Dual PanelPengikut-pengikut Daud si tangtangna i bas suku Benyamin nari
1Sanga Daud tading i Siklak, inganna cebuni i bas Raja Saul nari, Daud itemani nterem tentera si erpengalaman, terpercaya,
2i bas anggota-anggota suku Benyamin nari, si sada suku ras Saul. Tentera e beluh manahken anak panah ras ngkalimbawangken batu alu tan si kemuhen bage pe tan si kawes.
3Kepala kalak enda eme Ahieser ras Joas anak Syema i Gibea nari. Enda me tentera-tentera e: Jesil ras Pelet anak Asmawet Beraca ras Jehu i Anatot nari Ismaya i Gibeon nari; ia sekalak tentera si terberita janah ia me sekalak peminpin i bas "Si Telu Puluh". Jeremia, Jahasel, Johanan, ras Josabat i Gedera nari Elusai, Jerimot, Bealia, Semaria, Sepatia i Harip nari Elkana, Jisia, Asarel, Joeser ras Jasobeam i bas terpuk Korah nari. Joela ras Sebadia anak Jeroham i Gedor nari.
4(1Taw 12:3)
5(1Taw 12:3)
6(1Taw 12:3)
7(1Taw 12:3)
Pengikut-pengikut Daud i bas suku Gat nari
8Enda me gelar-gelar tentera-tentera si erpengalamen si terberita i bas suku Gat nari, si ikut ras tentera Daud tupung ia i bas benteng gurun pasir. Kalak enda beluh kal mpergunaken ampang-ampang ras lembingna; ngidah ia bali kalak biarna ras ngidah singa, janah pedasna ia kiam bali ras belkih ketang.
9Enda me tingkatken pangkat kalak enda, mulai i bas si meganjangna nari ku teruh: Eser, Obaja, Eliap, Mismana, Jeremia, Attai, Eliel, Johanan, Elsabat, Jeremia, ras Makbanai.
10(1Taw 12:9)
11(1Taw 12:9)
12(1Taw 12:9)
13(1Taw 12:9)
14Piga-piga kalak i bas suku Gat enda nari, perwira si nggo erpengalamen ngkepalai seribu kalak tentera, janah si debanna, perwira-perwira si nguda denga ngkepalai seratus kalak.
15Bulan pemena i bas sada tahun tupung Lau Jordan banjir, ikepari kalak enda lau e, ipelawesna penduduk si tading i baluren-baluren e, subuk arah Timur bage pe arah Barat.
Pengikut-pengikut i bas Benyamin ras Juda nari
16Sekali jadi, sada terpuk dilaki i bas suku Benyamin ras Juda nari lawes ku benteng ingan Daud tading.
17Ijumpai Daud kalak ndai jenari nina, "Adi kerehenndu bagi teman guna nampati aku, kam ialo-alo kami alu meriah ukur. Ras kita! Tapi atendu nghianati aku man musuh-musuhku aminna pe la kubahan si jahat man bandu. Dibata nini-nininta si metehsa kerna si e, janah iukumna kam!"
18Kesah Dibata ngkuasai sekalak i bas kalak ndai, Amasai gelarna, si dungna jadi komendan i bas "Si Telu Puluh," jenari erlebuh ia, "Daud anak Isai, kami sikerajangenndu! Sehlah sura-surandu ras kalak si nampati kam! Dibata kap si ngkapiti kam." Ialoken Daud kalak ndai, jenari ibahanna kalak ndai jadi peminpin tenterana.
Pengikut-pengikut i bas Manase nari
19Piga-piga tentera i bas suku Manase nari lawes ndahi Daud sanga Daud erdalan ras bangsa Pilisti ngelawan Raja Saul. Si tuhuna labo isampati Daud bangsa Pilisti e, sabap mbiar raja-raja Pilisti maka ihianati Daud ia guna tuanna Saul. Emaka isuruh raja-raja e Daud mulih ku Siklak.
20Enda me tentera Manase si lawes ras Daud tupung ia mulihken: Adna, Josabat, Jediel, Mihael, Josabat, Elihu, ras Siletai. Kalak enda me komendan terpuk si seribu kalak i Manase.
21Isampatina Daud alu erperang ngelawan gerombolen perampok, sabap kalak enda kerina tentera-tentera si mbisa. Kedungenna kalak enda jadi puanglima-puanglima tentera Israel.
22Menam tiap wari lit kalak mbaru tambah ku tentera Daud, seh maka dungna tenterana lanai kal langlang teremna.
Daftar gegeh tentera Daud
23Sanga Daud i Hebron, nterem tentera si terlatih nemani tentera Daud nampati ia jadi raja nggantiken Saul, bagi si ipadanken TUHAN. Beliganna bagi si tersena arah teruh enda: Juda: 6.800 kalak, si iperlengkapi alu mehuli; ipersenjatai alu ampang-ampang ras lembing; Simeon: 7.100 kalak si ilatih alu mehuli; Lewi: 4.600 kalak Pengikut Joyada, kesusuren Harun 3.700 kalak; Kade-kade Sadok, sekalak si beluh erperang: 22 kalak si mbisa Benyamin (teman sesuku Saul): 3.000 kalak (teremen kalak Benyamin seh asa paksa e setia man Saul); Eperaim: 20.800 kalak, si terberita i bas terpukna; Manase Barat: 18.000 kalak, si terpilih guna berkat lako erbahan Daud jadi raja; Isakar: 200 peminpin, rikut ras kalak si ipinpinna. (Peminpin-peminpin enda meteh kai arus ibahan Israel janah meteh katawari e si mehulina idahiken); Sebulon: 50.000 kalak si setia janah terpercaya nggo siap tempur, si terlatih mpergunaken macam-macam senjata perang; Naptali: 1.000 peminpin, radu ras 37.000 kalak si ersenjataken ampang-ampang ras lembing; Dan: 28.600 kalak si terlatih; Aser: 40.000 kalak, sikap guna erperang. Suku-suku si arah Timur Lau Jordan -- Ruben, Gat ras Manase Timur: 120.000 kalak si terlatih mpergunaken macam-macam senjata perang.
24(1Taw 12:23)
25(1Taw 12:23)
26(1Taw 12:23)
27(1Taw 12:23)
28(1Taw 12:23)
29(1Taw 12:23)
30(1Taw 12:23)
31(1Taw 12:23)
32(1Taw 12:23)
33(1Taw 12:23)
34(1Taw 12:23)
35(1Taw 12:23)
36(1Taw 12:23)
37(1Taw 12:23)
38Kerina tentera enda, nggo sikap guna erperang, lawes ku Hebron, alu ketetapen ukur erbahan Daud jadi raja Israel kerina. Kerina kalak Israel si debanna, nggo ersada i bas tujun si seri.
39Telu wari dekahna kalak enda ras Daud i jah, man ras minem kai si nggo isikapken temanna sada bangsa man bana.
40Atan pe suku-suku si inganna ndauh i Utara eme suku Isakar, Sebulon ras Naptali, reh maba pangan alu kalde, unta, kuda, ras lembu, umpamana: tepung, kue ara, kue kismis, anggur, ras minak saitun. Ibabana ka pe lembu ras biri-biri man gelehen ras man pangan. Kerina enda ncidahken keriahen si igejapken i belang-belang negeri e.