Dual Panel1[Tapi nina si Jop,] "Dengkehkenlah cakapku, e lah gia pengapul si iberekenndu bangku.
2(Ayb 21:1)
3Bere aku ngerana lebe genduari, jenari, adi bage atendu banci ka aku igobang-gombangindu mulihi.
4Labo ras manusia aku erjengil, emaka bujur nge adi la gia aku sabar.
5Pernehenlah aku, tentu jengang kam ngidahsa; itutupndu babahndu, lanai terbanndu ngerana.
6Adi kuukuri kai si jadi man bangku, nggirgir aku, birawan kal aku, bene ukurku.
7Ngkai maka ibere Dibata kalak jahat nggeluh, cawir metua, dingen ertana ertambah-tambah?
8Idahna anak-anakna sikap geluhna, janah kempu-kempuna idahna seh mbelin.
9Dibata la mereken cilaka bana, janah la lit si man kebiaren i bas jabuna.
10Merih asuh-asuhenna, indung lembuna nubis alu la mesera.
11Anak kalak jahat senang akapna gawah-gawah, desken rarasen anak biri-biri, erguro-guro alu meriah.
12Rikutken sora kulcapi ras gendang sarune, landek-landek ia kerina janahna rende.
13Kidekah geluhna senang akapna, janah ntabeh akapna tupung matena.
14Tapi ia nge si ngatakenca man Dibata, "To lawes, tadingkenlah kami; la kami perlu metehsa kai sura-SuraNdu i bas kegeluhen kami."
15Iakapna la lit ertina nembah man Dibata, la lit gunana ertoto man BaNa.
16Erkiteken gegehna jine akapna maka ia bayak; tapi perukuren si bage, kuakap salah dingen lepak.
17Lit kin lampu kalak jahat inimpeti Dibata? Ntah IkernepkenNa salu cilaka? Lit kin ate Dibata merawa bana, seh maka ia IukumNa?
18Lit kin ia desken nggala iembusken angin, ntah pe bagi abu si ikabangken angin kalisungsung?
19Nindu njabapsa, "Anakna pagi iukum erkiteken dosa bapana." La tuhu! Ise erdosa, e lah iukum Dibata. Icidahken Dibatalah man bana, maka ia iukum erkiteken dosana.
20Si erdosa e lah nanggung ukumenna. Ialah ngenanami pernembeh Dibata si Mada kuasa.
21Sabap kenca mate manusia, ma lanai diatena kai jadi man kesusurenna?
22Ngasup kin manusia ngajari Dibata, sedangken Dibata nge si ngadili isi Surga?
23Lit deba mate sanga ia mejuah-juah dingen megegeh denga, alu teneng dingen dame itadingkenna doni enda.
24(Ayb 21:23)
25Deba, asum ia mate, seh kal akapna pagitna, janah kesenangen la nggo inanamina.
26Tapi i kuburen, radu terdang nge kerina, jenari iulung-ulung bernga.
27Si tuhuna kutandai nge perukurenndu, kuteh nge rencanandu nalahken aku.
28Nindu nungkun, "I ja dage rumah pengulu gelgel e, kalak si ngelakoken kejahaten e?"
29La kin nggo isungkunndu kalak si dauh perdalanna? La kin itehndu kai si iturikenna?
30Iturikenna tupung Dibata merawa nehken ukumen, kalak jahat tetap iselamatken.
31La lit sie pang ngaduken kejahatenna, tah pe erbalas nandangi perbahanenna.
32Asum itaruhken ia ku kuburen, kuburenna ijaga dingen iperdiateken.
33Kalak si naruhken ia la tanggung teremna, janah gabur megabur namburi bangkena.
34Dage pengapulndu e, pengapul si la erguna, janah jabapndu ndai bual kerina."