Dual PanelDaud itulak bangsa Pilisti
1Ipepulung bangsa Pilisti kerina tenterana i Apek, sedangken bangsa Israel erkemah deher ulu lau i bas Baluren Jesreel.
2Lima kalak raja-raja bangsa Pilisti maju ras pasuken-pasuken tenterana, lit 100, lit 1.000 kalak sada pasuken; Daud ras teman-temanna ngikut arah pudi ras Raja Akis.
3Puanglima-puanglima tentera bangsa Pilisti ngidah ia, jenari nungkun, "Kai dahin kalak Heber enda i jenda?" Ngaloi Akis, "Enda kap Daud; ia sekalak pegawai Saul, raja Israel. Ia nggo ndekah ras aku. La lit si nggo ibahanna si banci erbahanca aku curiga kidekah ia ras aku."
4Tapi merawa puanglima-puanglima bangsa Pilisti man Akis janah nina man bana, "Suruhlah ia mulih ku kuta si nggo iberekenndu man bana. Ula bere ia lawes erperang ras kita; banci jadi erkusur kari ukurna ngelawan kita sanga erperang e. Lit kin dalan si terulin man bana muat ukur tuanna mulihken seakatan arah kematen tenteranta?
5Lang kin pe, enda kap Daud si ipuji diberu-diberu arah ende-enden janahna landek-landek, 'Ibunuh Saul meribu-ribu, tapi ibunuh Daud erpuluh-puluh ribu.'"
6Emaka idilo Akis me Daud jenari nina man bana, "Ersumpah aku i bas gelar Dibata Israel si nggeluh maka gelgel nari bujur kam man bangku; janah meriah nge min ukurku mere kam lawes ras aku i bas perang enda. La lit kai pe kesalahen si dat aku i bas kam kidekah kam reh ndahi aku. Tapi raja-raja si deban la kam iberena ikut.
7Emaka mulihlah kam alu dame, janah ula ibahanndu kai pe si erbahanca nembeh ate raja-raja e."
8Erjabap Daud nina, "Kai kin salah si nggo kubahan, Bapa? Bagi nggo ikatekenndu, adi labo lit idatndu salah i bas aku kidekah aku erdahin ras kam, ngkai maka la banci aku lawes ras kam, o Tuanku ras Rajangku, jenari erperang ngelawan musuh-musuhndu?"
9"Kuakui nge katandu e," nina Akis ngaloi. "Kuakui maka kam bali bujurna ras sekalak Malekat Dibata. Tapi nggo ikataken raja-raja si deban maka kam la banci ikut ras kami erperang.
10Emaka erpagi-pagi e pagi, kerina kam ras pengikutndu si nggo nadingken Saul janah reh ndahi aku, la banci la lampas keke jenari minter berkat kenca terang."
11Emaka pepagina lampas berkat Daud ras teman-temanna mulih ku taneh Pilisti, janah bangsa Pilisti terus erdalan ku Jesreel.