Dual Panel1Alu jabap si melias mantak rawa si gara, tapi jabap si merampus pekeke ate merawa.
2Ranan kalak pentar dem alu pemeteh, tapi ranan kalak bodoh la lit ertina.
3Kai pe si jadi idah TUHAN i japa pe, IperdiatekenNa kerina perbahanen si jahat ntah pe si mehuli.
4Ranan mehuli mereken kegeluhen, cakap si ngelukai pusuh erbahanca bene ukur.
5Kalak bodoh la iperdiatekenna ajar bapana, kalak pentar ilakokenna ajar orang tuana.
6Kebayaken kalak bujur tetap lit, tapi kebayaken kalak jahat bene i bas paksa kiniseran.
7Kepentaren icecarken kalak pentar, labo kalak motu si encecarkenca.
8Meriah ukur TUHAN megiken pertoton kalak bujur, tapi ciga AteNa persembahen kalak jahat.
9Nembeh ate TUHAN dalan kalak jahat, tapi ikelengina si ngelakoken kebujuren.
10Kalak si ndalanken salah, iukum me alu mesangat, kalak si la nggit ipandang, mate me.
11Doni kematen pe talang ibahan TUHAN, emaka perukuren manusia pe labo terbuniken i adep-adepen TUHAN.
12Kalak si meganjang rukur la atena ngena ipandang, la pernah ia nggit mindo pertenget i bas kalak si pentar nari.
13Tupung meriah iakap kalak, cirem ia, tapi tupung susah, berjut ayona.
14Kalak si beluh rukur merincuh ia erlajar, tapi kalak bodoh puas iakapna amin pe ia lenge.
15Kalak musil geluhna dem alu perbeben, tapi kalak si meriah ukurna, senang iakapna nggeluh.
16Madin musil tapi malang man TUHAN, asangken bayak tapi dem aru ate.
17Madin man gulen saja ras si ikelengindu, asangken man daging si ntabeh tapi ras kalak si nembeh atendu.
18Kalak si perampang, peturah perjengilen kap, tapi kalak sabar maba dame.
19Kalak malas i japa pe jumpa kesusahen; tapi kalak bujur la jumpa kiniseran.
20Anak si pentar, malem ate bapana ibahanna; tapi anak si lenge la iergakenna nandena.
21Kalak lenge meriah iakapna i bas kebodohenna, kalak pentar ilakokenna kai si benar.
22Adi melala kam dat pertenget seh me bagi si isurandu, adi la lit pertenget labo seh sura-sura.
23Seh kal riahna ukur adi terbelasken, kata si payo i bas paksa si payo.
24Kalak pentar nangkeng ia arah dalan ku kegeluhen, labo ngincuah arah dalan si perlawesna kempak kematen.
25Ikernepken TUHAN me rumah kalak si meganjang rukur, tapi ikawalina sikerajangen diberu balu-balu.
26Nembeh ate TUHAN kempak sura-sura kalak perdosa, tapi ranan mehuli ngena AteNa.
27Kalak si ndarami untung alu dalan si la bujur, isarenkenna kap keluargana kempak kesusahen, si la nggit ngaloken uang sogok reh gedangna me umurna.
28Kalak si mehuli, iukurina lebe maka ibelaskenna jabapna, kalak jahat pedas ijabapna, tapi ipeturahna kesusahen.
29Adi kalak mehuli ertoto, ibegiken TUHAN pertotonna, tapi la DiateNa pe kalak jahat.
30Ngidah ayo si siang meriah kal ukurna, megi berita si mehuli reh senangna ka iakapna.
31Kalak si nggit megiken ajar pentar kap.
32Kalak si la nggit megiken ajar, bana pe la iergakenna, kalak si nggit ipandang, reh pentarna kap ia.
33Erkemalangen man TUHAN e kap palas persekolahen, ukur si meteruk e kap palas ndatken kehamaten.