Dual PanelNaaman ipepalem Nabi Elisa
1Naaman puanglima tentera Siria tuhu-tuhu ipehaga ras isayangi raja Siria, erkiteken arah Naaman me TUHAN nggo mereken kemenangen man tentera Siria. Ia sekalak tentera si mbisa, tapi lit penakit kulitna.
2Sekali jadi asum iserangna negeri Israel, itaban kalak Siria sekalak diberu bangsa Israel si kitik denga, si dungna jadi suruh-suruhen ndehara Naaman.
3I bas sada wari nina anak diberu e man ndehara tuanna: "Lawes tuanku ndahi nabi si ringan i Samaria, tentu ipepalemna penakitna."
4Kenca ibegi Naaman si enda, idahina raja jenari iturikenna man bana kai si ikataken diberu e.
5Nina raja, "To dahi raja Israel janah baba surat enda man bana." Emaka berkat Naaman, ibabana telu puluh ribu duit pirak, enem ribu duit emas, ras sepuluh pasang uis mejile.
6Surat si ibabana e bagenda katana, "Arah surat enda kupetandaken man bandu sekalak tenterangku, Naaman gelarna. Ngarap aku maka ipepalemndu penakitna."
7Kenca ioge raja Israel surat e, icaingkenna bajuna perban biarna, janah nina, "Uga banci raja Siria ngarapken aku pepalem kalak enda? Iakapna kin aku Dibata si erkuasa kerna kegeluhen ras kematen? Nggo tangkas ndarami perubaten saja ngenca atena ras aku!"
8Kenca ibegi Nabi Elisa kai si nggo jadi, itenahkenna berita man raja nina, "Ngkai maka aru atendu? Suruh dilaki e ndahi aku, gelah ietehna maka lit nabi i Israel!"
9Emaka lawes me Naaman ras kudana ras gereta perangna, jenari ngadi ia i bas dalan bengket ku rumah Elisa.
10Isuruh Elisa sekalak suruh-suruhen ngatakenca man Naaman gelah ridi ia pitu kali i Lau Jordan, gelah malem penakitna.
11Tapi lawes Naaman alu merawa-rawa nina, "Kuakap kin reh ia ndahi aku, kenca bage ertoto ia man TUHAN Dibatana, iapkenna tanna i babo dagingku si penakiten gelah aku malem!
12Tambah si e, ma ndauh ulin Lau Abana ras Parpar si i Damaskus asa lau belin si apai pe i Israel enda? Bancin aku malem adi i jah aku ridi!"
13Tapi reh suruh-suruhenna ndeheri ia nina man Naaman, "Tuan, adi isuruh nabi e min ndai kam ngelakoken sada-sada dahin si mesera, tentu nggo ilakokenndu e. Genduari ngkai maka la banci kam ridi saja gelah malem?"
14Emaka nusur Naaman ku Jordan, igedapkenna bana pitu kali i bas lau e, bagi si iperentahken Elisa, emaka nggo malem ia tuhu-tuhu. Jukutna jadi bersih ras sehat, desken jukut sekalak danak-danak.
15Kenca bage mulih ia ras kerina anak buahna ndahi Elisa. Jenari nina Naaman, "Genduari nggo kuteh maka la lit Dibata i bas kerina doni enda seakatan Dibata Israel, emaka tuan, ngarap aku gelah ialokenndu pemerengku enda."
16Nina Elisa njabapsa, "Erkiteken TUHAN si nggeluh si kusembah, ersumpah aku maka la aku nggit ngaloken kai pe." Meseksek pemindo Naaman: gelah ialoken Elisa pemerena e, tapi la ia nggit.
17Erkiteken si e nina Naaman, "Adi la kam nggit ngaloken pemerengku, bereken dage man bangku taneh asa si terbaba dua kalde, gelah banci kubaba mulih ku kutangku. Sabap mulai genduari nari lanai ateku mpersembahken persembahen gelehen tah persembahen tutungen man dibata si apai pe seyakaten TUHAN.
18Dage ngarap aku maka ialemi TUHAN salahku adi kutemani pagi rajangku ersembah ku rumah persembahen Rimon, dibata Siria. Tek aku maka nggit TUHAN ngalemi salahku!"
19"Mulihlah alu dame," nina Elisa. Emaka mulih Naaman. Tapi lenga denga pe ia ndauhsa lawes,
20Gehasi, suruh-suruhen Elisa, rukur i bas ukurna, "Nggo ibere tuanku si Naaman lawes alu la nggalar kai pe! Si tuhuna patut kal ialoken tuanku kai si ibereken kalak Siria e man bana. Erkiteken TUHAN si nggeluh, kuayakilah ia, gelah dat aku sitik i bas ia nari."
21Emaka berkat me Gehasi ngayaki Naaman. Kenca iidah Naaman maka lit kalak si ngayaki ia, nusur ia i das gereta perangna nari njumpaisa, jenari nungkun ia nina, "Kai si kurang?"
22"Labo kai pe," nina Gehasi ngaloi. "Tapi isuruh tuanku ngataken man bandu maka e denga nge seh dua kalak nabi si lit i deleng Eperaim. Emaka mindo tuanku bandu gelah iberekenndu telu ribu duit pirak ras dua pasang uis si mejile."
23"Mehuli, buatlah enem ribu duit pirak," nina Naaman ngaloi. Meseksek ipindo Naaman kerna si e, jenari itamakenna duit pirak e ku bas tas, emaka iberekenna duit e dua tas, jenari dua pasang uis si mejile man dua kalak suruh-suruhenna, kenca bage isuruh Naaman ia duana lawes leben asa Gehasi.
24Kenca seh i das uruk-uruk ingan Elisa tading ibuat Gehasi tas si dua e, iangkatna ku rumah. Kenca bage isuruhna suruh-suruhen Naaman ndai mulih.
25Asum Gehasi mulih ku bas rumah e isungkun Elisa ia nina, "Ku ja kam ndai Gehasi?" "Labo kujapa pe," nina Gehasi ngaloi.
26Tapi nina Elisa, "Ukurku lit i jah ndai sanga Naaman nusur i datas gereta perangna nari ngalo-ngalo kam. Labo genduari paksana ngaloken duit ras uis, kebun saitun ras kebun anggur, biri-biri ras lembu, tah pe suruh-suruhen!
27Emaka genduari penakit Naaman miser man bandu, janah kam ras kerina kesusurenndu kena penakit Naaman e rasa lalap!" Kenca ndarat Gehasi nggo penakiten ia, jukutna mbentar bagi kapas.