Dual PanelDe Lamb Tek de Scroll fom God
1Den A see de one wa da seddown pon de big trone. Een e right han e da hole one paper document wa been roll op. Dey call um a scroll. An plenty ting been write down een dat scroll, een front an een back. An de scroll been fasen shet real good wid seben seal ob wax.
2An A see one angel wa got great powa. E da taak loud so all kin yeh um. E aks say, “Who got de right fa pull dem seal an open op de scroll?”
3Bot nobody ain been dey een heaben o een dis wol o ondaneet dis wol wa got de right fa open de scroll an read wa been write down pon um.
4A staat fa cry real haad cause nobody ain been dey wa got de right fa open de scroll an read wa been write down pon um.
5Den one elda dem tell me say, “Mus dohn cry. Look yah! Dat one wa dey call De Lion wa come fom Judah Tribe, de one wa be ob King David chullun chullun dem, e done win oba all. Cause ob dat, e got de right fa pull dem seben seal an open op de scroll.”
6Den A see one Lamb da stan op een de middle ob dat great trone. De fo ting dem wa got life an de elda dem da stanop roun um. Dat Lamb look like people done been kill um. An E got seben hon een e head an seben eye. Dem eye God seben Sperit wa e sen out all oba de wol.
7Den A see de Lamb go tek de scroll fom de right han ob de one wa da sit pon de big trone.
8Wen de Lamb tek de scroll, de fo ting wa got life dem an de twenty-fo elda dem git down fo de Lamb an woshup um op. Dey all been git haap fa play music een dey han an gole bowl dem. Dem bowl full op wid sweet smellin herb wa dey call incense. An de incense yah dat de pray ob de people wa blongst ta God.
9Den de fo ting dem wa got life an de twenty-fo elda dem dey sing one nyew song, say, “Ya de Lamb. Ya got de right fa tek de scroll an pull open e seal wa fasen um shet. Cause dey done kill ya, an wid ya blood ya done buy back people fa God. Dem people yah come out fom all de tribe dem an fom all de diffunt nation dem een de wol, people wa taak all de diffunt language dem.
10Ya done mek dem people fa come onda God rule an be one fambly ob priest wa da saab we God, an dey gwine rule een dis wol.”
11Den, wiles A da look, A yeh de boice ob a heapa heapa angel. Dey been tousan an tousan, ten tousan time ten tousan ob um. Dey da geda roun de big trone an de fo ting wa got life dem an de twenty-fo elda dem.
12De angel dem sing loud, say, “De Lamb wa dey done kill, e got de right fa mek we praise um, E got powa an plenty ting. E got sense fa true an plenty scrent. We gim hona an glory. We praise um!”
13Den A yeh all de ting dem wa got life een heaben, een dis wol an onda de wol, an all ting wa een de sea. Dey all sing, say, “Ta de one wa da seddown pon de trone an ta de Lamb, Leh we praise um an gim hona an glory, an show dey got powa faeba an eba!”
14De fo ting wa got life dem say, “Amen!” An de twenty-fo elda dem git down on de groun an woshup op de one wa sit pon de great trone an de Lamb.