Dual PanelJoas raja Juda (2Raj 12:1-16)
1Joas jadi raja Juda sanga umurna pitu tahun jenari merentah i Jerusalem dekahna empat puluh tahun. Nandena gelarna Sibia, asalna i kota Berseba nari.
2Ilakoken Joas sue ras si ngena ate TUHAN kidekah Imam Joyada nggeluh denga.
3Ipilih Joyada dua kemberahen man Joas, janah ipupusna piga-piga anak dilaki ras diberu.
4La ndekahsa kenca Joas jadi raja, iputuskenna pekena Rumah Pertoton.
5Isuruhna imam-imam ras kalak Lewi lawes ku kota-kota Juda pepulung duit, guna pekena Rumah Pertoton e i bas tahun ku tahun. Ikatakenna maka pedas idahiken tapi ipelawen-lawen kalak Lewi.
6Emaka ilebuhna Joyada peminpin kalak e, jenari nina, "Ngkai maka la ituntutndu kalak Lewi pepulung pajak i bas rayat Juda ras Jerusalem nari sue ras si itetapken Musa, suruh-suruhen TUHAN e, guna nampati Kemah Perjumpan e."
7(Pengikut Atalia, diberu si jahat e, nggo ncedaken Rumah Pertoton janah nggo ibuatna barang-barang si badia si lit i je guna ipake i bas ersembah man Baal.)
8Emaka isuruh raja kalak Lewi erbahan peti guna ingan pepulung duit ras namakenca i bas pintu gerbang Rumah Pertoton.
9Imomokenna ku belang-belang Jerusalem ras Juda gelah kerina kalak mereken man TUHAN pajak si ituntut Musa suruh-suruhen Dibata e, si tangtangna nai itetapkenna ipepulung i taneh si mesawang.
10Megi si enda meriah ukur bangsa e ras peminpin-peminpinna, emaka ibabana pajakna jenari itamakenna ku bas peti e.
11Tiap wari peti e iendesken kalak Lewi man pegawai istana si ertugas guna si e. Kenca peti e nggo dem, duit e ipedarat sekretaris istana ras si mewakili Imam si Mbelin jenari iulihkenka peti e ku bas inganna. Alu bage melala duit ipepulung.
12Duit e ibereken raja ras Joyada man kalak si ertanggung jawab pehuli Rumah Pertoton e. Jenari iupahi kalak enda tukang batu, tukang kayu, ras tukang besi lako pehulisa.
13Kerina si erdahin e tutus, emaka Rumah Pertoton e nggo ka mulihken bali ibahanna ras tangtangna ndube, janah paguhna pe bage ka.
14Kenca nggo dung Rumah Pertoton e ipehuli, emas ras pirak si iba ibereken man raja ras Joyada. Emas ras pirak si iba e ipergunaken erbahan baskom-baskom ras erbahan alat-alat si deban guna Rumah Pertoton e.
Jasa Joyada la iergaken
Kidekah geluh Joyada tetap ipersembahken persembahen alu aturen i bas Rumah Pertoton e.
15Kenca ia metua, umur 130 tahun mate ia.
16Ikuburken kalak ia i bas kuburen raja-raja i Kota Daud, guna nginget pendahin si nggo idahikenna guna bangsa Israel, guna Dibata, dingen guna Rumah Pertoton e.
17Tapi kenca Joyada mate, iendik-endik peminpin Juda Raja Joas megiken katana.
18Emaka lanai bangsa e nembah i bas Rumah Pertoton TUHAN Dibata nini-ninina, tapi mulai ia nembah man berhala-berhala ras gana-gana Dewi Asera. Erkiteken dosa-dosa si enda reh pernembeh ate TUHAN man Juda ras Jerusalem.
19Isuruh TUHAN nabi-nabi mpersingeti kalak enda gelah jera mulihken man BaNa, tapi la ibegikenna nabi-nabi e.
20Kenca bage nusur kesah Dibata ngkuasai Sakaria anak Imam Joyada. Tedis ia i bas sada ingan i ja jelma si nterem banci ngidah ia, jenari erlebuh ia nina, "Nungkun TUHAN Dibata man bandu: ngkai maka lanai kam patuh man perentah-PerentahNa, mahanca kam kena kiniseran-kiniseran? Itadingkenndu Ia, emaka ItadingkenNa kam!"
21Raja Joas ikut i bas sada komploten ngelawan Sakaria. Janah alu perentah raja ibenteri kalak Sakaria seh mate i bas kesain Rumah Pertoton.
22Raja e lupa kerna kesetian Joyada, eme bapa Sakaria, emaka ibunuhna Sakaria. Muatna mate erlebuh Sakaria nina, "Dibatalah si ngidah kai si ibahanndu janah Ialah ngukum kam."
Pengkeri-kerin pemerentahen Joas
23I bas pengkeri-kerinna tahun e, tentera Siria reh nerang Juda ras Jerusalem. Ibunuhna kerina peminpin-peminpin Juda ras Jerusalem, janah seh buena barang-barang rampasen ibabana mulih ku Damaskus.
24Tentera Siria e labo nterem, tapi ipelepas TUHAN italukenna tentera Juda si nterem e, sabap bangsa e nggo nadingken TUHAN Dibata nini-ninina. Alu bage, Raja Joas nggo iukum.
25Ia nggo luka mekelek, janah sanga musuh-musuh e nggo mulih, dua pegawaina erpekat ngelawan ia emaka ibunuhna Joas i bas ingan medemna mbalas kematen anak Imam Joyada. Ikuburken ia i Kota Daud tapi la i bas kuburen raja-raja.
26(Kalak si erpekat ngelawan ia e, eme Sabad; nande Sabad eme sekalak bangsa Amon gelarna Simeat, nande Josabat eme sekalak bangsa Moap, gelarna Simrit.)
27I bas kitap Tapsiren Kitap Raja-raja i je ituriken kerna anak-anak Joas, nubuat-nubuat si ibelasken kerna ia, dingen cataten uga ia pehuli Rumah Pertoton. Anakna Amasia nggantiken ia jadi raja.