Dual Panel1[Nina Jop ka tole,] "I bas gelar Dibata si Mada Kuasa si nggeluh, si la mereken keadilen bangku, si erbahanca pagit geluhku, ersumpah aku:
2(Ayb 27:1)
3kidekah aku nggeluh denga, kidekah ibere Dibata denga aku erkesah,
4biberku la nggit melasken kata la tuhu, dilahku la nggit melasken tipu.
5Ndigan pe la aku nggit ngatakenca maka kam benar janah ngayak mate tetap aku ertahan maka aku bujur.
6Tetap aku ertahan maka aku kalak bujur tuhu-tuhu pusuh peratenku si melikas la nalahken aku.
7Asa kai musuh-musuhku ras si ngelawan aku, kena ukumlah bagi kalak jahat ras penipu.
8Kai nari kin pengarapen kalak si la erdibata, tupung ibuat Dibata kesahna?
9Ibegiken Dibata kin pernderkuhna, tupung kiniseran reh ndumpang ia?
10Arusna kin tedeh atena nandangi keriahen Dibata, dingen la erngadi-ngadi ertoto man BaNa?
11Mari, maka kuajari kam kerna belinna kuasa Dibata, dingen kuturiken kai si nggo irencanaken Dibata si Mada Kuasa.
12Tapi si tuhuna kam pe nggo ngidah si e kerina; dage ngkai maka perukurendu bage rembona?" Sopar,
13"Bagenda me ukumen si ibahan Dibata si Mada Kuasa, nandangi kalak jahat dingen merawa.
14Aminna nterem pe anakna, mate pagi kerina i bas peperangen. Janah asa kesusurenna, nggeluh i bas kekurangen.
15Si tading denga, mate kena penakit laya-laya, janah ndeharana pe la nangisi kematenna.
16Aminna ergun-gun pe pirakna, janah uisna pe lanai terkira,
17tapi uisna si mbue e, kalak bujur makesa, janah pirakna, kalak si pinter ukur muatsa.
18Rumah si ipajekken kalak jahat desken banto lawah-lawah, bagi sapo-sapo kalak si ngiani juma, la nteguh.
19Tupung ia lawes medem si perpudina, bayak kal ia, tapi asum ia medak, nggo lesap kebayakenna.
20Kebiaren rempet reh ku ia desken banjir si mbelin, tupung berngi lesap ia iembusken angin.
21Angin rembus i Timur nari engkabangken ia, i bas rumahna nari, isapuna ia.
22Kiam ia, ingan cebuni idaramina, tapi angin e ngeradasken ia alu la erkuah ate.
23Tupung ia kiam, angin erdeso-deso nderpa ia, mbiar dingen gentar ia ibahan angin si megegeh ngkernepken e."