottin bad wa dis man done.”
5Bot de people dem ob de Council keep on da cuse um mo an mo. Dey tell Pilate say, “Jedus beena stir op de people wid de ting wa e da laan um all oba Judea. E staat een Galilee, an now e done come all de way yah ta Jerusalem.”
Dey Tek Jedus ta Herod
6Wen Pilate yeh wa dem people say, e aks um ef Jedus been fom Galilee.
7Soon as Pilate find out dat Jedus been fom Galilee, de arie weh Herod da rule, e sen Jedus ta Herod fa jedge um. An dat same time Herod been dey een Jerusalem too.
8Herod been real glad wen e see Jedus, cause e done yeh bout um an been wahn fa see um fa a long time. E wahn fa see um do some miracle.
9Herod quizzit Jedus tommuch, bot Jedus neba ansa um eben a wod.
10De leada dem ob dey priest an de Law teacha dem come stan fo Herod, da cuse Jedus still mo an mo.
11An Herod an e sodja dem da hole Jedus cheap. Dey laff an suck dey teet, shrow insult on um. An fa try fa mek Jedus feel small, dey mek um weah a fine robe, like a king weah. Den Herod mek dem tek um back ta Pilate.
12Now Pilate an Herod dem done beena fight each oda. Bot dat same day, dey come fa be fren.
Dey Say Jedus Mus Dead pon de Cross
13Pilate sen fa da leada dem ob dem Jew priest. An e call fa de tority dem wa da rule an fa de people. E call um all fa come togeda.
14E tell um say, “Oona done bring dis man yah ta me, tell me dat e da stir op de people, pit wod een dey yea. Bot wen A quizzit um fo oona, A see dat e ain done none ob dem ting wa oona say e done.
15An Herod ain see nottin bad wa Jedus done needa, so e done sen um back ta we yah. Oona kin see dat Jedus ain done nottin fa mek me hab dem kill um.
16Cause ob dat, A gwine jes hab dem whip um an den leh um go.”
17[Cause ebry yeah wen dey hab de Passoba feas, Pilate haffa free one man wa de Jew people wahn.]
18Bot wen Pilate say e wahn fa free Jedus fa um, all de people holla say, “No. Hab dem kill dis man an free Barabbas fa we!”
19(Barabbas de man wa dey done pit een de jailhouse cause e been a leada fo, wen de people done riot een de city an one poson been kill.)
20Pilate beena wahn fa free Jedus, so e taak ta de people gin.
21Bot de people keep on da holla, tell Pilate say, “Nail um ta de cross! Nail um ta de cross!”
22Pilate tell de people gin. Dat mek shree time. E aks um say, “Wa fa? A ain see nottin dat e done fa mek me hab dem kill um! Cause ob dat, A gwine hab dem whip um an den leh um go.”
23Bot de people keep on da holla louda an louda, say Pilate oughta hab de sodja dem kill Jedus on de cross. An cause de people holla sommuch an cause ob de leada dem ob de priest dem, e change e mind.
24So Pilate done wa de people wahn um fa do.
25E free Barabbas, de man dey aks fa. E de one wa done been een de jailhouse fa de riot an fa kill somebody. Den Pilate tell e sodja dem fa tek Jedus an do wa de people beena wahn um fa do.
Dey Nail Jedus ta de Cross
26De Roman sodja dem tek Jedus an gone. Wiles dey da gwine, dey meet one man name Simon, wa been bon een Cyrene. E beena come fom out een de country, da gwine ta Jerusalem. De sodja dem grab hole ta um an pit Jedus cross on um. Dey mek um folla Jedus, da tote de cross.
27A whole heapa people beena folla Jedus. Some dem ooman wa da folla um beena weepin an wailin fa um.
28Jedus ton roun ta dem an say, “Oona daughta ob Jerusalem, mus dohn cry fa me! Mus cry fa oonasef an fa oona chullun.
29Cause de time gwine come wen people gwine say, ‘Bless fa true dem ooman wa ain neba hab no chullun, dem wa ain neba bon no baby an wa ain neba nuss none!’
30Een dat time, people gwine tell dem mountain say, ‘Faddown pon we!’ An dey gwine tell dem hill say, ‘Kiba we op!’
31Cause ef dey da do dis ting ta de green wood, fa sho dey gwine do wossa ting ta de dry wood, ainty?”
32Wen de sodja dem tek Jedus an go fa kill um, dey tek two oda man. Dey been real bad man, an de sodja tek um wid Jedus fa kill um too.
33Wen dey git ta de place dey call “De place wa look like a man head,” de sodja dem nail Jedus ta e cross. An dey nail de two bad man too, each one ta e own cross. Dey pit one man on de right han side ob Jedus an de oda man on e lef han side.
34Jedus say, “Fada, paadon dem, cause dey ain ondastan wa dey da do.” An de sodja dem shrow dice fa wide op Jedus cloes mongst um.
35De people beena stan op dey da look. An de Jew leada dem been dey, da hole Jedus cheap. Dey say, “E done sabe oda people. So den, leh um sabe esef, ef e de Messiah wa God done pick fa true!”
36De sodja dem tek Jedus fa fun too. Dey come op ta um an try fa gim wine winega fa drink.
37Dey tell um say, “Ef ya de king ob de Jew people, sabe yasef!”
38Dey write de chaage ginst Jedus fa de people fa read. Den dey nail um oba Jedus head. De chaage say, “DIS MAN YAH DE KING OB DE JEW PEOPLE.”
39One dem two bad man wa beena hang dey on e cross, e shrow slam at Jedus. E say, “Ya de Messiah, ainty? Well den, sabe yasef an sabe we too!”
40Bot de oda bad man wa beena hang dey, e buke dat man say, “Ya ain scaid ob God? Dey done condemn ya fa dead jes like dis man yah.
41Dey done condemn me an ya fa wa we done, an we da git we pay fa all de bad ting we done. Bot dis man yah ain done nottin bad.”
42Den e beg Jedus say, “Jedus, please do, memba me wen ya come wid powa fa rule as King!”
43Jedus ansa um say, “A da tell ya fa true, taday ya gwine be wid me een heaben.”
Jedus Dead
44E been bout tweb o'clock wen de sun stop fa shine. All dat lan been pitch daak til shree o'clock.
45De sun done stop fa shine, an de big tick curtain wa beena hang eenside God house done split down de middle.
46Jedus holla say, “Fada, A gii oba me sperit ta ya fa tek cyah ob me!” Wen e done say dat, e dead.
47Wen de offisa fa de sodja dem see wa happen, e praise God. E say, “Fa true, dis man yah ain done nottin bad.”
48All de people wa beena geda dey fa look, wen dey see wa happen, dey lef an gone home. Wiles dey da gwine, dey beat on dey chest fa sho dey hab hebby haat.
49An all de people wa done beena know Jedus an de ooman dem wa come wid um outta Galilee beena stan op way off fom de cross, da look at all wa happen.
Joseph Bury Jedus Body
50One man been dey name Joseph, a memba ob de Jew Council. E a good man an e da waak scraight.
51E ain been gree wid de Council wen dey cide fa condemn Jedus an han um oba ta de Roman tority dem. Joseph come fom de town name Arimathea een Judea. E beena wait fa de time wen God gwine rule oba dis wol.
52Joseph gone ta Pilate an aks um fa leh um hab Jedus body. Pilate leh um hab um.
53So den, Joseph tek Jedus body down fom de cross an wrop um op een a linen closs. E pit um eenside a tomb wa done been cut outta a big rock. Nobody ain neba pit nobody een dat tomb fo.
54An dat day been de Preparation Day, de day wen dey git ready fa de Jew Woshup Day. An da Woshup Day been jes bout fa staat.
55De ooman dat done come outta Galilee wid Jedus, dey folla Joseph an see de tomb an how Joseph pit Jedus body een um.
56Den dey lef an gone home an git spice an pafume ready fa rub on Jedus body. Den de Woshup Day come, so dey ain do no wok, jes like de Jew Law say.