Alkitab Mobile SABDA
[VER] : [GULLAH]     [PL]  [PB] 
 <<  Lukas 9 >> 

Jedus Sen de Tweb Ciple fa Preach an Heal de Sick

1Jedus call e tweb ciple. An e gim powa an tority fa dribe out all de ebil sperit an fa heal dem wa hab disease.

2Den e sen um fa go all roun fa tell bout how God da rule an fa mek de sick people well.

3Fo dey gone, Jedus tell um say, “Wen oona da trabel so, mus dohn tote nottin long wid oona. Mus dohn cyaa no stick fa waak, needa no bag fa cyaa ting een, needa no bread an no money. Dohn eben cyaa no extry shat.

4Wen oona go een somebody house an dey gree fa oona fa stay dey, oona mus stay wid dem til oona ready fa lef dat town.

5Ef oona go ta a town an de people ain glad fa hab oona stay dey, oona mus lef dat town. Wiles oona da gwine, mus shake de dort fom off oona foot fa leh um know God ain please wid de way dey done an e gwine hole dat ginst um.”

6Den de ciple dem lef Jedus, an dey gone fom settlement ta settlement, da tell ebrybody de Good Nyews an heal people ebryweh.

Herod an Jedus

7Herod wa beena rule een Galilee yeh bout all wa happen. An e been all mix op een e head, cause some ob de people beena taak say, “Dat be John wa beena bactize people an wa done been dead. E done come back fom de dead. E da lib gin.”

8An some people beena say, “De prophet Elijah done come back.” Oda people say, “One dem prophet fom way back, wa tell God wod, e done come back fom de dead.”

9Herod say, “A done hab John head cut off. Bot who dis yah A da yeh sush a ting bout?” So e da try fa see Jedus.

Jedus Feed de Fibe Tousan

10Wen de postle dem come back, dey tell Jedus all wa dey done done. Jedus tek um an gone way fom de oda people. Dey gone ta a town name Bethsaida.

11Wen de crowd yeh say Jedus gone ta Bethsaida, dey gone folla um dey. Jedus glad fa shim. E tell um bout how God da rule, an e heal dem wa beena need fa be heal.

12Wen e been mos fus daak, de tweb ciple come ta Jedus say, “Nobody ain lib ta dis place yah. Mus sen way de crowd. Mek um go ta some ob de settlement an faam roun bout yah an find sompin fa nyam an a place fa stay.”

13Jedus tell um say, “Oona mus gim sompin fa nyam.” Dey ansa um, “We ain got nottin bot fibe loaf ob bread an two fish. We ain able fa go buy sompin fa all dem people yah, ainty?”

14Bout fibe tousan man been dey. Jedus tell e ciple dem say, “Mek de people all seddown, an wide um op, bout fifty head een ebry bunch.”

15De ciple dem mek de people all seddown like how Jedus tell um fa do.

16Jedus tek de fibe loaf ob bread an de two fish. E look op ta heaben an e tell God, “Tankya fa de bread an de fish.” Den e broke de bread an de fish an gim ta e ciple dem fa saab de crowd.

17All dem done nyam til dey been sattify. An de ciple geda tweb basket ob lef oba bread an fish.

Peter Say Jedus de Messiah wa God Sen

18One day Jedus been ta esef an e da pray. Wen e ciple dem come jine um, e aks um say, “Who de people say A da?”

19Dey ansa um say, “Some people say ya John wa Bactize. Oda people say ya Elijah. An some say ya da one dem prophet fom way back wa done come back fom de dead.”

20Den Jedus aks e ciple dem say, “Well den, who oona say A da?” Peter tell um say, “Ya de Messiah.”

Jedus Tell E Ciple E Gwine Dead an Den Lib Gin

21Jedus gii e ciple dem scrick orda say, “Mus dohn tell nobody who A da.”

22E tell um, “De Man wa Come fom God haffa suffa a whole heap. Dem Jew head leada an de leada dem ob de priest dem an de Law teacha dem ain gwine hab nottin fa do wid um. De people gwine kill um, bot atta shree day e gwine git op fom mongst de dead. E gwine lib gin.”

23Jedus tell um all say, “Ef anybody wahn fa folla me, e mus dohn do jes wa e wahn fa do no mo. E mus cyaa e cross an be ready fa suffa an dead cause ob me, ebry day.

24Anybody wa da try fa sabe e life, e gwine loss e true life. Bot anybody wa loss e life cause ob me, e gwine hab de true life.

25Wa good e do a man ef e own ebryting een de whole wol an gone ta hell wen e dead? E done loss e true life, ainty?

26Ef anybody da shame ob me an wa A done laan um, de Man wa Come fom God gwine be shame ob dat poson wen e come like a king. E gwine come wid great powa an light wa come out fom heaben an shine on um. Dat de same light wa da shine on me Fada God an on God angel dem wa gwine come wid um.

27A da tell oona fa true, some ob dem wa da stan op yah now, dey ain gwine dead til dey done see God da rule oba de wol, a king fa true.”

Jedus an Moses an Elijah

28Wen bout eight day done pass atta e say dat, Jedus call Peter, John, an James fa go long wid um. Dey gone on top a high hill fa pray.

29Wiles Jedus da pray, e face change. E cloes change color too. Dem ton pure white an beena shine like shaap lightnin.

30All ob a sudden two man appeah, da taak wid Jedus. Dem man been Moses an Elijah.

31An a bright light beena shine all roun um. Dey da taak wid Jedus bout wen e gwine haffa dead een Jerusalem fa finish wa God done plan.

32Peter dem been een a haad sleep. Bot dey wake op an see dat bright light roun Jedus an de two man wa da stan wid um.

33Wen Moses an Elijah staat fa lef Jedus, Peter tell Jedus say, “Massa, e a good ting we yah! Leh we mek shree brush aaba, one fa ya, one fa Moses, an one fa Elijah.” Bot Peter ain beena ondastan wa e da taak bout.

34Wiles Peter da taak, a cloud come an cyas a shada oba um. Wen de cloud kiba um, de ciple dem been scaid.

35Dey yeh a boice wa come outta de cloud. An e tell um say, “Dis me Son, wa A lob a whole lot. Mus listen ta wa e tell oona!”

36Wen de boice git shru, ain nobody been dey cep Jedus. Atta dat, de ciple dem ain crack dey teet bout wa dey see dat day. Dey ain tell nobody jurin dat time.

Jedus Heal a Chile wa Hab a Ebil Sperit

37De day atta dat, wen Jedus dem come down fom de hill, a whole crowd ob people come fa meet Jedus.

38One man een de crowd holla, “Teacha, A beg ya! Do please, come look at me son, cause e de onliest chile A got.

39A ebil sperit tek hole ta um. Dat sperit mek um holla all ob a sudden. E ketch fits an e da foam out de mout. De sperit keep on da bruise um op. Ain haadly eba lef um off.

40A beena beg ya ciple dem fa dribe dat sperit out, bot dey ain been able fa do um.”

41Jedus mek ansa say, “Oona people yah wa lib een dis time ain got no fait! Oona ain ondastan nottin. Hommuch mo longa A gwine haffa pit op wid oona?” Den e tell de man say, “Bring ya son yah.”

42Wiles de boy beena come ta Jedus, de ebil sperit shrow um down ta de groun wid fits. Bot Jedus gii orda ta dat demon fa come outta de boy. An de boy been heal. Den Jedus gim back ta e fada.

43All de people been stonish fa see de great powa ob God.

Jedus Tell Um Gin E Gwine Dead

Ebrybody beena wonda at all de ting wa Jedus da do. An e taak ta e ciple dem.

44E tell um, “A wahn oona fa listen good ta wa A gwine tell oona. Dey gwine han um oba. Dey gwine ton de Man wa Come fom God een ta dem wa een chaage yah.”

45De ciple dem ain ondastan wa Jedus mean. Cause God done hide de meanin fom um, so dey ain know yet wa been gwine happen. Dey been scaid fa aks Jedus wa e mean wen e say dat.

Who dat Great de Mores?

46De ciple dem staat fa aagy bout wish one dem been gwine be great de mores.

47Jedus know wa dey beena tink, so e tek a leetle chile an stan um op by e side.

48E tell e ciple dem say, “Anybody wa tek een a leetle chile like dis one yah een me name, dat poson done tek me een. An anybody wa tek me een, e done tek een de one wa sen me. De poson wa tink e ain nottin mongst oona, e de one wa sompin fa sho.”

Ef Anybody Ain Ginst Oona, E fa Oona

49John tell Jedus say, “Massa, we done see one man da dribe out ebil sperit by de powa ob ya name. We tell um fa stop dat, cause dat man ain one ob we.”

50Jedus say, “Oona mus dohn tell de man fa stop, cause ef anybody ain ginst oona, e fa oona.”

Jedus Staat fa Jerusalem

51Wen de time mos come wa God done set fa tek Jedus op ta heaben, Jedus set e mind fa go ta Jerusalem.

52E sen messenja dem fa go head ob um fo e staat off. De messenja gone een a Samaria settlement fa git ebryting ready fa Jedus.

53Bot de people een dat settlement ain wahn Jedus fa stop dey, cause dey beena know e done set e mind fa go on ta Jerusalem.

54Wen James an John, e ciple dem, see dat de people een dat settlement ain wahn Jedus fa stop dey, dey aks Jedus say, “Lawd, ya wahn we fa aks God fa sen fire down fom heaben so e kin bun op dese people de same way Elijah done?”

55Jedus ton roun ta James an John, an e buke um.

56E say, “Oona ain know wa kind ob sperit dey een oona haat. Cause de Man wa Come fom God ain come fa tek way people life. E come fa sabe um.” Den Jedus an e ciple dem gone long ta noda settlement.

Dem Dat Folla Jedus Mus Dohn Look Back

57Wiles Jedus an e ciple dem gone long de road, one man tell Jedus say, “A gwine folla ya wehsoneba oona go.”

58Jedus ansa um say, “De fox got hole een de groun. An de bod wa fly roun op een de air dey got nes. Bot de Man wa Come fom God ain got noweh fa lay e head fa res.”

59Jedus tell noda man say, “Come folla me!” Bot de man ansa um say, “Sah, fus leh me go an bury me fada.”

60Jedus ansa, “Leh dem wa dead bury dey own dead. Bot ya fa go, tell oda people bout God rule.”

61An noda man tell Jedus say, “Sah, A gwine folla ya, bot fus leh me go tell me fambly A gwine.”

62Jedus ansa um, “Anybody wa staat fa plow groun an e keep on da look back hine um, e like a poson wa da wok hafway. Dat poson ain fit fa lib onda God rule.”


  Share Facebook  |  Share Twitter

 <<  Lukas 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel