Alkitab Mobile SABDA
[VER] : [KARO]     [PL]  [PB] 
 <<  2 Samuel 12 >> 

Daud erkadiola dingen jera ibahan Nabi Natan

1Isuruh Dibata Nabi Natan ndahi Daud. Lawes Natan ndahisa janah nina, "Lit dua kalak dilaki si tading i bas sada kuta, sekalak bayak sekalak nari musil.

2Kalak bayak ndai melala lembu ras biri-birina,

3sedang kalak musil ndai lit sada ngenca anak biri-birina, si itukurna. Ipiarana anak biri-biri e, ipebelin-belinna ras anakna i bas rumahna. Iberena man alu nakanna jine, ipelepasna minem tare cangkirna iangkipna i bas ampunna. Anak biri-biri e nggo bali ibanna ras anakna si diberu.

4I bas sada wari lit temue kalak bayak ndai. Kalak bayak e la atena sada pe asuh-asuhenna ipotong man bengkau temuena e, emaka itangkapna anak biri-biri kalak musil ndai, jenari igulena man bengkau temuena."

5Megi si e seh kal rawana Daud man kalak bayak e emaka nina, "Ersumpah aku i bas TUHAN si nggeluh maka kalak si ngelakoken si e patut mate!

6Erkiteken perbahanenna e, arus igalarina mulihkem empat kali lipat asa si nggo ibuatna."

7"Kam kap e," nina Natan man Daud. "Janah enda me kai si ikataken TUHAN Dibata Israel, 'Kubahan kam jadi raja Israel Kupulahi kam i bas Saul nari.

8Nggo kubereken man bandu kerajanna ras kerina ndeharana. Kubahan kam jadi raja Israel ras Juda. Adi e pe langa bias, Kubereken denga nge man bandu dua kali nari asa si e.

9Ngkai maka la kam ngergaken perentahKu? Nggo ibunuhndu Uria i peperangen. Ipelepasndu ia ibunuh bangsa Amon jenari ibuatndu ka ndeharana!

10Erkiteken si e i bas tiap tingkat kesusurenndu tetap lit piga-piga kalak si mate ibunuh sabap ihinandu Aku janah nggo ibuatndu ndehara Uria.

11Ersumpah Aku maka Kubahan kesusahen man bandu si rehna i bas keluargandu nari. I lebe-lebe matandu Kubuat ndeharandu jenari Kubereken man dilaki si deban janah ersada kula ia ras ndeharandu e sanga ciger wari e.

12Kam erdosa erbuni-buni tapi Kubahan me enda jadi i bas siang wari gelah kerina kalak Israel ngidahsa.'"

13"Nggo aku erdosa man TUHAN," nina Daud. Nina Natan njabapsa, "TUHAN nggo ngampuni kam, la kam mate.

14Tapi erkiteken arah perbahanenndu nggo kam megombang man TUHAN, mate me anakndu si mbaru tubuh e."

15Kenca bage mulih Natan ku rumahna.

Anak Daud mate

Ibahan TUHAN anak Daud si ipupus ndehara Uria sakit mekelek.

16Ertoto Daud ku Dibata maka malem min anak e. Emaka erpuasa ia janah tiap berngi bengket ku kamarna janah gedang-gedang berngi medem ia i babo lante.

17Pegawai istanana reh ndahi ia janah latih kal akapna ngiahken ia keke, tapi tetap itulak Daud, janah la ia nggit man kai pe rassa.

18Kenca sada minggu mate me anak e, emaka mbiar pegawai-pegawai Daud ngatakenca man bana. Nina pegawai e, "Sanga nggeluh denga pe anak e la ialoina kita adi si perkuanken ia. Uga nari ninta ngatakenca man bana maka anakna nggo mate? Banci jadi ilukaina kari bana!"

19Kenca idah Daud pegawai e kusik-kusik sapih-sapih ia, ieteh Daud maka anak e nggo mate. Emaka isungkunna kalak ndai nina, "Nggo mate anak e?" "Nggo," nina kalak ndai ngaloi.

20Emaka keke Daud i babo lante nari ridi ia, isurina bukna janah isambarina uisna. Lawes ia ertoto ku Rumah TUHAN. Kenca ia mulih ku istana ipindona pangan. Kenca nggo sikap emaka minter ia man.

21"La iangka kami e," nina pegawai-pegawaina man bana. "Sanga nggeluh denga anak e, itangisindu ia janah la kam nggit man, tapi kenca ia mate minter kam keke man!"

22"Bage," nina Daud. "Aku nggo erpuasa janah tangis sanga anak e nggeluh denga. Nina i bas ukurku ntah mawen mekuah ate Dibata man bangku janah la IpelepasNa anak e mate.

23Tapi genduari ia nggo mate, ngkai maka aku erpuasa? Banci kin kupegeluh anak e mulihken? Aku me pagin si ndahi ia, tapi ia lanai bo banci mulihken bangku."

Salomo tubuh

24Kenca bage iapuli Daud ndeharana Batseba. Ersada kula ia rassa, emaka ipupus Batseba sekalak anak dilaki. Ibahan Daud gelarna Salomo. Keleng ate TUHAN man anak e,

25emaka IperentahkenNa Nabi Natan erbahan gelar anak e Jedidah sabap keleng ate TUHAN anak e.

Raba italuken Daud (1Taw 20:1-3)

26Sanga e Raba ibu kota Amon terus denga iserang Joap janah nandangi italukenna kota e.

27Ikirimna utusen ngelapor man Daud nina, "Nggo kuperang Raba janah nggo kukuasai persedian launa.

28Genduari pepulunglah tentera si tading denga seranglah kota e gelah kam si nalukenca, maka ula pagi gelarku ipujiken kalak erkiteken."

29Emaka ipepulung Daud tenterana lawes ku Raba, iserangna kota e janah italukenna.

30I bas takal raja Amon nari ibuat Daud mahkota emas kira-kira telu pulu lima kilo beratna. I bas mahkota e lit sada permata. Ibuat Daud mahkota e itamana ku takalna. Barang rampasen pe melala iangkutna i bas kota e nari.

31Janah rayatna ibaba erdahin make gaji, tajak besi, kapak, dingen ipaksana kalak enda erdahin erbahan batu bata. Bage ka me pe perbahanen Daud kerina rayat i bas kuta-kuta si deban i Amon. Kenca bage mulih ia ras anak buahna ku Jerusalem.


  Share Facebook  |  Share Twitter

 <<  2 Samuel 12 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel