Dual PanelPujin nandangi kepentaren
1Dengkehkenlah! Kepentaren erlebuh, pemeteh erdilo.
2I datas uruk i tepi dalan, i serpang-serpang tedis me kepentaren.
3I pintu gerbang kota, i je erlebuh ia,
4nina, "O jelma manusia dengkehkenlah, o si ngiani doni, begikenlah sorangku erlebuh.
5Langa kin kam dewasa? Erlajarlah gelah dewasa. Kalak lenge kin kam? Erlajarlah ndatken pemeteh.
6Dengkehkenlah kata si meherga si kuajarken; janah payo kap kerina si kuturiken.
7Si kukataken e, tuhu kap kerina, kata guak seh kal ateku nembehna.
8Kasa kai si kukataken payo kerina, la lit si la tuhu tah si papak pemabaina.
9Man kalak si erpemeteh, terang kap e kerina; man kalak pentar, seh kap tangkasna.
10Ergakenlah kai si kuajarken lebihen asangken pirak, ergakenlah pemeteh lebihen asangken emas murni.
11Aku kap kepentaren, aku ergan asangken permata, la terbandingken ras kai pe si iakapndu meherga.
12Aku kap kepentaren; pengertin si mbages lit i bas aku, aku cerdik, mehuli kal pemetehku.
13Erkemalangen man TUHAN ertina erciga ate man kejahaten, la ngena ateku si megombang ras ukur meganjang. Nembeh ateku kempak lagu langkah si jahat, dingen ranan si la tuhu.
14Aku kap si mahan rencana dingen ndahikenca, aku cerdik dingen erkuasa.
15Kusampati raja-raja ndalanken pemerentahen, si erkuasa kusampati ndalanken undang-undang alu bujur.
16Erkiteken ngaruhku raja-raja erkuasa i doni, bage pe si bayak-bayak ras hakim-hakim kerina.
17Keleng ateku man kalak si ngkelengi aku, ise pe si ndarami aku jumpa ia ras aku.
18I bas aku simpar kebayaken dingen kemulian, bage pe kesenangen erkiteken seh sura-sura.
19Kai si idatndu i bas aku nari ergan asangken emas murni, ergan pe asangken pirak asli.
20Aku erdalan i bas dalan benar, kuikutken dalan si bujur.
21Man kalak si ngkelengi aku, kubereken kebayaken melala, rumahna kudemi alu erta-erta si meherga.
22Aku kap tinepa TUHAN si pemena, bekas TanNa si mula-mulana.
23Aku kap si pemena kal ijadiken, si pemena, ope denga doni ibenaken.
24Leben aku tubuh asangken lawit si mbelang, ope denga lit sumbul-sumbul lau.
25Aku nggo tubuh ope denga lit deleng-deleng, ope uruk-uruk ipepajek i bas inganna.
26Ope denga doni ras kendit si mbelang itepa Dibata, ope denga sempukul taneh pe ijadiken.
27Aku nggo ikut i je tupung langit ikimbangken, tupung awang-awang iampeken i babo lawit si mbelang.
28Tupung Dibata namaken embun, i das awang-awang, tupung italangina sumbul-sumbul lau i bas lawit si mbelang,
29tupung IperentahkenNa lau lawit, la banci nimpari baleng si ItetapkenNa; aku pe ikut i je, tupung palas doni enda IpajekkenNa.
30Aku lit i DeherNa desken sekalak anak buah AteNa; aku kap sumbul KeriahenNa, dem keriahen i bas adep-AdepenNa,
31meriah ukurku ras doni enda, malem ateku ras manusia.
32Genduari o anak perana, dengkehken min aku, ikutkenlah pedahku, maka malem atendu.
33Megermetlah man kai si ipelajarindu, jadilah pentar, ula ikaruskenndu.
34Sangap kal kalak si megiken aku, si tep-tep wari tertima-tima i lebe-lebe rumahku.
35Ise si njumpai aku, ndatken kegeluhen, janah man bana ngena ate TUHAN.
36Ise si la njumpai aku, ia rugi jine, kalak si nembeh atena aku, kematen kap atena ngena."