Dual PanelPeti Perpadanen iulihken
1Kenca Peti Perpadanen TUHAN pitu bulan i bas daerah Pilisti,
2idilo bangsa Pilisti imam-imam ras tukang sihir nina, "Uga sibahan kerna Peti Perpadanen TUHAN e? Adi sikirimken mulihi ku inganna, kai arus sikirimken ras Peti Perpadanen e?"
3Nina ngaloi, "Tentu saja adi iulihkenndu Peti Perpadanen Dibata Israel, la banci la ikirimkenndu radu ras Peti e sada pemere man BaNa guna nebus dosandu. Peti Perpadanen e la banci mulihken adi la kin ras pemere. Alu bage kam tentu ipepalem, jenari tereteh pagi man bandu ngkai maka lalap kam IukumNa."
4"Kai kin pemere si man kirimen man BaNa?" nina kalak e nungkun. Erjabap ia nina, "Lima ngkibul emas tempasna bagi bareh ras lima ngkibul tempasna bagi menci, sada tiap macam i bas tiap raja kalak Pilisti. Seri kap pinakit si ngkenai kam kerina ras si ngkenai raja-raja si lima e.
5La banci la ibahanndu tempas bareh ras menci si sangana encedaken negerindu, janah arus ipehagandu Dibata Israel. Mbera-mbera IngadikenNa ngukum kam, ngukum dibata-dibatandu, ras negerindu.
6Man kadendu pemersik ukurndu bagi raja Mesir ras kalak Mesir nai? Ula kam lupa uga pengukum Dibata ia seh iberena kalak Israel nadingken Mesir.
7Dagina sikapkenlah gereta mbaru ras dua indung lembu si la pernah ngangkat pasangen; ampeken pasangen gereta ndai ku lembu e jenari gera anakna ku karang.
8Buatlah Peti Perpadanen TUHAN janah tamaken ku bas gereta e, jenari tamaken deherken Peti Perpadanen e barang-barang emas si man kirimenndu man BaNa jadi sada pemere guna pertebus dosandu. Pedalan gereta e janah pelepas ia lawes jine.
9Kenca e perdiateken perlawesna; adi ku kuta Bet-Semes ia lawes, enda ertina maka Dibata kalak Israel nge si nggo mereken mara si mbelin i bas kita. Tapi adi lang, nggo sieteh maka labo Ia si erbahan pinakit e, jadi-jadi bage saja nge e."
10Ibahan kalak ndai kai si ikataken man bana: Ibuatna dua indung lembu jenari iamparkenna pasangen gereta e ku je janah ikarangkenna anak lembu e.
11Itamakenna Peti Perpadanen e ku bas gereta ndai, bage pe kotak isin emas si tempasna bagi menci ras bareh.
12Lembu ndai mulai erdalan arah pasar ku Bet-Semes janah minter itujuna ku je, alu la ndarat i bas pasar e nari. Gedang-gedang dalan lembu e terus erboh-boh. Raja Pilisti si lima kalak ngikut arah pudi seh ku perbalengen Bet-Semes.
13Penduduk Bet-Semes rani gandum i bas berneh-berneh. Janah asum ia jurgak rempet idahna Peti Perpadanen e. Lanai tanggung akapna riahna ngidahsa.
14Gereta ndai reh ku juma Josua, i Bet-Semes, ngadi i je deher batu galang. Itakai kalak ndai kayu gereta e janah lembuna igelehna jadi persembahen tutungen man TUHAN.
15Iangkat kalak Lewi Peti Perpadanen TUHAN ras peti si isin barang-barang emas e, jenari itamakenna i babo batu si galang ndai. Kenca bage penduduk Bet-Semes erbahan persembahen tutungen ras persembahen si deban man TUHAN.
16Raja kalak Pilisti si lima mperdiateken ia ngelakoken si enda janah kenca e lawes ia mulih ku Ekron i bas wari e ka.
17Ikirimken kalak Pilisti emas si lima ngkibul si tempasna bagi bareh e man TUHAN jadi pemere guna pertebus dosana, sada guna tiap kota Asdot, Gasa, Askelon, Gat, ras Ekron.
18Menci si ibahan i bas emas nari e pe ikirimkenna, sada guna tiap kota si iperentah raja-raja Pilisti si lima, subuk kota si ibenteng bage pe kuta si la ertembok. Batu galang si lit i bas juma Josua i Bet-Semes ingan Peti Perpadanen TUHAN, itamaken lit denga i je jadi saksi kerna kai si nggo jadi.
19Ibunuh TUHAN pitu puluh kalak penduduk Bet-Semes sabap inenna ku bas Peti Perpadanen e. Emaka ceda kal ate anak kuta e sabab nterem ia mate ibahan TUHAN.
Peti Perpadanen i Kiryat Jearim
20Emaka nina kalak Bet-Semes, "Ise kin ngasup tedis i lebe-lebe TUHAN Dibata si Badia e? Ku ja ndia banci si kirimken gelah Ia ndauh i bas kita nari?"
21Isuruhna piga-piga kalak pertenahen ku Kiryat Jearim ngataken, "Nggo iulihken kalak Pilisti Peti Perpadanen TUHAN. Rehlah kam ku berneh ngelegisa."