Dual Panel1Nembeh ate TUHAN ngenehen kalak si make sukat-sukat si la bujur, tapi meriah AkapNa adi ipake timbangen si bujur.
2Kalak megombang, minter nge pagi juru, madin jadi kalak si rukur meteruk.
3Kalak bujur itegu-tegu kebujuren, kalak perbual kernep erkiteken bualna.
4Tupung kematen nggo ndeher, erta lanai lit ertina, tapi kebujuren mulahi kalak i bas kematen nari.
5Dalan kegeluhen kalak bujur, kebujuren si pekenditsa, tapi kejahaten erbahanca kalak jongkang.
6Kalak bujur terkelin erkiteken kebujurenna, tapi kalak si la terteki isidingi kerangapenna.
7Tupung kalak jahat mate, pengarapenna pe mate, ngarapken gegeh jine la lit ertina kepe.
8Kiniseran kalak bujur isalihken, tapi kalak jahat idempar kesusahen.
9Ranan kalak jahat erbahanca bene kalak, tapi kepentaren kalak bujur erbahanca kalak terkelin.
10Dem keriahen i bas kota, tupung kalak bujur jumpa rejeki, adi kalak jahat mate, ersurak-surak kalak.
11Pasu-pasu kalak bujur erbahan kota jadi mejile, tapi ranan kalak jahat ncedakenca.
12Lenge kap adi mpeteruk kalak si deban, adi kam erpemeteh, tentu sinik saja kam.
13Kalak perancuk-ancuk la banci muniken rusia, tapi kalak si banci iteki ngasup muniken ranan.
14Bangsa si la erpeminpin la banci lang bene me, reh teremna kalak si beluh mereken ukur, dame me negeri.
15Ula padanken nggalar utang kalak si la itandaindu, madin ula campuri gelah ula erkadiola.
16Diberu si melias ihamati kap, kalak si merangap kebayaken saja ipepulungna.
17Runtung kalak si mehuli ukurna, tapi kalak si kejam ngerugiken bana kap.
18Kalak jahat situhuna labo lit untungna, tapi kalak si erbahan mehuli nggo tentu ngalo upah.
19Ise tutus atena ndahiken si mehuli, nggeluh me ia, tapi ise tetap erbahan jahat mate me ia.
20Nembeh ate TUHAN nandangi kalak si jahat ukurna, tapi kalak si mahan bujur IkelengiNa.
21Teklah kam maka kalak jahat la banci la iukum, tapi kalak bujur terkelin.
22Diberu si mejile tapi la beluh ertimbang i bas ukurna, bali kap ras cincin emas i bas uncim babi.
23Sura-sura kalak bujur erbuahken kiniulin tapi adi seh sura-sura kalak jahat nembeh ate kalak kerina.
24Lit kalak si melumbar mere, tapi tambah-tambah kebayakenna, lit kalak degil, tapi tambah-tambah kemusilenna.
25Melumbarlah mere maka kam reh bayakna, sampatilah kalak maka kam pe isampati.
26Kalak si nahan gandumna lako muat untung, isumpahi kalak kap; tapi si ndayakenca ndatken pasu-pasu.
27Ise si mehuli perayakenna, malang kap kalak man bana, tapi si ndaram-ndarami perubaten, jumpa me ia kiniseran.
28Kalak si ernalem man erta, nartar bagi bulung-bulung metua, tapi kalak bujur terlak bagi tunas nguda.
29Kalak si nama kecedan man isi jabuna, angin saja ngenca pagi ulihna; kalak bodoh lalap jadi suruh-suruhen kalak beluh.
30Ulih kebujuren eme kegeluhen, tapi kalak merawa menekenca.
31Kalak bujur ndatken si mehuli kap i bas doni enda, dage kalak jahat ugapa pe dat ukumen.