Dual PanelJehoahas raja Israel
1Kenca dua pulu telu tahun dekahna Joas anak Ahasia jadi raja i Juda, Jehoahas anak Jehu jadi raja i Israel. Dekahna ia jadi raja i Samaria lit sepulu pitu tahun.
2Bali ras Raja Jerobeam si jadi raja ope denga ia, Jehoahas pe erdosa man TUHAN janah ibabaina pe Israel erdosa; la pernah ingadikenna lagu langkahna si jahat.
3Erkiteken si e nembeh TUHAN man Israel, emaka iberena Raja Hasael i Siria nari ras anakna Benhadat terus naluken Israel.
4Kenca bage ertoto Jehoahas man TUHAN. Ngidah uga sangatna pendedeh raja Siria nandangi kalak Israel, ibegiken TUHAN pertoton Jehoahas.
5Isuruh TUHAN sekalak peminpin man bangsa Israel mbebasken ia i bas bangsa Siria nari, emaka mulihken ka bangsa Israel nggeluh alu dame bagi si gelgelna.
6Tapi langa ingadiken kalak e erbahan dosa bagi Raja Jerobeam si mabai kalak Israel erdosa, tapi lalap idalankenna. Emaka gana-gana Dewi Asera tetap tading i Samaria.
7Tentera Jehoahas lanai lit si tading, seakatan lima puluh kalak si erkuda, sepuluh gereta perang, ras sepuluh ribu tentera si erdalan nahe, erkiteken tentera si debanna nggo ikernepken raja Siria, idedehina bagi abu.
8Kerina si debanna si ilakoken Jehoahas ras perbahanenna si nuduhken kinimbisanna isuratken i bas kitap Sejarah Raja-raja Israel.
9Ia mate ras ikuburken i Samaria, jenari anakna Jehoas nggantiken ia jadi raja.
Jehoas raja Israel
10Kenca telu pulu pitu tahun dekahna Joas jadi raja Juda, jadi raja me Jehoas anak Jehoahas i Israel. Dekahna ia erkuasa i Samaria lit sepulu enem tahun.
11Ia pe erdosa man TUHAN, erkiteken iusihna lagu-langkah Raja Jerobeam si jahat, si mabai Israel erdosa.
12Kerina si debanna si ilakoken Jehoas subuk kinimbisanna i bas perang ngelawan Raja Amasia i Juda nari isuratken i bas kitap Sejarah Raja-raja Israel.
13Jehoas mate ras ikuburken i bas kuburen raja-raja i Samaria, jenari anakna Jerobeam II nggantiken ia jadi raja.
Kematen Elisa
14Sakit Nabi Elisa penakitna enda me maba kematenna. Asum ia sakit e, reh Raja Jehoas i Israel nari ndahi ia. Janahna tangis nina Jehoas man Elisa, "O, bapa, bapangku! Kam kap gelgel nari si kawal Israel si mbisa!"
15"Buat panah ras piga-piga anak panahna," nina Elisa merentahken ia. Emaka ibuat Jehoas.
16Isuruh Elisa ia gelah sikap ia manahken panahna. Bage ka ibahan raja. Emaka itamaken Elisa duana tanna ku tan raja.
17Kenca bage, sue ras perentah nabi e, italangi raja jendela si ngala kempak Siria. "Panahkenlah anak panah e!" nina Elisa. Kenca ipanahken raja anak panah e, minter nina nabi e man raja, "Kam kap anak panah TUHAN, janah kam ipake TUHAN guna naluken Siria. Ilawanndu me kalak Siria e i Apek seh italukenndu kerina."
18Kenca bage isuruh Elisa ka raja muat anak panah si deban ndai. "Pekpeklah taneh alu e!" nina Elisa man raja. Ipekpek raja taneh alu anak panah e telu kali, kenca bage ingadikenna.
19Ngidah si e merawa Elisa, janah nina man raja, "Arusna kin ipekpekndu lima ntah enem kali, janah alu bage keri kal min ndai italukenndu kalak Siria e; tapi genduari telu kali ngenca ia italukenndu."
20Kenca e mate me Elisa jenari ikuburken. Tiap tahun biasa reh gerombolen kalak Moap ngerampasi negeri Israel.
21Sekali jadi, asum lit acara penguburen, teridah ka sada gerombolen e. Emaka ibenterken kalak mait e ku bas kuburen Elisa jenari kiam ia kerina. Kenca mait ndai kena ku tulan-tulan Elisa, kalak si mate ndai nggeluh mulihi, emaka tedis ia.
Perang Israel ras Siria
22Kidekah pemerentahen Jehoahas, kalak Israel tuhu-tuhu itindih Raja Hasael i Siria nari.
23Tapi mesayang dingen mekuah ate TUHAN man bangsa e. La IbereNa kalak e ikernepken, tapi IsampatiNa, erkiteken perpadanen si IbahanNa ras Abraham, Isak, ras Jakup. La pernah IlupakenNa BangsaNa.
24Tupung kematen Raja Hasael i Siria nari, anakna Benhadat nggantiken ia jadi raja.
25Kenca bage Raja Jehoas naluken Benhadat telu kali janah idatna mulihi kota-kota si nggo ibuat Benhadat asum pemerentahen Jehoahas bapa Jehoas.