Dual Panel1Kalak si mekeng, aminna pe usur gia ipandang, i bas sada paksa la banci lang getem, lanai terpekena mulihi.
2Adi kalak benar merentah, meriah ukur jelma si nterem. Tapi adi kalak jahat si erkuasa, mesui ate kalak kerina.
3Kalak si keleng atena kepentaren, megah iakap bapana, kalak si nemani diberu si pencarinna erlua-lua, mbuang-mbuang kinilitenna kap.
4Adi iperdiateken rajalah kebujuren, la banci lang paguh me negerina tapi adi duit ngenca atena, icedakenna me negerina.
5Kalak si muji-muji temanna, itogengna kap siding man bana jine.
6Kalak jahat kena siding dosana, kalak bujur, malem dingen salang sai iakapna.
7Kalak si mehuli iantusina kebujuren kalak musil, tapi kalak jahat la iantusina e kerina.
8Si penguru-nguru guntar ibahanna kota, tapi kalak si beluh rukur njadiken ketenengen.
9Adi erpekara kalak si lit pengertinna ras kalak bodoh, kalak bodoh e ngisak-ngisak janah tawa-tawa kap.
10Pemunuh nembeh atena kempak kalak si pinter ukurna, tapi kalak bujur ngkawalisa.
11Adi kalak lenge nembeh icidahkenna kal ukurna, tapi kalak si beluh rukur saber dingen terampersa bana.
12Adi megermet si erkuasa mperdiateken cakap la tuhu, kerina kap pegawaina bual.
13Kalak musil ras si nindihsa lit perserina duana ibereken TUHAN mata.
14Adi ikapiti raja kalak bujur, la banci lang ndekah ia jadi raja.
15Pedah dingen ajar, mehuli kap man anak-anak, anak si lalap itami-tami, ijurukenna me nandena.
16Adi kalak jahat merentah, tambah-tambah me kejahaten, tapi idah kalak bujur me uga pergulingna kalak jahat.
17Berekenlah ajar man anakndu, maka megah dingen malem atendu ibahanna.
18Bangsa si la ngikutken perentah TUHAN, eme bangsa si rontang. Sangap me kalak si patuh man undang-undang TUHAN.
19La kam banci ngajarken suruh-suruhen alu ngerana saja. Iertina tapi la diatena.
20Lalan pengarapen i bas kalak si medungu, asangken man kalak si pet ngerana tapi la rukur.
21Suruh-suruhen si itami-tami kitik-kitikna nari, dungna lanai terkuasai.
22Kalak si murah merampus, erbahanca nterem kalak susah dingen erjengil.
23Kalak megombang la banci la guling, kalak si meteruk rukur ihamati.
24Kalak si nampati pinangko, ndarami cilaka guna dirina jine. Adi terus terang ia i pengadilen, iukum me ia. Tapi adi lang, Dibata me si numpahi ia.
25Mbiar man perukuren kalak, erbahan susah saja. Tek man TUHAN erbahanca kalak teneng.
26Nterem kalak nggit nampil-nampilken bana man pemerentah, tapi i bas TUHAN nari nge reh kebujuren.
27Kalak bujur nembeh atena kalak jahat; kalak jahat nembeh atena kalak bujur.