Dual PanelPeti Perpadanen i tengah-tengah kalak Pilisti
1Kenca Peti Perpadanen nggo itaban kalak Pilisti, ilanjana Peti e i Ebeneser nari ku kuta Asdot.
2Ibabana ku bas Rumah Pertoton dibatana Dagon, jenari icibalkenna deher gana-gana.
3Lampas pepagina idah penduduk Asdot maka gana-gana Dagon nggo mbulak ku taneh langkem i lebe-lebe Peti Perpadanen TUHAN. Emaka iangkat kalak ndai gana-gana e jenari itamakenna mulihi ku bas inganna.
4Lampas ka pepagina idahna maka gana-gana ndai nggo ka mbulak i lebe-lebe Peti Perpadanen. Sekali enda nggo penggel takalna ras duana tanna janah ampar i bas pintun; badanna nari ngenca tading.
5(Em sabapna maka genduari pe imam-imam Dagon ras kerina si nembah ia i Asdot nilahi ingan e, la idedehna.)
6TUHAN ngukum anak kota Asdot alu mesangat janah mbiar ia kerina IbahanNa. IukumNa ia ras penduduk si lit i sekelewet daerah e. Barehen kerina IbahanNa.
7Kenca idahna kai si jadi nina kerina, "Dibata Israel ngukum kita ras ngukum dibatanta Dagon, lanai terban kita Peti Perpadanen e tading i jenda terdekahen."
8Emaka isuruh pertenahen guna ndilo raja Pilisti si lima gelah pulung. Emaka isungkunna raja-raja e nina, "Uga nge perbanta nandangi Peti Perpadanen Dibata Israel?" "Pindahken ku Gat," nina ngaloisa. Emaka ibabana Peti e ku Gat, sada kota si deban i bas kalak Pilisti.
9Tapi kenca Peti e seh i je, kota e pe iukum TUHAN ka, emaka seh kal ia biarna kerina. IukumNa alu bareh si turah i bas kerina anak kota e, nguda ras metua.
10Erkiteken si e ikirimkenna Peti Perpadanen ku Ekron, sada kuta si deban i bas daerah kalak Pilisti, tapi nggo kenca seh i je, minter nderkuh penduduk kota e nina, "Ibabana Peti Perpadanen Dibata Israel ku jenda, gelah munuh kita kerina!"
11Emaka itenahkenna ka mulihken kerina raja-raja Pilisti nina, "Kiremken mulih Peti Perpadanen e ku inganna, gelah ula ibunuhna kita ras keluarganta." Kebiaren si mbelin ndemi kerina kota e, sabap iukum Dibata alu mesangat.
12Kalak si la mate pe turah bareh i bas ia emaka anak kota e nderkuh mindo penampat man dibata-dibatana.