Alkitab Mobile SABDA
[VER] : [KARO]     [PL]  [PB] 
 <<  1 Tawarikh 5 >> 

Kesusuren Ruben

1Enda me sinursur Ruben, anak Jakup sintua. Erkiteken nggo ia ersada kula ras gundik bapana, emaka ia kebenen hak anak sintua janah hakna e ibereken man Jusup.

2Amin bage gia suku Juda nge si jadi si megegehna, janah i bas suku enda nari me rusur si minpin suku-suku e kerina.

3Ruben anak Jakup sintua, lit empat kalak anakna dilaki, eme: Enoh, Palu, Hesron, Karmi.

4Enda me kesusuren Joel i bas kesusuren ku kesusuren: Semaya, Gok, Simei, Miha, Reaya, Baal, ras Beera. Raja Assur, Tiglat Pileser, itangkapna Beera peminpin suku Ruben, jenari ibuangna ku negeri si deban.

5(1Taw 5:4)

6(1Taw 5:4)

7I bas terombo keluarga enda terdaftar me gelar peminpin-peminpin terpuk i bas suku Ruben: Jeyel, Sakaria,

8ras Bela anak Asas janah kempu Sema i bas terpuk Joel nari. Terpuk enda ringan i Aroer, ras i daerah Utara seh ngayak Nebo ras Baal Meon.

9Melala kal rarasen asuh-asuhenna i taneh Gileat, emaka iinganina ingan e seh ku gurun pasir i Timur, si belangna seh ku Lau Eprat.

10I bas paksa pemerentahen Raja Saul, iserang suku Ruben kalak Hagri, ibunuhina i bas pertempuren, jenari iinganina negeri e i bagin Timur Gileat.

Kesusuren Gat

11Suku Gat ringan i Utara Ruben, i negeri Basan seh ku arah Timur Selaka.

12Joel me si manteki terpuk si terberitana, janah Sapam si manteki terpuk si peduaken si pentingna. Janai ras Sapat eme si manteki terpuk-terpuk si deban i Basan.

13Anggota-anggota si deban i bas suku e subuk i bas terpuk si pitu si tersena arah teruh enda: Mikael, Mesulam, Seba, Jorai, Jakan, Sia ras Eber.

14Kalak enda me kesusuren Abihail anak Huri, si terombona banci iikuti bagi tersena arah teruh enda: Abihail, Huri, Jaroa, Gileat, Mikael, Jesisai, Jahdo, Bus.

15Ahi, anak Abdiel, kempu si Guni, ia me peminpin terpuk-terpuk enda.

16Kalak enda ringan i daerah Basan ras i Gileat, i bas kuta-kuta si i je janah kerina mbal-mbal negeri Saron.

17(Terombo enda isuratken i bas paksa pemerentahen Raja Jotam i Juda ras pemerentahen Raja Jerobeam i Israel.)

Tentera suku-suku si arah Timur

18I bas suku Ruben, Gat, ras Manase Timur, lit 44.760 tentera, si terlatih mehuli make ampang-ampang, pedang ras panah.

19Lawes ia erperang ngelawan bangsa Hagri i bas suku-suku Jetur, Napis, ras Nodap nari.

20Ernalem ia man Dibata janah ertoto man Bana mindo penampat, emaka ialoi Dibata pemindonna, jenari ibahan Dibata maka menang ia ngelawan bangsa Hagri ras sekutuna.

21Ibuatna i bas musuh-musuhna nari 50.000 unta, 250.000 biri-biri ras 2.000 kalde, jenari itabanna 100.000 tabanen perang.

22Nterem ibunuhna musuh, sabap perang e peraten Dibata kap. Jenari terus kalak enda ringan i daerah e seh ngayak paksa pembuangen.

Kalak Manase Timur

23Kalak Manase Timur tading i daerah Basan seh ku Baal Hermon i Utara, Senir, ras Deleng Hermon, janah kalak enda seh kal buena pertambahenna.

24Enda me peminpin terpukna: Eper, Isi, Eliel, Asriel, Jeremia, Hodawia, ras Jahdiel. Kerina kalak enda tentera si mbisa, peminpin si terberita i bas terpukna.

Suku si arah Timur ibuang

25Tapi bangsa e la setia man Dibata nini-ninina, janah nilah ia lako nembah man dibata-dibata bangsa-bangsa si nggo ipelawes Dibata i bas negeri e nari.

26Emaka ibahan Dibata maka Raja Pul i Assur nari (si igelari pe Tiglat Pileser) nerbu negeri kalak e. Ibuangna suku-suku Ruben, Gat ras Manase Timur janah itetapkenna ingan tading kalak enda i Halah, Habor, ras Hara i tepi Lau Gosan.


  Share Facebook  |  Share Twitter

 <<  1 Tawarikh 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel