Dual Panel1Begikenlah kata enda, o diberu-diberu si ringan i Samaria, si bali burna ras lembu Basan, kam si merjaki dingen nindih kalak si la ergegeh janah musil, si la erngadi-ngadi mindo man perbulangenndu gelah tetap isikapkenna bandu inemen keras.
2Nginget KebadianNa, TUHAN si Erdolat nggo ersumpah, "Reh me warina i ja irintak-rintak kalak kam alu kawil; kerina kam la banci lang bali ras nurung i bas kawil.
3Kam isarenken ku lubang si ndeherna i bas tembok kuta, jenari ibenterken ndarat."
Israel la nggit erlajar
4Nina TUHAN si Erdolat, "O kalak Israel, to sembahlah Dibata ku Betel, jenari erdosalah! To dahi ku Gilgal, janah reh buena bahan dosandu. Persembahkenlah i je asuh-asuhen tep-tep erpagi-pagi, janah telu wari sekali, bahanlah persembahen persepuluhenndu.
5Persembahkenlah roti tanda pengataken bujurndu man Dibata, janah momokenlah kerina pemerendu. Sabap e kap atendu ngena!
6Aku kap si mahanca maka lit kelihen si mesangat i bas kerina kota-kotandu, tapi amin bage pe labo kam reh jera man bangKu.
7La Kubere udan nusur tupung sinuan-sinuanndu perlu kal kena udan. Kupesusur udan ku sada kota, tapi ku kota si deban lang. Sada juma kena udan, tapi juma si deban legon.
8Piga-piga kota lawes erpala-pala ku kota si deban ndarami lau inemen, tapi i je pe la lit idatca, janah muas ia lalap. Amin bage pe langa ka bo kam jera ku Aku.
9Kusuruh angin si melas mahanca sinuan-sinuanndu kerah. Labang engkeriken reba-reba ras kebun anggurndu, bage pe batang ara ras batang saitunndu. Amin bage pe langa ka bo kam mulih jera ku Aku.
10Kusuruh penakit laya-laya engkenai kam bali ras si Kubahan man Mesir nai. Kubunuh anak-anak peranandu i bas perang janah kudandu Kurampas kerina. Kubahan maka sedak akapndu nganggeh bau kalak mate si macik i bas ingan perkemahenndu. Amin bage pe langa ka bo kam mulih jera ku Aku.
11Deba kam Kukernepken bali ras pengkernepkenKu Sodom ras Gomora nai. Kam si tading bali kap ras sengkeret ranting si isintapken i bas api nari. Tapi amin bage pe lenga ka bo kam mulih jera ku Aku," bage nina TUHAN.
12"Dage, o kalak Israel, Kuukum me kam. Janah erdandanken Kusehken me ukumen e man bandu, ersikap-sikaplah kam ngadap Aku, Dibatandu."
13Dibata kap si nepa deleng-deleng, si njadiken kerina angin. IpebetehkenNa PerukurenNa man manusia, IsalihkenNa suari jadi berngi. Erdalan Ia arah angin si meganjang i doni GelarNa eme kap: TUHAN Dibata si Mada Kuasa!