Alkitab Mobile SABDA
[VER] : [KARO]     [PL]  [PB] 
 <<  2 Raja-raja 3 >> 

Perang Israel ras Moap

1Joram, anak Ahap, jadi raja i negeri Israel i Samaria, i bas tahun si pesepulu waluhken kenca Josapat jadi raja i Juda. Dekahna Joram jadi raja lit sepulu dua tahun.

2Erdosa ia man TUHAN, tapi ulin ia asa bapana tah pe nandena Isebel. Iruntuhkenna gana-gana si ibahan bapana man ingan ersembah man Baal.

3Tapi bali ras Jerobeam anak Nebat, si jadi raja ope denga ia, ibabai Joram bangsa Israel ku bas dosa; la ia nggit nilahken dosa e.

4Mesa, raja Moap, ngasuhi melala biri-biri. Tiap tahun iberekenna 100.000 anak biri-biri ras kain wool i bas 100.000 biri-biri nari man raja Israel penggalar pajakna.

5Tapi kenca Ahap, raja Israel, mate, berontak Mesa ngelawan Israel.

6Minter Raja Joram berkat i Samaria nari pepulung kerina tenterana.

7Itenahkenna kata man Josapat, raja Juda nina, "Raja Moap nggo berontak ngelawan aku, ma nggit kam ras kita erperang ngelawan ia?" "Nggit," nina Raja Josapat njabapsa. "Katawari pe aku nggo sikap, bage pe tenterangku ras kudangku kerina.

8Arah dalan si apai kin siserang?" "Arah dalan si mentasi taneh mesawang Edom," nina Joram njabapsa.

9Emaka berkat Raja Joram, raja Juda ras raja Edom. Kenca erdalan pitu wari dekahna, nggo keri lau i bas ia, lanai lit sitik pe tading man inemen manusia ntah pe rubia-rubia si ngangkat barang-barangna.

10"Nggo kita bene!" nina Raja Joram. "Nggo itamaken TUHAN kita teluna i teruh kuasa raja Moap!"

11Nungkun Raja Josapat, "La kin lit i jenda nabi dalanta nungkun man TUHAN?" Sekalak kepala tentera Raja Joram erjabap nina, "I jenda kap Elisa, anak Sapat. Ia kap pembantu Elia nai."

12"Ia nabi si tuhu-tuhu," nina Raja Josapat. Emaka lawes me raja e teluna ndahi Elisa.

13"Man kadeku nampati kam?" nina Elisa man raja Israel. "To sungkun nabi-nabi si isungkun nandendu ras bapandu nai." "Lang," nina Joram ngaloi. "TUHAN nge si nggo namaken raja-raja enda teluna i teruh kuasa raja Moap."

14Nina Elisa erjabap, "I bas gelar TUHAN si kusembah, adi la kin erkiteken tuanndu Raja Josapat i Juda nari, si kuhamati, la diateku pe kam.

15Dage genduari, legilah perkulcapi man bangku." Asum perkulcapi ndai ngkuit kulcapina, reh me kuasa TUHAN ku Elisa,

16emaka nina, "Enda me kai si ikataken TUHAN: 'Kalilah lubang i bas baluren si kerah enda.

17Aminna la gia lit idahndu udan ntah pe angin, baluren enda la banci la dem lau maka kam, asuh-asuhenndu, ras rubia-rubia si ngangkat barangndu banci minem asa puasna.'"

18Jenari iterusken Elisa ngerana nina, "Tapi enda perkara kitik nge iakap TUHAN kemenangen pe IberekenNa man bandu ngelawan bangsa Moap.

19Kerina kotana si mejile si ibentengi italukenndu; kerina batang kayuna si banci ipan buahna itabahindu, kerina ulu launa itambusindu, janah kerina jumana si mehumur icedakenndu alu namburisa alu batu."

20Pepagina kenca persembahen si erpagi-pagi nggo seh paksana ipersembahken, reh me lau maler i Edom nari namburi taneh e.

21Kenca nggo ibegi bangsa Moap maka raja si telu e nggo reh nerang ia, idilona kerina dilaki si ngasup erperang, mulai i bas si metuana nari terus ku si ngudana, jenari pepulungna i bas perbalengen negerina.

22Pepagina tupung kalak enda medak erpagi-pagi, matawari sangana ersinalsal ku babo lau e, mahanca lau e teridah megara bagi dareh.

23"Dareh kap ah!" nina kalak Moap. "Ugapa pe teluna tentera musuh e nggo rubati janah sibunuhen sapih-sapih ia! Ota, sirampasi kemahna!"

24Tapi kenca seh i bas ingan erkemah e, rempet iserang kalak Israel ia kerina; ipaksana kalak Moap mundur. Iterusken kalak Israel ngayakisa, ibunuhina kalak Moap,

25janah kotana ikernepkenna. Asum ibentasina juma si mehumur, tiap kalak Israel menterken sada batu ku juma e seh maka kedungenna juma e nggo ketamburen batu; ulu lau kalak Moap pe itambusi kalak Israel, janah batang kayuna si erbuah itabahina. Kedungenna ibukota Kir Heres nari ngenca tading, emaka ikepung kalak si erkalibawang kuta e jenari iserangna.

26Kenca nggo tergejap man raja Moap maka ia lanai banci menang i bas perang e, ibuatna pitu ratus kalak si erpedang ras ia, icubakenna ndarami dalan pulah arah tengah-tengah barisen musuhna, gelah banci lompat ndahi raja Siria, tapi gagal.

27Emaka ibuatna anakna sintua si nandangi nggantiken ia jadi raja, kenca bage ipersembahkenna i babo tembok kota jadi persembahen tutungen man dibata Moap. Erkiteken si e mbiar tuhu-tuhu kalak Israel emaka mundur ia i bas kota e nari, jenari mulih ku negerina jine.


  Share Facebook  |  Share Twitter

 <<  2 Raja-raja 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel