Dual PanelDahin si itetapken man Imam-imam
1Enda me terpuk-terpuk kesusuren Harun. Harun mupus empat anak dilaki eme: Nadap, Abihu, Eleasar, ras Itamar.
2Nadap ras Abihu leben mate asangken bapana janah la lit itadingkenna kesusurenna, emaka seninana Eleasar ras Itamar jadi Imam.
3Iatur Raja Daud kesusuren Harun i bas terpuk-terpuk rikutken pendahinna. I bas si e ia isampati Sadok kesusuren Eleasar ras Ahimelek kesusuren Itamar.
4Kesusuren Eleasar iatur i bas sepulu enem terpuk sedangken kesusuren Itamar iatur i bas waluh terpuk; enda ibahan perbahan lalan peminpin keluarga dilaki i tengah-tengah keluarga Eleasar.
5I bas paksa si e subuk pegawai Rumah Pertoton bage pe peminpin pertendin i bas keluarga Eleasar ras Itamar nari, itetapken alu erbahan tikam tanduk.
6Kesusuren Eleasar ras Itamar isuratken mulihken gelarna. Jenari kalak enda idaftarken Semaya anak si Netanel. Semaya e sekalak sekretaris i bas suku Lewi nari. Si jadi saksina eme raja, pegawai-pegawaina, Imam Sadok, Ahimelek anak si Abiatar ras kepala-kepala keluarga imam bage pe keluarga suku Lewi.
7Enda me susunen terpuk-terpuk si dua pulu empat keluarga si nggo itetapken kalak enda: 1. Joyarip 2. Jedaya 3. Harim 4. Seorim 5. Malhijah 6. Miyamin 7. Hakos 8. Abiya 9. Jesua 10. Sekania 11. Eliasip 12. Jakim 13. Hupa 14. Jesebeap 15. Bilga 16. Immer 17. Hesir 18. Hapises 19. Petahiya 20. Jeheskel 21. Jakin 22. Gamul 23. Delaya 24. Maasia
8(1Taw 24:7)
9(1Taw 24:7)
10(1Taw 24:7)
11(1Taw 24:7)
12(1Taw 24:7)
13(1Taw 24:7)
14(1Taw 24:7)
15(1Taw 24:7)
16(1Taw 24:7)
17(1Taw 24:7)
18(1Taw 24:7)
19Enda isuratken rikutken pendahinna i Rumah Pertoton ras pendahin si nggo itetapken ninina Harun i bas kepatuhen man perentah TUHAN Dibata Israel.
Daftar suku Lewi
20Enda me kepala-kepala keluarga kesusuren Lewi si deban: Jehdaya, kesusuren Amram arah Sebuel;
21Isiah, kesusuren Rehabia;
22Jahat, kesusuren Ishar arah Selomit;
23Jeria, Amaria, Jehasiel ras Jekameam. Enda kerina anak si dilaki i bas Hebron menaken i bas si nguda nari kempak sintua.
24Samir, kesusuren Usiel arah Miha.
25Sekaria kesusuren Usiel arah Isiah, senina si Miha.
26Mahli, Musi, ras Jaasia kesusuren Merari.
27Jaasia mupus telu anak dilaki: Soham, Sakur, ras Ibri.
28Mahli mupus dua anak dilaki: Eleasar ras Kis. Eleasar la mupus anak dilaki; tapi Kis mupus sekalak anak dilaki gelarna Jerahmeel.
29(1Taw 24:28)
30Musi lit telu anakna dilaki eme: Mahli, Eder, ras Jeremot. Enda me keluarga-keluarga suku Lewi.
31Bali ras si nggo ibahan keluarga e kesusuren Harun, maka tiap kepala keluarga ras sekalak agina si dilaki ibahan tikam tanduk guna pendahinna. Raja Daud, Sadok, Ahimelek, ras kepala keluarga imam ras suku Lewi eme si jadi saksina.