Dual PanelHow We Oughta Lib So dat We Please God
1So den, me Christian bredren, cause God hab mussy pon oona een so many way, A da beg ya fa gii all ya life ta God as a sacrifice wa da lib fa do e wok, a sacrifice wa blongst ta God fa true an gwine please um. Dat de true way we oughta woshup God.
2Oona mus dohn do tall like de people een dis wol do. Steada dat, ya mus leh God change de way ya tink, so dat all wa ya da do gwine change. Dat gwine mek ya able fa know wa God wahn, an wa good, an wa da please um, an how ya kin lib fa true jes like ya oughta lib.
3Cause ob God blessin pon me, A da tell ebry one ob oona say, “Mus dohn git de big head an tink ya sompin wen ya ain. Steada dat, ya mus hab sense wen ya tink bout yasef. Ebry one ob oona mus jedge yasef coddin ta hommuch God mek ya able fa trus um.
4Ebry poson got e one body wa got plenty diffunt paat. An dem paat got diffunt wok, an ebry paat da hep e body.
5Same fashion, eben dough we da heapa people, we come fa be one body cause we all trus een Christ. An ebry one ob we blongst ta all de odares.
6So ebrybody able fa do diffunt ting coddin ta how God mek um able fa do wid de powa an sense God gim. Ef God mek we able fa tell oda people God wod, we mus do um coddin ta hommuch fait we got.
7Ef God mek we able fa hep oda people, we mus do dat. Ef e mek somebody able fa laan people, e mus do dat.
8Ef e mek somebody able fa courage people, e mus do dat. Ef God gii somebody good haat fa gii some ob wa e got fa hep oda people, e mus do dat wid all e haat. Ef God mek somebody able fa lead oda people, e mus wok haad. An whosoneba able fa hab mussy pon people wa got need fa hep, e mus be heppy fa do um.
9Wen ya lob people, ya mus lob um wid all ya haat. Mus hate wa ebil, an hole on fas ta wa good, da keep um een ya haat.
10Mus lob one noda fa true, like people wa blongst ta de same fambly. An mus be heppy fa gii hona ta ya bredren.
11Ya mus neba be lazy. Mus wok haad. An ya mus saab de Lawd wid all ya haat.
12Cause ya da wait wid good hope fa wa God gwine do fa ya, ya oughta rejaice. Wen ya da suffa, mus beah op onda ya trouble. An ya mus pray all de time.
13Wen ya Christian bredren ain got wa dey need, ya mus gim paat ob ya own ting dem. An mus all de time hep scranja dem, an tek cyah ob um een ya house.
14Ya mus aks God fa bless de people wa da mek ya suffa. Ya mus dohn aks God fa cuss um. Mus aks God fa bless um.
15Wen people da rejaice, ya mus rejaice long wid um, an wen people saaful, ya mus be saaful long wid um too.
16Lib peaceable wid one noda. Mus dohn be oppity, bot mus be willin fa sociate wid people dat oda people look down pon. Ya mus dohn tink ya got sense mo den oda people.
17Ef somebody da do ya bad, ya mus dohn pay um bad back. Ya mus tek cyah fa try fa do dem ting wa right een all people eye.
18Ya mus do all ya able fa do so dat ya kin lib peaceable wid ebrybody.
19Me deah Christian bredren, wen somebody do ya bad, ya mus dohn neba pay um bad back. Steada dat, ya mus leh God condemn dat poson an gim e payback. Cause dey write een God Book say, “De Lawd say, A gwine mek de people dem wa da do oda people bad, suffa fa de bad dey da do. A gwine gim dey payback.”
20Bot ya mus do like dey write een God Book say, “Ef ya enemy hongry, ya mus gim sompin fa nyam. Ef e tirsty, mus gim sompin fa drink.” Ef ya do dat, ya gwine pile op plenty coal ob fire pon dey head.
21Ya mus dohn leh ebil win out oba ya. Ya mus win out oba ebil by de good ya do.