Alkitab Mobile SABDA
[VER] : [KARO]     [PL]  [PB] 
 <<  2 Petrus 1 >> 

1Surat enda i bas aku nari, Simon Petrus, suruh-suruhen dingen rasul Jesus Kristus. Surat enda man senina-senina si bali ras kami nggo ndat kengasupen gelah tek man Jesus Kristus, e me Dibata ras Singkelini kita. Ia me si nggo mereken kengasupen si meherga e man banta, sabap AteNa erbahan kai si benar.

2Dibatalah si mereken dem lias ate ras kemalemen ate man bandu, erkiteken nggo itandaindu Dibata ras Jesus Tuhanta.

Pendilo dingen pilihen Dibata

3Dibata nggo ndilo kita gelah kita dat bagin i bas kemulian ras KiniulinNa. Alu KuasaNa ras arah penandainta kerna Ia nggo IberekenNa man banta kai keperlunta guna nggeluh nembah man BaNa.

4Arah padan si mbelin dingen meherga si IberekenNa man banta e, ngasup kam mulahi bandu i bas kerincuhen daging nari, si ncedaken si lit i doni enda, jenari dat bagin kam i bas kinidibatanna.

5Erkiteken si e usahakenlah maka irakutkenndu ku kinitekenndu kai si mehuli, tapi aminna gia nggo ibahanndu kai si mehuli, rakutken ka lah ku perbahanen si mehuli e pemeteh kerna Dibata.

6Adi nggo lit pemetehndu kerna Dibata, arus maka irakutkenndu ku pemetehndu e penguasan diri; janah adi nggo ngasup kam ngkuasai dirindu, rakutken ka ku je ate megenggeng. Adi nggo lit i bas kam ate megenggeng, arus irakutkenndu ku ate megenggeng e ate tutus er-Dibata.

7Tapi aminna gia nggo lit i bas kam ate tutus ngikutken sura-sura Dibata, rakutken ka lah ku je ate keleng man teman sapih-sapih Kristen; janah adi nggo lit i bas kam ate keleng nandangi teman-teman sapih-sapih Kristen, arus maka irakutkenndu ku je ate keleng nandangi kerina manusia.

8Enda me kerina biak-biak si iperlukenndu, janah adi biak-biak enda turah alu mehumur i bas kam, si e erbahanca maka pemetehndu kerna Tuhanta Jesus Kristus nggeluh janah erbuah.

9Tapi kalak si la lit i bas ia biak-biak si bage, pentang kap mata perukurenna; la ia ngasup ngidahsa, janah nggo ilupakenna maka dosa-dosana si nggo lepas nggo ibersihken.

10Dage, o senina-seninangku, usahaken tole gelah pendilo ras pemilihen Dibata nandangi kam tetap erteguhna. Adi bage perbahanndu, ndigan pe la kam banci ndabuh ku bas dosa.

11Alu bage ibereken man bandu dem hak bengket ku bas Kinirajan si la ermasap-masap, Kinirajan Tuhanta ras Si Engkelini kita Jesus Kristus.

12Erkiteken si e rusur ateku kam kupersingeti kerna perkara-perkara si enda, aminna pe nggo ietehndu janah kam tetap paguh i bas berita si rehna i bas Dibata nari si nggo ialokenndu.

13Adi nggeluh dengalah aku, rutang kuakap aku mpersingeti kam kerna si enda kerina.

14Sabap kueteh maka lanai ndekah mate me aku, sue ras si nggo ikataken Tuhanta Jesus Kristus alu terang-terang man bangku.

15Dage, asa ngasupku kuusahaken nikapken dalan man bandu gelah iingetndu katawari pe si enda kerina kenca aku nggo mate.

Saksi mata kerna kemulian Kristus

16Ipebetehken kami man bandu uga muliana kerehen Tuhanta Jesus Kristus. Si e la ituriken kami erpalasken turi-turin si iban-ban manusia. Alu mata kami jine nge KemulianNa nggo idah kami.

17I je kap kami sanga Dibata Bapa mereken kehagan ras kemulian man BaNa. Asum si e reh sora man BaNa i bas Kemulian si Meganjangna nari nina, "Enda me Anakku si Kukelengi, senang kal ukurKu ibahanna!"

18Kami jine megi sora e reh i Surga nari, sanga kami ras Ia i das deleng si badia e.

19Erkiteken si e reh tekna kami nandangi berita si iberitaken nabi-nabi. Seh kal ulina adi iperdiatekenndu berita e, sabap berita e desken sada lampu si ersinalsal i bas ingan si gelap, seh wari nggo terang janah terang bintang erpagi-pagi ersinalsal i bas pusuhndu.

20Tapi i babo si e kerina, ingetlah enda: nubuat-nubuat si lit i bas Pustaka Si Badia la banci iterangken rikutken penggejapen sekalak-sekalak.

21Sabap la pernah lit kalak ngasup nehken berita nubuat arah peratenna jine. Tapi si njemba kalak ngerana nehken berita si rehna i bas Dibata nari e me Kesah Si Badia.


  Share Facebook  |  Share Twitter

 <<  2 Petrus 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel