Dual PanelJoas raja Juda (2Raj 23:30-35)
1Kalak Juda milih dingen nangkuhken Joas, jadi raja i Jerusalem nggantiken bapana Josia.
2Joas umur 23 tahun tupung ia jadi raja Juda. Ia merentah Jerusalem telu bulan dekahna.
3Neko raja Mesir naban dingen ngangkut Joas ku Mesir. Ipaksana Juda nggalar 3.400 kilo pirak dingen 34 kilo emas. Jenari itangkuhkenna Eliakim senina Joas jadi raja. Gelar Eliakim isambarina jadi Joyakim. Kenca bage iangkutna Joas ku Mesir.
4(2Taw 36:3)
Joyakim raja Juda (2Raj 23:36-24:7)
5Joyakim umur 25 tahun tupung jadi raja Juda. Ia merentah Jerusalem 11 tahun dekahna.
6Tupung Nebukadnesar raja Babilon naluken Juda, itangkapna Joyakim jenari ibabana tertaban ku Babil.
7Sada bagin barang si meherga i bas Rumah Pertoton iangkutna dingen itamana i bas istanana i Babil.
8Turi-turin si deban kerna Joyakim, subuk lagu langkahna si la terpake ras perbahanenna si jahat nggo isuratken i bas Sejarah Raja-raja Israel ras Juda. Anakna Joyakin nggantiken ia jadi raja.
Joyakin raja Juda (2Raj 24:8-17)
9Joyakin umur 18 tahun tupung ia jadi raja Juda. Ia merentah Jerusalem 3 bulan 10 wari dekahna. Ia pe erdosa man TUHAN.
10I bas sambar tahun, Raja Nebukadnesar ngangkut ia tertaban ku Babil. Barang-barang si meherga i bas Rumah Pertoton pe ibabana ka. Kenca bage Nebukadnesar nangkuhken Sedekia mama Joyakin jadi raja Juda ras Jerusalem.
Sedekia raja Juda (2Raj 24:18-20; Yer 52:1-3a)
11Sedekia umur 22 tahun tupung ia jadi raja. Ia merentah Jerusalem lit dekahna 11 tahun.
12Ia pe erdosa man TUHAN Dibatana. La ia nggit peteruk bana, dingen la ngikutken kata Dibata si nipeseh man bana arah Nabi Jeremia.
Jerusalem ndabuh
13Raja Nebukadnesar maksa Sedekia ersumpah i bas gelar Dibata, maka ia tetap patuh man bana. Sedekia metangkang nandangi TUHAN, Dibata Israel. La ia nggit nadingken dosa-dosana dingen la ia nggit mulihken kempak TUHAN.
14Rumah Tuhan si Badia pe icemarken peminpin-peminpin Juda, imam-imam, ras rayat, sabap ia pe ikut nembah dingen ngikutken dalan kalak perdosa bangsa-bangsa sekelewetna.
15TUHAN Dibata nu nini-ninina nggo rusur nuruh UtusenNa lako mpersingeti BangsaNa, sabap keleng AteNa BangsaNa ras RumahNa.
16Tapi suruh-suruh Dibata e, imain-mainken kalak enda, iguro-gurokenna janah la diatena pe rananna. Perban si e merawa kal TUHAN seh maka sekalak pe lanai lit pulah i bas UkumenNa nari.
17Emaka isuruh TUHAN raja Babil nerang Juda. Raja Babil; munuhi kalak Juda si nguda denga; subuk si i bas Rumah Pertoton pe. Man ise pe la icidahkenna perkuah atena, nguda ntah metua, dilaki ntah diberu, sakit ntah mejuah-juah. Iendesken Dibata ia kerina man raja Babil.
18Perkakas i bas Rumah Pertoton, barang-barang si meherga, erta-erta raja ras pegawaina kerina irampas raja Babil jenari ibabana ku Babil.
19Tembok kota Jerusalem iruntuhkenna, kota e icilukna atan pe Rumah Pertoton, istana-istana ras barangna si meherga si tading denga i je.
20Kalak si pulah i bas cilaka e nari iangkutna ku Babil, jadi suruh-suruhen kalak Babil ras suruh-suruhen kesusurenna seh ngayak kerajan Persia erkuasa.
21Enda jadi, sue ras si nikataken TUHAN erkelang-kelangken Nabi Jeremia, "Negeri enda jadi taneh tenggiring pitu puluh tahun dekahna selaku ganti tahun-tahun Sabat si la iperdiateken."
Iperentahken Kores gelah mulih kalak Heber ku kutana (Es 1:1-4)
22I bas tahun pemena pemerentahen Kores, raja Parsi ilakoken TUHAN rikutken si pernah IkatakenNa arah Nabi Jeremia. Isuruh TUHAN Raja Kores pedarat perentah si niogeken i belang-belang kerajanna. Bagenda nina,
23"Enda me perentah Kores, raja Parsi! TUHAN Dibata si Mada Kuasa i Surga nggo njadiken aku raja i belang-belang doni enda. Ia nuruh aku majekken RumahNa i Jerusalem daerah Juda. Emaka kerina kam bangsa Dibata arus mulih ku jah! TUHAN lah si ngkawali kam."