Dual Panel1Ulin musil tapi bujur, asangken perbual dingen longor.
2La mehuli mejingkat adi la radu ras pemeteh, si merudusa mabai kalak ku bas kiniseran kap.
3Lit deba encedaken dirina jine erkiteken kebodohenna, jenari TUHAN ka ilepakkenna.
4Kalak bayak tambah-tambah lalap temanna, tapi kalak musil temanna pe nadingken ia.
5Kalak si nuriken si la tuhu i bas pengadilen, iukum me; la banci ia pulah.
6Nterem kalak si ngangkat-ngangkat ukur kalak si mbelin, kalak si melumbar mere nterem dat teman.
7Kalak musil la meherga iakap seninana, emaka labo ate mamang adi ia la erteman. Ugapa pe ibahanna, la ia ngasup ndatken teman.
8Ise ngayaki pemeteh, ikelengina kap dirina, dingen ise si nginget kai si ipelajarina jumpa kap ia si mehulina.
9La lit kalak pulah i bas pengadilen nari, kune iturikenna kata la tuhu.
10La arusna inanami kalak bodoh kegeluhen si mewah, dingen la patut pe suruh-suruhen merentah tuanna.
11Kalak pentar ikuasaina dirina, terpuji ia perban iperdiatekenna kesalahen kalak si deban.
12Rawana raja bali kap ras singa si erdengum, kiniulin raja desken udan si mbaru denga reh.
13Anak si longor banci encilakaken bapana, ndehara si perjungut-jungut desken tarum cires naktaken launa.
14Ranan dingen erta banci dat i bas orang tua nari, tapi ndehara si pentar i bas TUHAN nari ngenca rehna.
15Adi atendu kin jadi kalak malas, pedemkenlah maka kam lumben.
16Adi atendu gelah terkelin, arus ipatuhindu perentah Dibata, adi la ergakenndu, mate me kam.
17Nampati kalak musil bali ras pepinjamken man TUHAN, TUHAN ka kari si ersimulih.
18Ajarken disiplin man anakndu tupung kitik denga, adi lang, isampatindu me ia ngkernepken dirina.
19Pediat kalak meter naik darehna, ia jine ndatken nanamna
20Adi kam nggit megiken kata dingen nggit erlajar, i bas sada paksa kam la banci lang jadi pentar.
21Manusia banci ersura-sura, tapi peraten TUHAN nge jadi.
22Si iarapken i bas manusia nari eme kesetian. Ulin musil asangken jadi perbual.
23Patuhlah man TUHAN maka cawir kam metua, puas me iakapndu dingen la kam kena cilaka.
24Lit kalak si la tanggung malasna; nama nakan ku babahna pe la diatena.
25Adi kalak megombang iukum, emaka kalak si langa melala pemetehna banci dat pelajaren. Adi kalak pentar iajarken, datca me pemeteh.
26Kalak si nakiti dingen nulak orangtuana, eme anak si njuruken si la lit kiniulinna.
27O anakku adi lanai kam nggit erlajar, lupa me kam nandangi kai si nggo ipelajarindu.
28Kalak si nuriken kesaksin si la tuhu, kejahaten kap ngenca ulihna.
29Kalak bodoh dingen meganjang rukur, la banci lang ipekpeki.